ەتنوفەستيۆال قالا كۇنىنە وراي ۇيىمداستىرىلدى. شارادا استانا ساياباعىندا ۇلتتىق بۇيىم, اسپاپتار جاسايتىن شەبەرلەر, زەرگەرلەر, سۋرەتشىلەر, قولونەرشىلەر قولىمەن جاسالعان بۇيىمدار مەن سۋرەتتەر قويىلىپ, اسپازدار ۇلتتىق تاعام تۇرلەرىن ۇسىندى. كوپشىلىكتىڭ نازارى تارى داقىلىنان جاسالعان 50-دەن استام تاعام ءتۇرى مەن ۇرشىق يىرگەن اجەلەرگە ءتۇستى, دەپ حابارلايدى Egemen.kz.
بيىلعى مامىردا قالا اكىمدىگى اقتوبە قالاسىنىڭ 156 جىلدىعىن تۇرعىنداردىڭ باسىن قوساتىن تانىمدىق شارا رەتىندە وتكىزۋ تۋرالى باستاما كوتەرگەن بولاتىن. باستاما جۇزەگە اسىپ, ەتنوفەستيۆالگە قاتىسۋعا مۇمكىندىك العان ون ەكى اۋداننىڭ ون ساۋساعىنان ونەرى تامعان شەبەرلەرى مەن قولونەرشىلەرى بۇرىن ۇسىنىلماعان بۇيىمدارىن قالا مەرەكەسىندە جارقىراتا كورسەتتى. اسىرەسە, «توقىما پاتي» الاڭىندا 156 اجە ۇرشىق ءيىرۋ, ءجۇن ءتۇتۋ مەن كيىز باسۋدان شەبەرلىك ساباعىن وتكىزىپ, جاستارعا ونەگە كورسەتتى. قازىرگى كەزدە قولدانىستان شىعىپ بارا جاتقان ۇرشىق ونەرىن قالاداعى «داستۇرگە جول» قوعامدىق ۇيىمى مەن «اجەلەر ءانسامبلىنىڭ» مۇشەلەرى جاڭعىرتىپ ءجۇر.
«گەولوگ» مادەنيەت ۇيىندە قۇرىلعان «شولپى» قىزدار كلۋبىنىڭ مۇشەلەرى شاش ءورۋدىڭ تۇرلەرىن كورسەتتى. وعان 156 بۇرىمدى قىز قاتىسىپ, اراسىنداعى ەڭ شاشى ۇزىن قىز «بۇرىمدى قىز –2025» كۋبوگىن جەڭىپ الدى. «ۇلتتىق اسپاپتار الاڭىندا» قازاقتىڭ كەڭ تانىلماعان ۇلتتىق اسپاپتارى ناسيحاتتالسا, قولونەرشىلەر قىشتان قۇمىرا جاساۋدان شەبەرلىك ساعاتىن وتكىزدى. قوناقتار ويىل اۋداندىق ونەر جانە ولكەتانۋ مۇراجايىنان اكەلىنگەن تارىشى شىعاناق بەرسيەۆتىڭ ەڭبەك قۇرالدارى مەن باسقا دا ەكسپوناتتارمەن تانىستى. كورمەگە شىعاناق زۆەنوسى وسىرگەن اق تارىنىڭ تۇرلەرى قويىلدى.
اقتوبە وبلىسى