اتىراۋ قالالىق پروكۋراتۋراسى قۇرىلتايشىلاردىڭ زاڭسىز ىسىنەن زارداپ شەككەن ۇلەسكەرلەردىڭ قۇقىعىن قورعاۋدى جالعاستىرىپ جاتىر, دەپ حابارلايدى Egemen.kz.
پروكۋراتۋرا تەكسەرۋ بارىسىندا «اتامەكەن تۇرعىن ءۇي», «Family town», «Baisanat Residence» جانە «SaraishyqInvestGroup» تۇرعىن ءۇي-قۇرىلىس كووپەراتيۆتەرى (تقك) قۇرىلتايشىلارىنىڭ زاڭسىز ارەكەتىن انىقتادى.
«زارداپ شەككەن پايشىلاردىڭ قۇقىقتارىن قورعاۋ ماقساتىندا اتىراۋ قالاسىنىڭ پروكۋراتۋراسى «Baisanat Residence» تقك جانە ونىڭ قۇرىلتايشىلارىمەن جاسالعان شارتتاردى بۇزۋ, اياقتالماعان قۇرىلىس نىساندارىنان الىنعان قارجىنى پايشىلارعا تابىستاۋ تۋرالى تالاپ ارىزبەن اتىراۋ قالالىق سوتىنا جۇگىندى. سوت پروكۋراتۋرانىڭ تالاپتارىن زاڭدى دەپ تانىپ, تالاپ ارىزدى تولىق قاناعاتتاندىردى. بۇل شەشىم پايشىلارعا ينۆەستورلاردى تارتىپ, قۇرىلىستى اياقتاۋعا, كوپتەن كۇتكەن باسپانالارىن الۋعا مۇمكىندىك بەرەدى», دەپ ءمالىم ەتتى وبلىستىق پروكۋراتۋرادان.
سونداي-اق, اتىراۋ قالالىق پروكۋراتۋراسى قابىلداعان شارالاردىڭ ناتيجەسىندە «قازانات» تقك-نىڭ جەر ۋچاسكەسى پايشىلاردىڭ مەنشىگىنە قايتارىلعان. ال, «اقمارجان» تقك جۇرگىزگەن تۇرعىن ءۇي پايدالانۋعا بەرىلگەن.