قازاقستاندا رەسپۋبليكالىق جانە وبلىستىق ماڭىزى بار 41 قالانىڭ جارتىسىنان استامىندا سوڭعى ءبىر جىلدا حالىق سانى قىسقارعان. بۇل تۋرالى ءبىرىنشى نەسيە بيۋروسى جانىنداعى تالداۋ ورتالىعى حابارلادى, دەپ جازادى Egemen.kz.
حالىق سانى ەڭ كوپ قىسقارعان قالا – قوناەۆ. مۇندا تۇرعىندار سانى 8,2%-عا كەمىپ, 66 مىڭ ادامعا ءتۇستى. قوناەۆ قالاسى 2022 جىلى وبلىس ورتالىعى مارتەبەسىن العانىمەن, تۇرعىندار سانى وسپەگەن.
وسىنداي قالالاردىڭ قاتارىندا سەمەي (5,1 پايىزعا) مەن بايقوڭىر (3,6%) دا بار. ارقالىق, كۋرچاتوۆ, پريوزەرسك, ستەپنوگورسك, ريددەر, ارىس, شاحتينسك جانە تەكەلى قالالارىندا دا حالىق سانى 1%-دان كوپ قىسقارعان.
حالىق سانى وسكەن قالالاردىڭ قاتارىنا قوسشى كىرەدى. مۇندا تۇرعىندار سانى 8,3%-عا ارتقان. استانا حالقى 6,9%-عا كوبەيىپ, 1,55 ميلليونعا جەتتى. تۇركىستان مەن اقتاۋدا دا حالىق سانى ءساي-كەسىنشە 4,4% جانە 4,3% وسكەن. الماتى مەن شىمكەنتتە ءوسىم 2,7%-عا تەڭ بولدى.
ايتا كەتەيىك, الماتى, استانا جانە شىمكەنت قالالارىندا حالىق سانى ءوسىپ كەلەدى. ال شاعىن قالالاردا تۇرعىندار سانى قىسقارعان. بۇل ءۇردىس ەلدىڭ ۋربانيزاتسياسى مەن ەكونوميكالىق دامۋىنا بايلانىستى وزگەرىستەردى كورسەتەدى.
جانەل تولەۋبەكوۆا, ەۇۋ 2 كۋرس ستۋدەنتى