ءداستۇرلى ونەردىڭ دامۋىنا ەلەۋلى ۇلەس قوسىپ كەلە جاتقان ونەر مايتالمانى, قر مادەنيەت قايراتكەرى, ونەرتانۋ عىلىمدارىنىڭ ماگيسترى ەربولات شالدىبەكوۆكە «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعى بەرىلدى, دەپ حابارلايدى Egemen.kz.
ەربولات زامانبەك ۇلى شالدىبەكوۆ — 1977 جىلى 5 مامىردا الماتى وبلىسى, ۇيعىر اۋدانىنا قاراستى اقتام اۋىلىندا دۇنيەگە كەلگەن. جاستايىنان ءان ونەرىنە جاقىن بولىپ وسكەن ول 1995–1998 جىلدارى ج.ەلەبەكوۆ اتىنداعى رەسپۋبليكالىق ەسترادا جانە تسيرك كوللەدجىندە, ودان سوڭ قۇرمانعازى اتىنداعى قازاق ۇلتتىق كونسەرۆاتورياسىندا ءبىلىم الىپ, ءداستۇرلى ءان ونەرىنىڭ كاسىبي وكىلى رەتىندە قالىپتاستى. كەيىننەن وسى وقۋ ورنىندا ماگيستراتۋرانى ءتامامداپ, ونەرتانۋ عىلىمدارىنىڭ ماگيسترى دارەجەسىن يەلەندى.
1994 جىلدان باستاپ ونەر جولىن باستاعان ونەرپاز ەل ىشىندە ءداستۇرلى ونەردىڭ دارىپتەۋشىسى رەتىندە كەڭىنەن تانىلدى. بۇگىندە قازاق ۇلتتىق ونەر ۋنيۆەرسيتەتىندە ءداستۇرلى ءان كافەدراسىندا ۇستازدىق قىزمەتتە جانە ر.باعلانوۆا اتىنداعى «قازاقكونتسەرت» مەملەكەتتىك-اكادەميالىق كونتسەرتتىك ۇيىمىندا سوليست بولىپ ەڭبەك ەتۋدە.
ونەر يەسىنىڭ شىعارماشىلىق جەتىستىكتەرى دە از ەمەس. ول — كەنەن ازىرباەۆ, جۇسىپبەك ەلەبەكوۆ اتىنداعى رەسپۋبليكالىق بايقاۋلاردىڭ لاۋرەاتى, حالىقارالىق “شابىت” فەستيۆالىنىڭ جەڭىمپازى. «قازاقتىڭ مىڭ ءانى», «قازاقتىڭ باتىرلىق داستاندارى» سياقتى ۇلتتىق جيناقتارعا بىرنەشە شىعارماسى ەنگەن. EXPO–2017 حالىقارالىق كورمەسى, «استانا ارقاۋى», «قورقىت جانە ۇلى دالا سازى», « ۇلى دالا ويىندارى» سياقتى اۋقىمدى مادەني شارالاردا ونەر كورسەتىپ, ءداستۇرلى ءان ونەرىنىڭ ناسيحاتتالۋىنا ۇلكەن ۇلەس قوستى.
بۇعان دەيىن ول «قازاقستان رەسپۋبليكاسىنىڭ مادەنيەت قايراتكەرى» اتاعىنا, ءتۇرلى گراموتالار مەن ماراپاتتارعا يە بولعان.
ەندى مىنە, ۇلتتىق ونەردى ۇلىقتاپ, ۇرپاققا جەتكىزۋدەگى ەرەن ەڭبەگى ەلەنىپ, «قازاقستاننىڭ ەڭبەك سىڭىرگەن قايراتكەرى» اتاعى بەرىلىپ وتىر. بۇل — ءانشى شىعارماشىلىعىنىڭ عانا ەمەس, تۇتاس ءداستۇرلى ونەردىڭ باعالانۋىنىڭ ايقىن كورىنىسى.