ەگەمەندىك العان تۇستان بەرى ەلىمىزگە 1 ملن 151 مىڭنان استام قانداس ورالعان. ولار قازىر ءار سالادا ەڭبەك ەتىپ, ەلدىڭ رۋحانياتىنا, ەكونوميكاسىنا لەپتى ۇلەس قوسىپ كەلەدى.
جىل باسىنان بەرى 3 203 قازاق تاريحي وتانىمەن تابىسىپ, قانداس مارتەبەسىن الىپتى. قانداستاردىڭ جارتىسىنا جۋىعى, ياعني, 48,1%-ى قىتايدان ورالعان. سول سەكىلدى 39,5%-ى – وزبەكستاننان, 5,8%-ى – تۇرىكمەنستاننان, 2,5%-ى – موڭعوليادان كەلگەن. رەسەيدەن قونىس اۋدارعانداردىڭ ۇلەسى – 1,9%, تاعى 2,2% قازاق باسقا ەلدەردەن كەلگەن. مامىرعا دەيىنگى ستاتيستيكا بويىنشا ەڭبەككە قابىلەتتى جاستاعى قونىس اۋدارۋشىلار سانى – 60,7%. ەڭبەككە قابىلەتتى جاستان كىشىلەر, ياعني بالالار – 31,1%, زەينەتكەرلەر 8,2%-دى قۇرايدى. ەڭبەككە قابىلەتتى جاستاعى قانداستاردىڭ ىشىندە جوعارى ءبىلىمى بارلار – 17,9%. ورتا كاسىبي ءبىلىمى بار ازاماتتار – 27,8%, 52,9%-ى ورتا ءبىلىمدى, 1,4%-نىڭ ءبىلىمى جوق.
قونىس اۋدارعاندار رەسپۋبليكانىڭ بىرنەشە ايماعىنا تۇراقتاعان. قانداستاردى قونىستاندىرۋعا ەڭبەك كۇشى تاپشى وڭىرلەر ارنايى انىقتالعان. ولار – اقمولا, اباي, قوستاناي, پاۆلودار, اتىراۋ, باتىس قازاقستان, شىعىس قازاقستان, سولتۇستىك قازاقستان وبلىستارى. اتالعان وڭىرلەردە بيىل قانداستاردى قابىلداۋ كۆوتاسى 2 309 ادامدى قۇرايدى. بۇگىنگە دەيىن وسى ولكەلەرگە 642 قانداس قونىس اۋدارىپ, كۆوتا العان.
قانداستاردىڭ كوشۋىنە سۋبسيديا تۇرىندە مەملەكەتتىك قولداۋ شارالارى ۇسىنىلادى. ءبىر مەزگىلدە وتاعاسىنا, وتباسىنىڭ ءاربىر مۇشەسىنە 70 اەك (275,2 مىڭ تەڭگە) مولشەرىندە جاردەماقى بەرىلەدى. تۇرعىن ءۇي جالداۋعا, كوممۋنالدىق قىزمەتتەرگە ءبىر جىلعا دەيىن 15-تەن 30 اەك (59-دەن 118 مىڭ تەڭگەگە دەيىن) مولشەرىندە تولەم جاسالادى. جالپى, جىل باسىنان بەرى 147 قانداسقا ءتۇرلى قولداۋ شارالارى كورسەتىلگەن. 94 ادام تۇراقتى جۇمىسقا ورنالاسقان.