ەڭ كىشكەنتاي پوليتسەي

قاراعاندى وبلىسىندا جول قوزعالىسى قاۋىپسىزدىگىن قامتاماسىز ەتۋگە 8 جاستاعى نۇراسىل تولەگەنوۆ قوسىلدى. جول ەرەجەلەرىن جەتىك مەڭگەرگەن بالاقاي الەۋمەتتىك جەلى قولدانۋشىلارى اراسىندا كەڭىنەن تانىمال.

ول قاراعاندى-الماتى باعىتىنداعى رەسپۋبليكالىق ماڭىزى بار تاسجولدا پوليتسيا قىزمەتكەرلەرىمەن بىرگە جۇرگىزۋشىلەرگە ءتۇسىندىرۋ جۇمىستارىن جۇرگىزدى. نۇراسىل لەيتەنانت شەنىن تاعىپ, ارنايى كيىم كيىپ, ءتارتىپ ساقشىلارىمەن قاتار قىزمەت ەتتى. ول جۇرگىزۋشىلەرگە جول-كولىك وقيعالارىنىڭ الدىن الۋ ءۇشىن باستى ەرەجەلەردى ءتۇسىندىرىپ, جىلدامدىقتى اسىرماۋ, قارسى باعىتقا شىقپاۋ جانە جولدا دەمالىستى ەسكەرۋسىز قالدىرماۋ قاجەتتىگىن ەسكەرتتى. پوليتسيا بولۋدى ارماندايتىن نۇراسىلدىڭ بۇل قىزىعۋشىلىعى بەكەر ەمەس, ونىڭ اكەسى دە پاترۋلدىك پوليتسيا باتالونىنىڭ قاتارىندا قىزمەت اتقارادى.

– قازىرگى تاڭدا جول قوزعالىسى قاۋىپسىزدىگى – كۇن تارتىبىندەگى ەڭ وزەكتى ماسەلەلەردىڭ ءبىرى. جاز مەزگىلىندە قاراعاندى ك بالقاش باعىتى بويىنشا كولىك اعىنى كۇرت ارتادى. وسىعان بايلانىستى اتالعان جولدا پوليتسيا ناريادتارىنىڭ سانىن ارتتىردىق. بۇرىن بۇل باعىتتا 17 اۆتوپاترۋل جۇمىس ىستەسە, قازىر ولاردىڭ سانى 30-عا جەتكىزىلدى. ءار پاترۋل بەكەتىنىڭ اراقاشىقتىعى شامامەن 10 شاقىرىم, – دەيدى پاترۋلدىك پوليتسيا باتالونىنىڭ كومانديرى مەدەت نۇرمۇحانوۆ.

ايتا كەتەيىك, 2025 جىلدىڭ باسىنان بەرى قاراعاندى وبلىسىندا 34 جول-كولىك وقيعاسى تىركەلىپ, ونىڭ سالدارىنان 16 ادام كوز جۇمىپ, 51 ازامات ءتۇرلى دەنە جاراقاتىن العان. سونىمەن قاتار رەسپۋبليكالىق ماڭىزى بار تاسجولداردا 25 جۇرگىزۋشى ماس كۇيىندە كولىك تىزگىندەگەنى ءۇشىن ۇستالعان.قوعامدىق قاۋىپسىزدىككە ءۇن قوسقان ەڭ جاس پوليتسەيدىڭ باستاماسى – بارشاعا ۇلگى. بۇل ءىس-شارا تۇرعىندار اراسىندا قۇقىقتىق مادەنيەتتى ارتتىرۋعا باعىتتالعان ءىس-شارالاردىڭ ءبىر بولىگى رەتىندە ۇيىمداستىرىلدى.