قازاقستان رەسپۋبليكاسى حالىقارالىق قايتا قۇرۋ جانە دامۋ بانكىنەن (حقدب) 46,3 ميلليارد تەڭگە كولەمىندە قارىز الۋدى جوسپارلاپ وتىر. ءماجىلىس بۇل كەلىسىمدى راتيفيكاتسيالاۋ تۋرالى قورىتىندىنى ازىرلەۋگە كىرىستى, دەپ حابارلايدى Egemen.kz.
بۇل قارىز «ينكليۋزيۆتى ەكونوميكا ءۇشىن جەدەل تسيفرلاندىرۋ» جوباسى اياسىندا بەرىلەدى. كەلىسىم 2024 جىلدىڭ جەلتوقسانىندا حقدب مەن قازاقستان ۇكىمەتى اراسىندا جاسالعان بولاتىن. قارىز سوماسى 13,083 ميلليارد جاپون يەنىنە, ياعني قازىرگى باعام بويىنشا 46,3 ميلليارد تەڭگەگە تەڭ.
قارىزدى وتەۋ مەرزىمى - 12 جىل, ونىڭ ىشىندە 2028 جىلدىڭ 15 ساۋىرىنە دەيىنگى جەڭىلدىك كەزەڭى قاراستىرىلعان. سونىمەن قاتار:
ءبىر جولعى كوميسسيا مولشەرى – قارىز سوماسىنىڭ 0,25%-ىن قۇرايدى;
رەزەرۆتەۋ كوميسسياسى – جىلىنا 0,25%, پايدالانىلماعان قاراجات قالدىعىنا ەسەپتەلەدى.
بۇعان دەيىن حابارلانعانداي, قازاقستان بيۋدجەت تاپشىلىعىن جابۋ ءۇشىن ازيا دامۋ بانكى مەن ازيا ينفراقۇرىلىمدىق ينۆەستيتسيالار بانكiنەن جالپى سوماسى 336 ميلليارد تەڭگە كولەمىندە ەكى قارىز الۋدى جوسپارلاپ وتىر.