تالدىقورعاندا شەرزات پولاتتىڭ ولىمىنە قاتىستى اتىشۋلى قىلمىستىق ءىستىڭ سوت وتىرىسى جالعاسىپ جاتىر. قوعام نازارىن اۋدارتقان بۇل وقيعادا باستى سوتتالۋشى رەتىندە تانىلعان ابزال شىناسىل تىڭ مالىمدەمە جاسادى. ول مارقۇمنىڭ اعاسى نۇرعانات گايپباەۆتى پىشاقتاعانىن سوت زالىندا اشىق مويىندادى. ايتا كەتەرلىگى, شىناسىل ءوزىنىڭ بەت-بەينەسىن تىكەلەي ەفيردە كورسەتۋگە قارسى بولمادى, دەپ حابارلايدى Egemen.kz.
سوت پروتسەسى بارىسىندا بەلگىلى بولعانداي, تەرگەۋ كەزىندە ول شەرزات پولاتتى ولتىرگەنىن مويىنداپ, الدىن الا جاۋابىن بەرگەن. الايدا بۇگىنگى وتىرىستا ول بۇل مالىمدەمەسىنەن باس تارتتى. ونىڭ ايتۋىنشا, مۇنداي شەشىمدى سوتتالۋشى شىڭعىس بەلعوجاەۆپەن اقىلداسا وتىرىپ قابىلداعان. شىناسىلدىڭ سوزىنشە, جازانى جەڭىلدەتۋ ماقساتىندا شەرزاتتىڭ ءولىمىن ءوز موينىنا الۋعا كەلىسىپ, سونىڭ نەگىزىندە جالعان جاۋاپ بەرگەن.
سونىمەن قاتار, نۇرعانات گايپباەۆتى پىشاقتاعانىن دا شىن مانىندە ءوزى ەمەس, سول كەزدە شىڭعىس بەلعوجاەۆتىڭ «پىشاقتى مەن تىقتىم» دەپ تەرگەۋ ورگاندارىنا جالعان كۋالىك بەرگەنى ءمالىم بولدى.
سوت پروتسەسى باستالعالى بەرى 9 سوتتالۋشىنىڭ 8-ءى تەرگەلدى. ال قالعان ءبىر سوتتالۋشى — ديدار قالياحمەت — الدىڭعى وتىرىستا جاۋاپ بەرۋگە پسيحولوگيالىق تۇرعىدا دايىن ەمەس ەكەنىن ايتىپ, ۋاقىت سۇراعان بولاتىن.
قازىرگى تاڭدا شەرزات پولاتتى ناقتى كىم ولتىرگەنى ءالى دە بەلگىسىز كۇيدە قالىپ وتىر. ويتكەنى سوتتالۋشىلاردىڭ ەشقايسى بۇل قىلمىستى تولىق مويىنداعان جوق. ءىس ماتەريالدارى مەن تەرگەۋ بارىسى بويىنشا قايشىلىقتار كوپ. وسىعان بايلانىستى سوت وتىرىسى بۇگىن تۇستەن كەيىن قايتا جالعاساتىن بولادى.
بۇل ءىس قوعامدا ۇلكەن رەزونانس تۋدىرعاندىقتان, جۇرتشىلىق تا, باق وكىلدەرى دە سوت بارىسىن ءجىتى باقىلاپ وتىر. ال شىندىقتىڭ بەتى قاشان اشىلارى ازىرگە بەلگىسىز.