قازاقستان رەسپۋبليكاسى كونستيتۋتسياسىنىڭ 30 جىلدىعىنا وراي قازاقستاندىق الپينيست, مادەنيەت قايراتكەرى الىبەك قايىربەك ەلدىڭ اتا زاڭىنىڭ ءماتىنىن گيمالايداعى ايلەند پيك (6180 م) شىڭىنا الىپ شىقتى.
بۇل ونىڭ «الەم شىڭدارىنداعى دومبىرا» اتتى بىرەگەي جوباسىنىڭ ءبىر بولىگى بولدى. جوبا «الەمنىڭ جەتى شىڭى» حالىقارالىق باستاماسى اياسىندا جۇزەگە اسىرىلىپ جاتىر. ونىڭ ماقساتى – قازاق مادەنيەتىن, سونىڭ ىشىندە دومبىرامەن ورىندالاتىن ۇلتتىق مۋزىكانى الەمگە تانىتۋ جانە بۇل اسپاپتى ەڭ بيىك شىڭداردى باعىندىرعان مۋزىكالىق اسپاپ رەتىندە گيننەستىڭ رەكوردتار كىتابىنا ەنگىزۋ بولىپ تابىلادى.
ايلەند پيككە باعىتتالعان ەكسپەديتسيا 15 كۇنگە سوزىلدى جانە ءالپينيستىڭ باستاماسىمەن ۇيىمداستىرىلدى. بۇل ورلەۋ ول ءۇشىن تەك سپورتتىق جەتىستىك قانا ەمەس, سونىمەن قاتار پاتريوتيزم مەن ازاماتتىق جاۋاپكەرشىلىكتىڭ ايقىن كورىنىسى بولدى. الىبەك كونستيتۋتسيانىڭ ءماتىنىن ەلىمىزدىڭ اتا زاڭىنا دەگەن قۇرمەت بەلگىسى رەتىندە شىڭعا كوتەرۋدى ۇسىنۋ ماقساتىندا كونستيتۋتسيالىق سوتقا جۇگىندى. كونستيتۋتسيالىق سوت بۇل باستامانى قولداپ, كونستيتۋتسيانىڭ رەسمي ءماتىنىن ۇسىندى.
الىبەك بيىكتىك پەن اۋا رايىنىڭ كۇردەلى جاعدايلارىنا قاراماستان, كونستيتۋتسيانى گيمالايدىڭ ايگىلى شىڭدارىنىڭ بىرىنە سالتاناتتى تۇردە الىپ شىعۋ ءۇشىن بارلىق سىناقتاردان ءوتتى.
«مەن ءۇشىن كونستيتۋتسيا – بارلىق زاڭداردىڭ شىڭى. بۇل جاي عانا قۇجات ەمەس, بۇل – رۋحاني تىرەك, بىرلىگىمىزدىڭ, قۇقىقتارىمىز بەن بوستاندىعىمىزدىڭ سيمۆولى. اتا زاڭ مەن دومبىرانى الىپ شىققاندا مەن جۇك ەمەس, كۇش سەزىندىم. ەكسپەديتسيانىڭ قاتال جاعدايلارىندا ولار مەنىڭ موتيۆاتسيامدى ارتتىرىپ, رۋحىمدى كۇشەيتتتى. ايلەند پيك شىڭىن قازاقستاننىڭ ءدال وسى نىشاندارىمەن باعىندىرعانىما ماقتانامىن», - دەيدى الىبەك.
وسى تاريحي ورلەۋ بارىسىندا الىبەك ەۆەرەست ەتەگىندە ۇلى قازاق كومپوزيتورى نۇرعيسا تىلەنديەۆتىڭ 100 جىلدىعىنا وراي ونىڭ «القيسسا» كۇيىن دە ورىندادى.
ءالپينيستىڭ تاۋداعى لاگەرلەردە جانە كورشىلەس نەپال اۋىلدارىندا ورىنداعان مۋزىكالىق ونەرى حالىق تاراپىنان ۇلكەن ىقىلاسقا يە بولىپ, ەكسپەديتسيانى ۇلتتار مادەنيەتىنىڭ ديالوگىنا اينالدىردى. دومبىرا مەن كونستيتۋتسيا قازاقستاننىڭ بەيبىتشىلىك, اشىقتىق جانە ۇلتتىق قادىر-قاسيەت سيمۆولدارىنا اينالدى.
قايىربەك الىبەكتىڭ بۇل جوباسى كوممەرتسيالىق ەمەس جانە حالىقارالىق مادەني ديپلوماتيانى نىعايتۋعا باعىتتالعان.