قر مادەنيەت جانە اقپارات مينيسترلىگىنىڭ قولداۋىمەن « ۇلى دالا ەلىنىڭ رۋحاني تەمىرقازىعى – ۇلىتاۋ» اتتى جاس اقىن-جازۋشىلاردىڭ رەسپۋبليكالىق سەمينار-كەڭەسى ءوتتى.
سەمينار-كەڭەسكە ەلىمىزدىڭ تۇكپىر-تۇكپىرىنەن كەلگەن جاس قالامگەرلەر, مينيسترلىك جانىنان قۇرىلعان «القا» ادەبي كلۋبىنىڭ مۇشەلەرى جانە جەرگىلىكتى زيالى قاۋىم وكىلدەرى قاتىستى.
القالى جيىندا قالامگەرلەر قازىرگى قازاق ادەبيەتىنىڭ دامۋ ءۇردىسى, شىعارماشىلىق ىزدەنىستەر, كىتاپ شىعارۋ ءىسى مەن ادەبي جوبالار جايلى پىكىر الماسىپ, تاجىريبە ءبولىستى. سونداي-اق ءىس-شارا بارىسىندا ۇلتتىق ادەبيەتتىڭ التىن قورىنا ەنگەن 100 كورنەكتى تۋىندىنى انىقتاۋعا باعىتتالعان جالپىۇلتتىق ساۋالناما كەڭىنەن تالقىلاندى.
ەكى كۇنگە سوزىلعان باعدارلاما اياسىندا قاتىسۋشىلار جوشى حان, الاشا حان جانە دومباۋىل كەسەنەلەرى مەن حان وورداسى سياقتى تاريحي-مادەني نىسانداردى ارالاپ, ۇلت شەجىرەسىنە قاتىستى ماڭىزدى دەرەكتەرمەن تانىستى.
ءىس-شارا شەڭبەرىندە وبلىستىق «ۇلار» ادەبي كلۋبىنىڭ كەڭسەسى اشىلىپ, س.قوجامقۇلوۆ اتىنداعى ۇلىتاۋ وبلىستىق قازاق مۋزىكالىق-دراما تەاترىنىڭ قويىلىمى كورەرمەنگە ۇسىنىلدى.
ايتا كەتەيىك, قر مادەنيەت جانە اقپارات مينيسترلىگىنىڭ جانىنان قۇرىلعان «القا» جاستار ادەبي كلۋبى جاس قالامگەرلەردى قولداۋ, تاريحي-رۋحاني مۇرانى ناسيحاتتاۋ باعىتىندا بۇعان دەيىن استانا, الماتى, جەتىسۋ, اباي جانە قاراعاندى وبلىستارىندا ادەبي تۋرلار مەن كوشپەلى وتىرىستار وتكىزگەن بولاتىن.
سەمينار-كەڭەستىڭ نەگىزگى ماقساتى – ۇلىتاۋدىڭ تاريحي, رۋحاني جانە مادەني ماڭىزىن ناسيحاتتاۋ ارقىلى ۇلتتىق بىرەگەيلىكتى نىعايتۋ, وتاندىق اقىن-جازۋشىلاردىڭ شىعارماشىلىعى ارقىلى ەل رۋحىن كوتەرۋ جانە ۇلىتاۋ ءوڭىرىنىڭ ۇلت تاريحىنداعى ايرىقشا ورنىن كەڭىنەن تانىتۋ.