بيىل ەكرانعا 6 كينوجوبا, سونىڭ ىشىندە انيماتسيالىق جانە دەرەكتى فيلم شىعادى. الداعى جىلى – 2024 جىلى ىرىكتەلگەن 12 جوبا اياقتالادى. بۇل تۋرالى كەشە قازمەديا ورتالىعىندا قازاقستان كينويندۋسترياسىنىڭ دامۋىنا ارنالعان بريفينگتە مادەنيەت جانە اقپارات مينيسترلىگى مادەنيەت كوميتەتى كينەماتوگرافيا باسقارماسىنىڭ جەتەكشىسى عاني مۇراتوۆ مالىمدەدى.
«مەملەكەت باسشىسىنىڭ تاپسىرماسى بويىنشا كينەماتوگرافيا سالاسىندا اۋقىمدى جۇمىستار باستالدى. «قازاقفيلم» كينوستۋدياسىن نىعايتۋ جانە كونكۋرس وتكىزۋ جۇيەسىنىڭ اشىقتىعىن ارتتىرۋ ماقساتىندا زاڭناما جەتىلدىرىلىپ, ون جىلدىق دامۋ ستراتەگياسى ازىرلەنىپ جاتىر. 2024 جىلى ۇلتتىق فيلمدەردى مەملەكەتتىك قارجىلاندىرۋدىڭ تيىمدىلىگىن, اشىقتىعىن جانە رەنتابەلدىلىگىن قامتاماسىز ەتۋ ءۇشىن كينوجوبالاردى كونكۋرستىق ىرىكتەۋ تاسىلدەرى وزگەرتىلدى. جىل باسىندا كينو ورتالىعى باسىم تاقىرىپتاردى جاريالاپ – ونىڭ ىشىندە وتانسۇيگىشتىككە, ادامگەرشىلىككە, رۋحانيات پەن مادەنيەتكە تاربيەلەيتىن تاريحي فيلمدەرگە باسىمدىق بەرىلەدى. ساراپتامالىق كەڭەس ەندى ويىن, انيماتسيالىق, دەرەكتى جانە حرونيكالىق فيلمدەر بويىنشا جەكە سەكتسيالار تۇرىندە جۇمىس ىستەيدى. كونكۋرس ەكى كەزەڭنەن تۇرادى, قۇجات تاپسىرۋ ءراسىمى جەڭىلدەتىلدى», دەدى كينەماتوگرافيا باسقارماسىنىڭ باسشىسى.
بريفينگتە عاني مۇراتوۆ پروكات جانە ديستريبۋتسيا ماسەلەسىنە دە توقتالدى.
ء«وندىرىسى اياقتالىپ, پروكاتقا ارنالعان 54 كوركەم ءفيلمنىڭ 34-ءى ەكرانعا شىقتى. 2024 جىلدىڭ وزىندە 5 ۇلتتىق فيلم كەڭ پروكاتقا شىعىپ, جىل سوڭىنا دەيىن تاعى 10 فيلم كورەرمەنگە جول تارتادى. بۇگىندە 2025 جىلعا ارنالعان جاڭا كونكۋرس جاريالاندى. مەملەكەتتىك قولداۋ ءبىرىنشى كەزەكتە كوممەرتسيالىق تابىسقا ەمەس, فيلمدەردىڭ ساپاسى مەن الەۋمەتتىك-اعارتۋشىلىق ميسسياسىنا باعىتتالعان. باسىم باعىتتارعا جاس رەجيسسەرلەردى (قىسقامەتراجدى فيلمدەرگە دەيىن), اۆتورلىق جانە دەرەكتى كينونى, سونداي-اق انيماتسيانى قولداۋ كىرەدى», دەدى ول.
«قازاقفيلم» كينوستۋدياسى مالىمەتىنشە, 2024 جىلى «قازاقفيلم» كەيىنگى 7 جىلدا العاش رەت ءوزىن-ءوزى اقتايتىن ۇيىمعا اينالعان. 15 جىلدان بەرى العاش رەت كينوستۋديادا دەمەۋشىلەر ەسەبىنەن كوسمەتيكالىق جوندەۋ جۇمىستارى باستالىپتى. سونىمەن قاتار كينوستۋديا فيلمدەردى ديستريبۋتسيالاۋ جانە كوبەيتۋ, التىن قورداعى فيلمدەردى تسيفرلىق رەستاۆراتسيالاۋ, شەتەلدە قازاق كينوسى كۇندەرىن وتكىزۋ, «قازاقانيماتسيا» شىعارماشىلىق بىرلەستىگىنىڭ جۇمىسىن قامتاماسىز ەتۋ بويىنشا مەملەكەتتىك قولداۋ الادى. بىلتىر كينوستۋدياعا 903,2 ملن تەڭگە بولىنسە, بيىل 926,7 ملن تەڭگە قاراستىرىلعان.
سونداي-اق سپيكەر «قازاق انيماتسيا» ءبولىمىنىڭ استاناعا كوشۋىنە بايلانىستى دا پىكىر ءبىلدىردى. ء«بارىمىز بىلەتىندەي, يننوۆاتسيالىق تەحنولوگيالاردى ەنگىزۋ جانە كرەاتيۆتى جوبالاردى قارجىلاندىرۋ ۇدەرىستەرى ەلوردادا بەلسەندى ءجۇرىپ جاتىر. استانادا جىل سايىن تمد ەلدەرىنىڭ گيك-مادەنيەت فەستيۆالى – «Comic Con» وتەدى, كرەاتيۆ يندۋستريالار قورى اشىلماق. سونداي-اق, ەلوردادا «حابار», «قازاقستان», بالالار مەن جاسوسپىرىمدەرگە ارنالعان جالعىز مەملەكەتتىك ارنا – «بالاپان» سياقتى ءىرى تەلەارنالار ورنالاسقان. «قازاق انيماتسيا» وسى ينفراقۇرىلىم مەن رەسۋرستاردى ءتيىمدى پايدالانىپ, انيماتسيا سالاسىن دامىتۋعا ءتيىس», دەيدى عاني مۇراتوۆ.
«قازاقفيلم» ۇلتتىق كينوستۋدياسى پرەزيدەنتىنىڭ مىندەتىن ۋاقىتشا اتقارۋشى ايدار وماروۆ مەكەمەنىڭ اعىمدىق جۇمىستارى جونىندە باياندادى.
ۇلتتىق كينونى قولداۋ مەملەكەتتىك ورتالىعىنىڭ باسقارما توراعاسى قۇرمانبەك جۇماعالي ستسەناري قابىلداۋداعى بايقاۋ بارىسىنا, وتكىزىلۋ تارتىبىنە, ادىلەتسىزدىك جىبەرمەۋگە تىرىسىپ باعاتىنى تۋرالى ايتتى. ول تۇرعىدا جۇمىس مەيلىنشە جەڭىلدەتىلگەن جانە الالاۋ جوق كورىنەدى.
ء«جيى تالقىلاناتىن ماسەلە – قازاق كينوسى قاشان داميدى دەگەن سۇراق. ءبارىمىزدى الاڭداتاتىن ماسەلە. ستاتيستيكاعا كوز جۇگىرتسەك, 2019 جىلدان بەرى مينيسترلىك پەن كينو ورتالىعىنىڭ قولداۋىمەن 117 جوبا جۇزەگە استى. ونىڭ 55-ءى – تولىقمەتراجدى فيلم. سول 55 ءفيلمنىڭ 40-ى بۇگىنگە دەيىن پروكاتقا شىقتى. بىراق كورەرمەن سول كينونى تاماشالادى ما, جوق پا – بۇل باسقا اڭگىمە. مىسالى, وتكەن جىلى ءتۇسىرىلىمى 2019 جىلى باستالعان ءۇش ءىرى جوبا ەكرانعا شىقتى. ولار – «قاجىمۇقان», «جاڭا ءداۋىر», «احمەت. سوڭعى كۇن». بۇل – اۋقىمدى جوبالار. مۇنداي كارتينالار – ۇلتقا قىزمەت ەتەتىن, وسكەلەڭ ۇرپاقتىڭ تاربيەسىنە اسەر ەتەتىن تۋىندىلار. سوندىقتان بۇل فيلمدەرگە بولىنەتىن قاراجاتتى ينۆەستيتسيا ەمەس, مەملەكەتتىك گرانت رەتىندە ۇسىنامىز. ياعني «نەگە اقشا قايتپاي جاتىر؟» دەپ سۇرامايمىز. كينو تۇسىرىلگەننەن كەيىن ءبىز سول كومپانياعا ليتسەنزيالىق قۇقىق بەرەمىز. ولار سول قۇقىقپەن فەستيۆالدارعا قاتىسادى, پروكاتقا شىعارادى. ال پروكاتتاعى تابىستىڭ 80 پايىزى سول كومپانيانىڭ ەنشىسىنە تيەسىلى بولادى. بۇل دەگەنىمىز — مەملەكەت كينو تۇسىرۋگە اقشا بولەدى, بىراق ودان قايتارىم تالاپ ەتپەيدى دەگەن ءسوز. بۇل مەملەكەت تاراپىنان جاسالىپ وتىرعان ۇلكەن مۇمكىندىك ەمەس پە؟», دەدى قۇرمانبەك جۇماعالي.