گازەتىمىزدىڭ وتكەن سانىندا پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا باستاپ, دەنساۋلىق ساقتاۋ مينيسترلىگىنىڭ قولداۋىمەن رەپرودۋكتيۆتى دەنساۋلىق اپتالىعى ءوتىپ جاتقانىن حابارلاعان ەدىك. ەندى, مىنە, ۇلت ساۋلىعىنا, ۇرپاق اماندىعىنا ۇندەگەن اپتالىقتىڭ قورىتىندىسى جاريالاندى.
اپتالىق بارىسىندا ەلىمىزدىڭ بارلىق ايماعىنداعى تۇرعىندار رەپرودۋكتيۆتى دەنساۋلىق, ينفەكتسيالىق اۋرۋلاردىڭ پروفيلاكتيكاسى, وتباسىن جوسپارلاۋ, اتا-انا جاۋاپكەرشىلىگى جونىندە ءبىلىمىن ارتتىردى. سالاماتتى ءومىردى ناسيحاتتايتىن ءىس-شارالارعا جاستار, رەپرودۋكتيۆتى جاستاعى ايەلدەر مەن ەرلەر, اتا-انالار كوپتەپ قاتىستى. ەمحانالار مەن جاستار دەنساۋلىعى ورتالىقتارى اشىق ەسىك كۇندەرىن وتكىزدى. تۇرعىندار, اسىرەسە جاستار دارىگەرلەردەن تەگىن كەڭەس الدى. جاسوسپىرىمدەر, جاستار جانە اتا-انالار وتباسىن جوسپارلاۋ, جىنىستىق جولمەن بەرىلەتىن ينفەكتسيالاردىڭ, ادام پاپيللوماسى ۆيرۋسىنىڭ پروفيلاكتيكاسى تاقىرىبىندا وتكەن ءدارىس, سەمينارلارعا قاتىستى. مەكتەپ, كوللەدج, جوعارى وقۋ ورىندارىندا تاقىرىپ توڭىرەگىندە ارنايى ساباقتار ءوتتى.
دەنساۋلىق ساقتاۋ مينيسترلىگىنىڭ اقپاراتىنشا, وسى كۇندەرى رەسپۋبليكا كولەمىندە 14 350 ءىس-شارا وتكەن. وعان 358 498 تۇرعىن قاتىسقان. ونىڭ ىشىندە 83 389 ەر ادام بولسا, 157 476 ايەل جانە 117 633 ءجاسوسپىرىم بار. گينەكولوگ, ۋرولوگ, ينفەكتسيونيستەر جانە باسقا دا مامانداردىڭ قاتىسۋىمەن 3 636 اعارتۋشىلىق كەزدەسۋ مەن ءدارىس وتكەن. اقپارات قۇرالدارىندا 238 ساراپتامالىق ماتەريال, سۇحبات پەن بايانداما جاريالانعان. رەپرودۋكتيۆتى دەنساۋلىق تاقىرىبىنداعى ءىس-شارالارعا بەلسەندى قاتىسقان ايماقتاردىڭ الدىندا الماتى, استانا قالالارى, اقتوبە, تۇركىستان جانە قاراعاندى وبلىستارى تۇر.
اپتالىقتا ءاربىر كۇن ناقتى ءبىر تاقىرىپقا ارنالادى. مىسالى ءبىر كۇن وتباسىن جوسپارلاۋ تاقىرىبى اياسىندا ءىس-شارالار وتسە, ەكىنشى كۇن ايەلدەر دەنساۋلىعى تاقىرىبىنا ارنالدى. سونىمەن قاتار ەرلەر دەنساۋلىعى, جاستار دەنساۋلىعى, جىنىستىق جولمەن بەرىلەتىن ينفەكتسياعا قارسى ءىس-قيمىل, ادام پاپيللوماسى ۆيرۋسىنا قارسى ءىس-شارالار ءوز الدىنا ۇيىمداستىرىلدى. اقپاراتتاندىرۋ جۇمىستارى بارىسىندا دەنساۋلىق سالاسىنداعى ماماندار جاستار مەن جاسوسپىرىمدەرگە ەكپىن قويدى. ساناۋلى كۇندە 117 مىڭنان استام بالا اۋرۋلاردىڭ پروفيلاكتيكاسى تۋرالى سەنىمدى اقپاراتقا قانىقتى. دارىگەرلەر مەكتەپ, كوللەدجدەردە عانا ەمەس, الەۋمەتتىك جەلىلەر مەن تەلەارنالار ارقىلى دا اقپاراتتاندىرۋعا ارالاستى. اپتالىقتىڭ قورىتىندىسى تاياعاندا دەنساۋلىق ساقتاۋ ءمينيسترى اقمارال ءالنازاروۆا دارىگەرلەرگە العىس ايتتى.
«رەپرودۋكتيۆتى دەنساۋلىق مادەنيەتىن جانە پروفيلاكتيكالىق مەديتسينانى دامىتۋ – بولاشاق ۇرپاقتىڭ دەنساۋلىعىنا قوسقان ەڭ ماڭىزدى ۇلەس. بارلىق وڭىرگە, مەديتسينا قىزمەتكەرلەرىنە, ارىپتەستەر مەن باق-قا اپتالىققا بەلسەندى قاتىسقانى ءۇشىن العىس بىلدىرەمىز. رەپرودۋكتيۆتى دەنساۋلىق اپتالىعى مەملەكەت, دەنساۋلىق ساقتاۋ جۇيەسى مەن قوعامنىڭ كۇشىن بىرىكتىرەتىن جىل سايىنعى باستاماعا اينالادى», دەدى اقمارال ءالنازاروۆا.
قورىتا كەلە, دەنساۋلىق ساقتاۋ مينيسترلىگى حالىقتىڭ رەپرودۋكتيۆتى دەنساۋلىعىن جاقسارتۋعا باعىتتالعان بىرنەشە باعدارلاما مەن جوبانى ۇيلەستىرىپ جاتقانىن ايتا كەتكەنىمىز دۇرىس بولار. بۇگىندە وڭىرلەردە 103 جاستار دەنساۋلىعى ورتالىعى اشىلدى. بالالار گينەكولوگياسىن دامىتۋ جونىندە 2026 جىلعا دەيىن جول كارتاسى بەكىتىلگەن. بالالار گينەكولوگتەرىن قايتا دايارلاۋ ءۇشىن بىلىكتىلىكتى ارتتىراتىن كۋرستار ءوتىپ جاتىر. اۋىل-ايماقتاردا گينەكولوگيالىق اۋرۋلارى بار جاسوسپىرىمدەرگە ءتيىستى مەديتسينالىق كومەك كورسەتۋ باعىتى جولعا قويىلعان. رەپرودۋكتيۆتى دەنساۋلىق اپتالىعىندا مەديتسينا ماماندارى اقپاراتتاندىرۋمەن عانا شەكتەلمەدى, وسى باعىتتاعى جۇمىستاردى تاعى كۇن تارتىبىنە شىعارىپ, شيراتىپ الدى.