قوستاناي وبلىسىندا شارۋا قوجالىقتارىنىڭ الدى جىلداعى قاربالاس تىرشىلىگىنە كىرىسىپ كەتتى. توبىل وڭىرىندە مامىردىڭ باسى جاۋىن-شاشىندى بولعانىمەن, وڭتۇستىك اۋدانداردا اۋا رايى شارۋاعا قولايلى بولىپ تۇر.
كوكتەم كەلگەلى كوكتەن ءنار تامباعان ناۋىرزىم اۋدانىنىڭ شارۋا قوجالىقتارى دا توپىراق ىلعالىن جوعالتپاي تۇرعاندا تۇقىم سەۋىپ ۇلگەرۋگە اسىق. اتالعان اۋدانعا قاراستى ولەڭدى اۋىلىنداعى «بوگدان» شارۋا قوجالىعى بيىل 2 مىڭ گەكتار القاپقا ءدان ءسىڭىرۋدى جوسپارلاپ وتىر. شاعىن شارۋاشىلىق بۇگىنگە دەيىن 1 مىڭ گەكتار جەرگە تۇقىم سەۋىپ ۇلگەرگەن.
مەڭدىقارا اۋدانىنداعى سەرىك مۇقانوۆ باسقاراتىن شارۋاشىلىق تا القاپتىڭ شەتىنە تەحنيكاسىن ءيىرىپ قويىپ, كوكتەمگى ناۋقانعا ساقاداي-ساي وتىر. شارۋاشىلىق ءوز يەلىگىندەگى 6,5 مىڭ گەكتار ەگىستىك جەردىڭ ىلعالىن جاۋىپ تۇقىمىن قامداپ قويعان.
«بيىل ەندى قار از بولدى. سونىڭ وزىندە ءبىر مەتردەن ارتىق ىلعال بار. وسى جەتكىلىكتى دەپ ويلايمىن. ەندى ەككەننەن كەيىن كورە جاتارمىز. جاڭبىرعا قارايمىز, كورەمىز. ءالى دە جاڭبىر كەرەك. جاڭبىر ارتىق بولمايدى. ءبىز جاقتا كوكتەمگى ەگىس جۇمىستارى توپىراق تەمپەراتۋراسى ءتۇن مەزگىلىندە +13-14 گرادۋسقا جەتكەندە باستالادى. ناۋقانعا دايىنبىز», دەيدى شارۋاشىلىق اگرونومى اسلان ابدۋللين.
اتالعان شارۋاشىلىق بيىل مايلى داقىل القابىن 10 مىڭ گەكتارعا جەتكىزگەن. بيداي, بۇرشاق داقىلدارىنىڭ كولەمى, كەرىسىنشە, جىل ساناپ كەمىپ بارادى.
ء«بىز بىرتىندەپ القاپتى ءارتاراپتاندىرىپ, نارىققا بەيىمدەلىپ كەلەمىز. قازىر بيداي ارزان, سۇرانىس تومەن. ال مايلى داقىلدىڭ باعاسى قاشاندا تۇراقتى, سۇرانىس تا بار. كوكتەمگى ناۋقانعا مەملەكەت جىلدا قارجىلاي كومەك كورسەتىپ كەلەدى. بىراق بيىل سۋبسيديانى كىشكەنە كەشىگىڭكىرەپ بەردى. تاياۋدا 5 پايىز جىلدىق وسىممەن نەسيە دە الدىق. تۇقىم قورى جەتكىلىكتى. بيىل رەسەيدەن, قىزىلجار وڭىرىنەن جاڭا تۇقىم ساتىپ الدىق. جاعدايىمىز جامان ەمەس, جۇمىس ويداعىداي ءجۇرىپ جاتىر», دەيدى سەرىك مۇقانوۆ.
وبلىستىق اۋىل شارۋاشىلىعى باسقارماسىنىڭ باس مامانى كەنجە جۇماندىقوۆتىڭ ايتۋىنشا, ءوڭىر شارۋاشىلىقتارى كوكتەمگى ەگىس ناۋقانى قارساڭىندا تۇقىممەن دە, جانار-جاعارمايمەن دە تولىق قامتاماسىز ەتىلگەن. قازىر قويمادا 514,2 مىڭ توننا تۇقىم بار. كوكتەمگى دالا جۇمىستارىنا 72,8 مىڭ توننا ديزەل وتىنى بولىنگەن. اۋىل شارۋاشىلىعى تاۋارىن وندىرۋشىلەرگە جانارمايدىڭ ءليترى 254 تەڭگەدەن بەرىلىپ جاتىر.
مۇنىڭ سىرتىندا, شارۋالارعا اگرارلىق نەسيە كورپوراتسياسى ارقىلى «كەڭ دالا» جəنە «كەڭ دالا 2» باعدارلامالارى بويىنشا 84,1 ملرد تەڭگە, ال ازىق-ت ۇلىك كەلىسىمشارت كورپوراتسياسى ارقىلى فورۆاردتىق ساتىپ الۋ تەتىگىمەن 7 ملرد 350 ملن تەڭگە بولىنگەن.
بيىل كوكتەمگى ەگىس ناۋقانىنا 19,2 مىڭ تراكتور, 22,2 مىڭ تۇقىمسەپكىش, 1,3 مىڭ زاماناۋي دانسەپكىش كەشەن قاتىساتىن بولادى. سالاعا جاۋاپتى باسقارمانىڭ دەرەگىنشە, بۇگىنگە دەيىن وبلىس بويىنشا 100 مىڭ گەكتاردان استام القاپقا ەگىن ەگىلگەن. الداعى ۋاقىتتا كۇن رايى كۇرت قۇبىلىپ كەتپەسە, ءوڭىر شارۋاشىلىقتارى كوكتەمگى ناۋقاندى مامىر ايىنىڭ سوڭىنا دەيىن اياقتايدى.
قوستاناي وبلىسى