قوستاناي وبلىسىندا وقۋشىلاردىڭ مەكتەپپەن قوشتاسۋ جيىندارى باستالدى. بيىل وڭىردە 4 700-دەن استام وقۋشى 11-ءشى سىنىپتى ءتامامدايدى. 228 وقۋشى «التىن بەلگىگە», 290 تۇلەك ۇزدىك اتتەستاتقا ۇمىتكەر.
بۇگىن قوستاناي قالاسىنداعى № 32 جايلى مەكتەپتىڭ 11-ءشى سىنىپ وقۋشىلارى التىن ۇيا مەكتەبىمەن قوشتاستى. سالتاناتتى ءىس-شاراعا اتا-انالار, سالا باسشىلارى, ءماسليحات دەپۋتاتتارى قاتىسىپ, ءومىردىڭ جاڭا ءبىر بەلەسىنە اياق باسقالى تۇرعان تۇلەكتەرگە اقىل-كەڭەستەرىن ايتىپ, ءسات-ساپار تىلەدى.
«سىزدەر مەملەكەت باسشىسى قاسىم-جومارت كەمەل ۇلى توقاەۆتىڭ تىكەلەي تاپسىرماسى بويىنشا سالىنعان زاماناۋي مەكتەپتە ءبىلىم الدىڭىزدار. بۇگىن وقۋلارىڭىزدى ءتامامداپ, مەكتەپپەن قوشتاسىپ, ءومىردىڭ جارقىن دا, قىزىق جاڭا كەزەڭىنە قادام باسقالى تۇرسىزدار. الدارىڭىزدا تالاي اسۋلار كۇتىپ تۇر. ماقساتقا جەتۋ جولىندا قيىندىقتان تايسالماڭىزدار. بويلارىڭىزداعى كۇش-قايراتتى, ءبىلىمدى يگى ماقساتقا جۇمساڭىزدار, العا ۇمتىلىڭىزدار. سىزدەر – وسى ەلدىڭ بولاشاعىسىزدار», دەدى وبلىستىق ءماسليحات توراعاسى سايلاۋبەك ەسجانوۆ.
ون ءبىر جىل بويى ءبىلىم نارىمەن سۋسىنداتىپ, لايىقتى ءتالىم-تاربيە بەرگەن التىن ۇيا مەكتەبىمەن قيماي-قيماي قوشتاسقان تۇلەكتەر دە ۇستازدارىنا العىس ايتىپ, ىزگى تىلەك ارنادى.
«مەكتەپ بىزگە ساپالى ءبىلىم, سانالى تاربيە بەردى. ءبىز مۇندا كۇردەلى تەڭدەۋلەردى شەشۋدى ۇيرەنىپ قانا قويماي, سونىمەن قاتار مەيىرىمدى, ادال ازامات بولۋدى ۇيرەندىك. مەكتەبىمىزدى, اياۋلى ۇستازدارىمىزدى قيمايمىز, ارينە. بۇگىن ول كىسىلەرگە باسىمىزدى ءيىپ تۇرىپ راحمەت ايتامىز. الداعى ۋاقىتتا بىزگە ارتقان سەنىمدەرىن اقتاپ, ەلىمىزدىڭ جاقسى ازاماتى بولۋعا ۇمتىلامىز», دەيدى مەكتەپ تۇلەگى بەكزات ءالحامحايىر.
سالتاناتتى ءىس-شارانىڭ سوڭىندا تۇلەكتەر ءداستۇرلى مەكتەپ ءۆالسىن بيلەدى.
قوستاناي وبلىسى