استانادا ورتالىق ازياداعى العاشقى «TUMO» كرەاتيۆتى تەحنولوگيا ورتالىعى اشىلادى. بۇل جوبانى ىسكە اسىرۋعا بايلانىستى «Astana Hub» پەن «TUMO» اراسىندا كەلىسىمشارتقا قول قويىلدى.
«Astana Hub»-تىڭ باس ديرەكتورى ماعجان ماديەۆتىڭ ايتۋىنشا, «TUMO» – ارمەنيادا ازىرلەنگەن حالىقارالىق ۇلگىدەگى يننوۆاتسيالىق قوسىمشا ءبىلىم بەرۋ مودەلى. «مۇنداي ورتالىقتىڭ ەلوردادا اشىلۋى – ەلىمىزدىڭ الەمدىك ءبىلىم قاۋىمداستىعىنا قوسىلىپ, جاستاردىڭ تسيفرلىق ساۋاتتىلىعىن ارتتىراتىن ماڭىزدى قادام. بۇل باعدارلاما اياسىندا 12–18 جاس ارالىعىنداعى وقۋشىلار تولىق تەگىن ءبىلىم الادى. ءبىر جاعىنان, ولارعا زاماناۋي تسيفرلىق ءارى كرەاتيۆتى داعدىلاردى مەڭگەرۋگە جول اشىلادى», دەدى ول.
باعدارلاما 11 نەگىزگى باعىتتى قامتيدى. ونىڭ قاتارىندا گەنەراتيۆتى جاساندى ينتەللەكت, ويىن ازىرلەۋ, انيماتسيا, كينووندىرىس, 3D مودەلدەۋ, روبوتتەحنيكا, گرافيكالىق, موۋشن-ديزاين, باعدارلامالاۋ, مۋزىكالىق كومپوزيتسيا جانە ۆەب-ازىرلەۋ سەكىلدى سۇرانىسقا يە سالالار بار.
ورتالىقتاعى وقۋ ۇدەرىسى «TUMO Path» پلاتفورماسى ارقىلى جۇزەگە اسادى. بۇل الاڭ ءاربىر وقۋشىعا قىزىعۋشىلىعى مەن ماقساتىنا ساي جەكە ءبىلىم تراەكتورياسىن قۇرىپ, ونى بىرتىندەپ جەتىلدىرۋگە مۇمكىندىك بەرەدى. وقۋشىلار العان ءبىلىمىن پراكتيكالىق تاپسىرما ارقىلى بەكىتىپ, ۆوركشوپ-ليدەرلەردىڭ جەتەكشىلىگىمەن ناقتى جوبالارعا قاتىسىپ, دامۋ جولىن ايقىندايتىن جەكە پورتفوليو جاسايدى.
«قازاقستاندا «TUMO» مودەلىن تانىستىرۋ – بىزگە ۇلكەن مارتەبە. «Astana Hub»-پەن ارىپتەستىك ماقساتىمىز ۇندەسەدى. باستىسى, جاستاردى بولاشاقتا سۇرانىسقا يە تسيفرلىق جانە شىعارماشىلىق داعدىلارمەن قارۋلاندىرۋ. «TUMO Astana» قازاقستاندىق جاستارعا الەمنىڭ ءار تۇكپىرىندەگى 80 مىڭنان استام وقۋشىنىڭ ءومىرىن وزگەرتكەن جوعارى ساپالى باعدارلامانى ۇسىنادى», دەدى «TUMO»-نىڭ دامۋ جونىندەگى ديرەكتورى بەكور پاپازيان.
2011 جىلى ەرەۆاندا نەگىزى قالانعان بىرەگەي ءبىلىم مودەلىنىڭ 7 ەلدە ورنالاسقان 18 ورتالىعى بار. قازىرگى تاڭدا مۇنداي ورتالىقتار ارمەنيادان باستاپ, فرانتسيا, گەرمانيا, پورتۋگاليا, ۋكراينا جانە البانيادا تابىستى جۇمىس ىستەپ تۇر.
ەلىمىزدە اشىلاتىن «TUMO» ورتالىعى باس شاھارداعى «alem.ai» حالىقارالىق جاساندى ينتەللەكت ورتالىعىندا ورنالاسادى. ال ونىڭ جۇمىسى الداعى قازان ايىندا باستالادى.
ايتا كەتەيىك, اتالعان جوبا ەل ۇكىمەتىنىڭ 5 جىل ىشىندە 1 ميلليون ادامدى تسيفرلىق داعدىلارعا وقىتۋعا باعىتتالعان ستراتەگيالىق باستاماسى شەڭبەرىندە جۇزەگە اسىپ وتىر. بۇل «AI Movement» قوزعالىسىنىڭ «Tomorrow School», «People Bootcamp», «AI’preneurs», «QazCoders» سەكىلدى باسقا دا ماڭىزدى جوبالارىمەن تىعىز بايلانىستى.