سەركە قوجامقۇلوۆ اتىنداعى جەزقازعان قازاق مۋزىكالىق دراما تەاترىندا ۇلى جازۋشى ش.ايتماتوۆ پوۆەسى جەلىسىمەن جازىلعان «تەڭىز جاعالاي جۇگىرگەن تارعىل توبەت» سپەكتاكلىنىڭ الدىن الا كورسەتىلىمى ءوتتى, دەپ جازادى Egemen.kz.
قويىلىمدى ساحنالاعان بەلگىلى رەجيسسەر تالعات تەمەنوۆ. شىعارماعا ءبىر وتباسىنىڭ باسىنا تۇسكەن قيىندىق ارقاۋ بولادى. تەڭىزگە شىققان ولار داۋىلعا تاپ بولىپ, ءومىر مەن ءولىمنىڭ تارازاسىنا ءتۇسىپ قالادى.
ۇرپاعىنىڭ اماندىعىن ويلاعان دانا قارت ءشول قىسقانىنا قاراماستان ءبىر ۇرتتام سۋدى اۋزىنا الماي, ۇرپاعىن امان ساقتاپ قالۋ ءۇشىن قاراڭعى تۇندە سۋعا سەكىرىپ كەتەدى. اقساقالدىڭ ەكى ۇلى دا سۋدان تاتىپ المادى. تىرشىلىك تىنىسى نەمەرەگە بۇيىرادى.
ۇرپاق جالعاستىعىن دارىپتەگەن شىڭعىس ايتماتوۆتىڭ «تەڭىز جاعالاعان تارعىل توبەت» پوۆەسى ۇلى شىعارمالاردىڭ ءبىرى ءارى بىرەگەيى. ويتكەنى بۇل قۇندى دۇنيە بولاشاق ۇرپاق ءۇشىن جاسالعان دۇنيە. سپەكتاكل كەز كەلگەن كورەرمەنگە وي سالادى. سەبەبى مۇندا ەرتەڭگى كۇننەن ءۇمىتتى جوعالتپاۋ, ادامدى ءسۇيۋدىڭ ەڭ تاماشا ۇلگىسى بار.
قازاقستاننىڭ حالىق ءارتىسى تالعات تەمەنوۆ:
«جالپى ايتماتوۆ الەم ادەبيەتىندەگى ەڭ ويشىل جازۋشىنىڭ ءبىرى. سوندىقتان بۇل شىعارما كوپ تەاترلاردا قويىلمايدى. سەبەبى ساحنالىق قويىلىمى وتە كۇردەلى. سوعان قاراماستان ءبىز سەركە قوجامقۇلوۆ اتىنداعى تەاترعا وسى قويىلىمدى اكەلدىك. بۇل تەاتردا ۇلكەن ارتىستەر بار. سونىڭ ءبىرى قازاقستاننىڭ حالىق ءارتىسى دوسجان جانبوتاەۆ. وسى تەاترعا كوپتەن بەرى كوپ ۇلكەن رەجيسسەرلار كەلمەگەن. سوندىقتان وسى تۋىندىنىڭ ساحنالانۋى جەرگىلىكتى تەاتر ارتىستەرى, تالانتتى جاستار ءۇشىن ۇلكەن مەكتەپ دەسە بولادى. ناقتىراق ايتقاندا ايتماتوۆتىڭ اكادەمياسىنان ءوتۋ ارتىستەر ءۇشىن ۇلكەن مۇمكىندىك», دەيدى.
قويىلىمدا تەاتردىڭ ارتىستەرىنەن باسقا جەرگىلىكتى كوللەدج ستۋدەنتتەرى, مەكتەپ وقۋشىلارى دا وينايدى. بالالاردى ساحنادا ويناتۋ قيىن بولسا دا رەجيسسەر تالعات تەمەنوۆ وسى سالماقتى ءوز موينىنا العان.
سپەكتاكلدىڭ پرەمەراسى مامىر ايىنىڭ 27 كۇنى شىمىلدىعىن اشادى.