ولجاس بەكتەنوۆ PepsiCo كومپانياسىنىڭ رەسەي, بەلارۋس, كاۆكاز جانە ورتالىق ازيا ءوڭىرى بويىنشا پرەزيدەنتى داۆيد مانزينيمەن الماتى وبلىسىندا زاۋىت سالۋ ماسەلەسىن تالقىلادى, دەپ جازادى Egemen.kz.
جاڭا PepsiCo زاۋىتى ورتالىق ازياداعى ەڭ ءىرى زاۋىت بولادى. 2024 جىلعى ماۋسىمدا وتكەن كەلىسسوزدەر قورىتىندىسى بويىنشا ينۆەستيتسيا كولەمى $160 ملن بولاتىنى جوسپارلانعان. كارتوپ وڭدەۋدىڭ وندىرىستىك قۋاتى مەن كولەمى ءۇش ەسەگە ارتىپ, 70 مىڭ توننادان 210 مىڭ تونناعا دەيىن وسەدى. بۇل جىلىنا شامامەن 70 مىڭ توننا دايىن ءونىم شىعارىلادى دەگەن ءسوز. كاسىپورىندا 900-گە جۋىق جۇمىس ورنى اشىلادى.
ء«بىز جوعارى وڭدەلگەن دايىن ءونىم شىعارۋعا باعىتتالعان وسىنداي جوبالاردى تولىق قولدايمىز. مەملەكەتتىك ورگاندار ەكى اپتا ىشىندە بارلىق قاجەتتى شەشىمدەردى قابىلدايدى», دەدى ولجاس بەكتەنوۆ.
داۆيد مانزيني جوبانىڭ ءبىرىنشى كەزەڭىن ىسكە قوسۋ جانە قازاقستاندىق ءونىمنىڭ ءبىرىنشى پارتياسىن شىعارۋ 2026 جىلدىڭ ناۋرىز ايىنا جوسپارلانعانىن, 2027 جىلدىڭ قىركۇيەگىندە زاۋىتتىڭ تولىق قۋاتقا شىعۋى جوسپارلانىپ وتىرعانىن ايتتى. جوبا اياسىندا جەرگىلىكتى شيكىزات پايدالانىلىپ, كارتوپتى جەتكىزۋگە قازاقستاندىق فەرمەرلىك شارۋاشىلىقتار تارتىلادى.
ء«بىز قازاقستان بيلىگى تاراپىنان كورسەتىلگەن قولداۋدى جوعارى باعالايمىز. شەتەلدىك ينۆەستور رەتىندە بىزگە قولايلى جاعدايلار جاسالعان. بۇگىندە جوعارى الەۋەتتى كورىپ وتىرمىز, سوندىقتان قازاقستانعا ينۆەستيتسيا كولەمىن ەكى ەسەگە ارتتىرۋ تۋرالى شەشىم قابىلدادىق», دەدى دەۆيد مانزيني.
كەزدەسۋ ناتيجەسىندە سىرتقى ىستەر مينيسترلىگىنە ەكى اپتا ىشىندە قازاقستان ۇكىمەتى مەن PepsiCo اراسىندا ينۆەستيتسيالار تۋرالى كەلىسىم دايىنداۋ تاپسىرىلدى. وسى مەرزىمدە اۋىل شارۋاشىلىعى مينيسترلىگى ينۆەستور ءۇشىن بارىنشا قولايلى جاعداي جاساۋ ماقساتىندا ينۆەستيتسيالىق سالىمدار كەزىندە اگروونەركاسىپ كەشەنى سۋبەكتىسى شىعىستارىنىڭ ءبىر بولىگىن وتەۋ بويىنشا سۋبسيديالاۋ قاعيدالارىنا قاجەتتى تۇزەتۋلەر ەنگىزەدى.