وسكەمەندە پارلامەنت سەناتى قارجى جانە بيۋدجەت كوميتەتى دەپۋتاتتارىنىڭ قاتىسۋىمەن وتكەن مەملەكەت-جەكەمەنشىك سەرىكتەستىگىن دامىتۋ ماسەلەلەرىنە ارنالعان دوڭگەلەك ۇستەلدە شىعىس قازاقستانداعى وسى باعىتتا جۇزەگە اسىپ جاتقان جوبالاردىڭ دەنى ءبىلىم سالاسىنا قاتىستى ەكەنى ايتىلدى.
سەنات دەپۋتاتتارى, ۇلتتىق ەكونوميكا مينيسترلىگىنىڭ باسشىلىعى, «اتامەكەن» ۇلتتىق كاسىپكەرلىك پالاتاسى مەن جەرگىلىكتى بيزنەس-قاۋىمداستىق وكىلدەرى قاتىسقان جيىندا جان-جاقتى ماسەلەلەر تالقىلاندى. شىعىس قازاقستان وڭىرىندە مەملەكەت-جەكەمەنشىك سەرىكتەستىگى شەڭبەرىندە جۇزەگە اسىپ جاتقان جوبالار جوق ەمەس. بۇگىنگى تاڭدا ايماقتا جالپى قۇنى 12,2 ملرد تەڭگەنىڭ 47 مەملەكەت-جەكەمەنشىك سەرىكتەستىك شارتى جاسالعان. ونىڭ باسىم بولىگى ءبىلىم سالاسىنا قاتىستى. دالىرەك ايتساق, 4,3 ملرد تەڭگەنىڭ 44 شارتىنا قول قويىلىپ, ءمور سوعىلعان. قالعان ءۇش جوبا دەنە شىنىقتىرۋ جانە سپورت (قۇنى 7,8 ملرد تەڭگە), كولىك (24,6 ملن تەڭگەگە) پەن دەنساۋلىق ساقتاۋ (16,7 ملن تەڭگە) سالالارىنا تيەسىلى. وسى رەتتە جاسالعان شارتتاردىڭ 87 پايىزى مەملەكەتتىك مىندەتتەمەلەردى تولەۋدى تالاپ ەتپەيتىن 3 ساناتتاعى جوبالار ەكەنىن ايتقان ءجون.
– مەملەكەت-جەكەمەنشىك سەرىكتەستىگى اياسىندا قولعا الىنعان جوبالاردىڭ ۇلەسى بويىنشا شىعىس قازاقستان وبلىسى – ەلىمىزدە ۇزدىك ۇشتىكتىڭ قاتارىندا. دەگەنمەن سىزدەردىڭ وبلىستارىڭىزداعى جوبالاردىڭ تۇگەلدەي دەرلىگى ءبىلىم, دەنساۋلىق ساقتاۋ مەن دەنەشىنىقتىرۋ جانە سپورت سياقتى سالالاردى قامتيدى. ەندى باسقا باعىتتاردا دا جۇمىس جۇرگىزۋ قاجەت. ماسەلەن, وبلىستا تۋريزم, ونەركاسىپ, اۋىل شارۋاشىلىعى سىندى سالالاردىڭ الەۋەتى وتە جوعارى. جالپى, رەسپۋبليكامىزدا 2017–2021 جىلدار ارالىعىندا مەملەكەت-جەكەمەنشىك سەرىكتەستىك باعىتى قارقىندى دامىعانىن بىلەسىزدەر. الايدا كەيىنگى ءتورت جىلدا بۇل جۇمىس باسەڭدەپ قالدى. نەگە؟ بۇگىنگى باسقوسۋدا وسى ماسەلەنى دە جان-جاقتى تالقىلادىق, – دەدى سەنات دەپۋتاتى نۇرلان بەكەنوۆ.
بەكبولات ورىنبەكوۆتىڭ ايتۋىنشا, ەلىمىزدە مەملەكەت-جەكەمەنشىك سەرىكتەستىگىنىڭ قارقىنى باسەڭدەپ قالۋىنا زاڭ شيكىلىگى دە اسەرىن تيگىزىپ جاتىر. سەنات دەپۋتاتى قولدانىستاعى زاڭ جوبالارى كاسىپكەرلەر ءۇشىن تۇسىنىكسىز ەكەنىن ايتتى. سول سەبەپتى كوپ جاعدايدا بيزنەس-قاۋىمداستىق مۇنداي جوبالارعا قاتىسۋدان باس تارتىپ جاتادى.
القالى جيىندا قاتىسۋشىلار وسى جانە باسقا دا ماسەلەلەرگە قاتىستى پىكىر ءبىلدىرىپ, ۇسىنىستارىن جەتكىزدى. جيىنعا توراعالىق ەتكەن وبلىس اكىمى نۇرىمبەت ساقتاعانوۆ پارلامەنت دەپۋتاتتارى مەن جەرگىلىكتى بيزنەس قاۋىمداستىق كوتەرگەن ماسەلەلەر ورىندى ەكەنىن جانە تىعىرىقتان شىعۋ ءۇشىن زاڭناماعا وزگەرىس ەنگىزۋ قاجەت ەكەنىن ايتتى.
– كەشەلى بەرى وبلىسىمىزداعى مەملەكەت-جەكەمەنشىك سەرىكتەستىك شەڭبەرىندە جۇزەگە اسىرىلىپ جاتقان جوبالارمەن تانىسىپ جۇرسىزدەر. سىن-ەسكەرتپەلەرىڭىز دە بار ەكەن. ونىڭ ءبارى ەسكەرىلەدى. نەگىزى, ءبىز ديالوگكە اشىقپىز. ينۆەستورلارمەن جۇمىس ىستەۋگە, ولارعا جاعداي جاساۋعا دايىنبىز. ال بۇگىنگى جيىندا كوتەرىلگەن ماسەلەلەر مەن ايتىلعان ۇسىنىستاردى ۇكىمەتكە جەتكىزەسىزدەر دەپ ويلايمىن, – دەدى ن.ساقتاعانوۆ.
دەپۋتاتتاردىڭ العاشقى جۇمىس ساپارى كۇنى كاسىپكەرلەر مەن وڭىرلىك سالالىق باسقارما باسشىلارىنىڭ قاتىسۋىمەن اشىق ديالوگ الاڭى وتكىزىلگەن. كەزدەسۋدە مەملەكەت-جەكەمەنشىك ارىپتەستىكتى دامىتۋ جانە بيزنەستىڭ دامۋىنا كەدەرگى كەلتىرەتىن اكىمشىلىك توسقاۋىلداردى جويۋ ماسەلەلەرى تالقىلانعان.
شىعىس قازاقستان وبلىسى – ءمجا جوبالارىن ىسكە اسىرۋ بويىنشا جەتەكشى وڭىرلەردىڭ قاتارىندا. بۇگىندە وڭىردە جالپى قۇنى 12 ملرد تەڭگەدەن اساتىن 47 جوبا بار. شقو-دا ازىرلەنگەن ينۆەستورلاردى سۇيەمەلدەۋ الگوريتمدەرى ءتيىمدى دەپ تانىلىپ, باسقا وڭىرلەرگە ەنگىزۋ ۇسىنىلعان. كاسىپكەرلەر تاراپىنان اگرارلىق سالانىڭ دامۋىنا تىكەلەي اسەر ەتەتىن ۆەتەرينارلىق ەرەجەلەردى جەتىلدىرۋ بويىنشا دا ماڭىزدى ۇسىنىستار ايتىلدى. سونىمەن قاتار سالىق كودەكسىن جەتىلدىرۋگە قاتىستى باستامالار مەن ەسكەرتۋلەر كوتەرىلدى.
شىعىس قازاقستان وبلىسى