ەلىمىزدە كولىك ينفراقۇرىلىمىن دامىتۋدىڭ نەگىزگى باعىتتارىن تولىق قامتيتىن اۋقىمدى جول قۇرىلىسى ماۋسىمى باستالدى. جالپى ۇزىندىعى 8,8 مىڭ شاقىرىم بولاتىن ءارتۇرلى دەڭگەيدەگى اۆتوموبيل جولدارىندا جۇمىس جۇرگىزۋ جوسپارلانىپ وتىر. وسىعان وراي «قازاۆتوجول» ۇك» اق قوستانايدا شىعاتىن «Lovol» تراكتورلارىنىڭ جاڭا لەگىن ساتىپ الىپ, تەحنيكالىق قۋاتىن كۇشەيتتى.
بيىل جول جوندەۋ, جول سالۋ جۇمىستارىنا ەل كولەمىندە 10 مىڭعا جۋىق جول-قۇرىلىس تەحنيكاسى, 27 اسفالتبەتون زاۋىتى جانە 25 مىڭ مامان تارتىلادى.
«بۇعان دەيىن جاريالانعان بايقاۋعا وتاندىق تەحنيكا شىعاراتىن كاسىپورىنداردىڭ ءبارى قاتىستى. «Agromash» زاۋىتىنىڭ لوكاليزاتسيا ورتالىعى – جاڭا تەحنولوگيا قۇرىلعىلارمەن جابدىقتالعان جانە لوكاليزاتسيا ۇلەسى جوعارى زاۋىتتاردىڭ ءبىرى. سوندىقتان شارتتا كورسەتىلگەن تەحنيكانىڭ قوسىمشا تىركەمەسى, اسپالى قوندىرعىلارى بولۋ كەرەك دەگەن ءتارىزدى تەحنيكالىق تالاپتار ۇدەسىنەن شىقتىق. تەحنيكانى قىسقا مەرزىم ىشىندە «قازاۆتوجول» كومپانياسىنىڭ كورپوراتيۆتىك تۇسىنە بوياپ بەردىك. ءبىز ساتىپ الۋشىلاردىڭ تالاپ-تىلەگىن ەشقاشان جەرگە قالدىرمايمىز. كومپانياعا «Lovol 854» تراكتورلارىنىڭ ليميتتەلگەن سەرياسىن تاپسىردىق», دەيدى «Agromash» زاۋىتىنىڭ كوممەرتسيالىق ديرەكتورى نيكولاي پارحومەنكو.
جاڭا تراكتورلار تاياۋ كۇندەرى كۇرە جولعا شىعىپ, كەشەندى قىزمەت كورسەتۋگە كىرىسەدى.
«قوستاناي تراكتورلارى نەگىزىنەن جول كۇتىمىنە پايدالانىلادى. مىسالى, قىستا جول ءۇستىن قار-مۇزدان تازارتۋ, كوكتايعاقتى ەرىتەتىن ماتەريالداردى تاسۋ, جازدا جول ورتاسىن, جول جيەكتەرىن تازارتۋ, جۋ سياقتى كەڭ اۋقىمدى مىندەتتەردى ورىنداۋعا ارنالعان», دەيدى «قازاۆتوجول» ۇك» اق ءباسپاسوز قىزمەتى.
«Agromash» باسشىلىعى زاۋىت مەملەكەتتىك جانە جەكەمەنشىك كومپانيالاردىڭ سۇرانىسىن كەشىكتىرمەي وتەۋگە قاشاندا ءازىر ەكەنىن ايتادى.
قوستاناي وبلىسى