بيىل قوستانايدا وڭتۇستىك كورەيانىڭ KIA اۆتوكولىك زاۋىتى اشىلادى. كاسىپورىننىڭ جوبالىق قۋاتتىلىعى جىلىنا 70 مىڭ اۆتوكولىككە دەيىن جەتەدى, دەپ جازادى Egemen.kz.
وسىعان بايلانىستى احمەت بايتۇرسىن ۇلى اتىنداعى قوستاناي وڭىرلىك ۋنيۆەرسيتەتى (قوۋ) مەن Dong-Eui University اراسىنداعى اكادەميالىق سەرىكتەستىكتىڭ جاڭا كەزەڭى باستالادى. بيىلعى وقۋ جىلىنىڭ باسىندا ەكى جوعارى وقۋ ورنى اراسىندا قوس ديپلومدى ءبىلىم بەرۋ تۋرالى كەلىسىمشارت جاسالعان.
«قىركۇيەك ايىنان باستاپ ءبىز اۆتوموبيل ينجەنەرياسى بويىنشا قوس ديپلوم باعدارلاماسىن جۇزەگە اسىرا باستايمىز. العاشقى ءۇش سەمەستر ستۋدەنتتەر قوستانايدا وقيدى, ءتورتىنشى مەن التىنشى سەمەسترلەردى كورەيادا جالعاستىرادى. ودان كەيىن ستۋدەنتتەر قوستانايعا تاجىريبەدەن وتۋگە ورالادى», دەدى Dong-Eui University حالىقارالىق بايلانىستار جونىندەگى پرورەكتورى لي يم گون.
قازىرگى ۋاقىتتا قوۋ بەس ستۋدەنتى وڭتۇستىك كورەيانىڭ پۋسان قالاسىنداعى Dong-Eui University-دە ءبىلىم الىپ جاتىر. Dong-Eui – كورەيانىڭ ەڭ كونە جەكەمەنشىك جوعارى وقۋ ورىندارىنىڭ ءبىرى. ۋنيۆەرسيتەت ماشينا جاساۋ سالاسىندا ۇلكەن تاجىريبەگە يە جانە الەمگە تانىمال Hyundai اۆتوكورپوراتسياسىمەن تىعىز ىنتىماقتاستىقتا جۇمىس ىستەيدى.
2023 جىلى ەكى جوعارى وقۋ ورنى اراسىندا ىنتىماقتاستىق تۋرالى مەموراندۋمعا قول قويىلعان بولاتىن. وسى قۇجات اياسىندا بيىل وڭتۇستىك كورەيادا ستۋدەنتتەردىڭ ءۇشىنشى لەگى وقىپ جاتىر. قوستانايلىق ستۋدەنتتەر بۇل جەردە كاسىبي ءبىلىم الىپ, تاجىريبەدەن ءوتىپ, كورەي ءتىلىن مەڭگەرىپ شىعادى. بۇعان دەيىنگى ەكى لەككە قاتىسقان ستۋدەنتتەر قازىرگى تاڭدا قوستانايداعى اۆتوكلاستەر كاسىپورىندارىندا جۇمىس ىستەپ ءجۇر.
ء«بىز قازىر گيدرومەحانيكانى وقىپ جاتىرمىز. بۇل ءبىز ءۇشىن جاڭا جانە وتە قىزىق ءپان. سونىمەن قاتار جاساندى ينتەللەكتتى مەڭگەرۋدەمىز. ءۇشىنشى ءپان – capstone design, ياعني اۆتوموبيل بولشەكتەرىن جوبالاۋ. بۇل پاندەر ارقىلى ءبىز ماماندىعىمىزعا قاجەت اسا ماڭىزدى داعدىلاردى قالىپتاستىرامىز», دەيدى قوۋ ستۋدەنتى ديار سەرتاەۆ.