ەنەرگەتيكا مينيسترلىگى 2025 جىلدىڭ قاڭتار–ساۋىر ايلارىنداعى ءىرى مۇناي وڭدەۋ زاۋىتتارىنىڭ جۇمىس قورىتىندىلارىن جاريالادى. رەسمي دەرەككە سۇيەنسەك, بيىلعى ءتورت ايدا ەلىمىزدە 6,092 ميلليون توننا مۇناي وڭدەلگەن. بۇل – وتكەن جىلدىڭ سايكەس كەزەڭىمەن سالىستىرعاندا 10,8 پايىزعا ارتىق كورسەتكىش, دەپ حابارلايدى Egemen.kz.
ساراپشىلاردىڭ پايىمداۋىنشا, بۇل ءوسىم – مۇناي ونىمدەرىنە دەگەن ىشكى جانە سىرتقى نارىقتارداعى تۇراقتى سۇرانىس پەن وندىرىستىك قۋاتتىلىقتىڭ ارتۋىنىڭ ايعاعى. مۇناي وڭدەۋ زاۋىتتارى جاڭا تەحنولوگيالاردى ەنگىزۋ مەن ءتيىمدى جوسپارلاۋ ارقىلى ءوندىرىستى جاڭا بەلەسكە كوتەرىپ وتىر.
قارا التىندى كەشەندى وڭدەۋ ناتيجەسىندە ەلىمىزدە جانارماي ءوندىرىسى ەداۋىر ۇلعايدى. اتاپ ايتقاندا:
اۆتوموبيل بەنزينى – 25,4 پايىزعا ءوسىپ, 2,082 ملن تونناعا جەتتى;
ديزەل وتىنى – 18,9 پايىزعا ارتىپ, 1,921 ملن توننانى قۇرادى;
اۆياتسيالىق كەروسين – 5,3 پايىزدىق وسىممەن 0,255 ملن تونناعا جەتتى.
بۇل كورسەتكىشتەر – ىشكى نارىقتى ساپالى جانارمايمەن قامتاماسىز ەتۋ ءىسىنىڭ دۇرىس جولعا قويىلعانىن اڭعارتادى. سونىمەن قاتار, ەكسپورتتىق الەۋەتتى ارتتىرۋعا دا مۇمكىندىك تۋىپ وتىر.
ەنەرگەتيكا مينيسترلىگى تاراپىنان بۇل سالادا جۇيەلى ءارى ۇزاق مەرزىمدى ستراتەگيالىق شارالار قولعا الىنعان. ونىڭ ىشىندە: مۇناي وڭدەۋ زاۋىتتارىنىڭ ۇزدىكسىز ءارى ءتيىمدى جۇمىسىن قامتاماسىز ەتۋ, ىشكى نارىقتى مۇناي ونىمدەرىمەن تولىق قامتۋ, سونداي-اق كاسىپورىنداردىڭ تەحنولوگيالىق جاڭعىرۋىن جەدەلدەتۋ سىندى باعىتتار بار.
بۇگىندە ەلىمىزدەگى مۇناي وڭدەۋ زاۋىتتارى – ەنەرگەتيكالىق قاۋىپسىزدىكتىڭ ماڭىزدى تىرەكتەرىنىڭ ءبىرى. ولاردىڭ تۇراقتى جۇمىسى – تەك وتاندىق ءوندىرىستىڭ ەمەس, تۇتاس ەكونوميكانىڭ باسەكەگە قابىلەتتىلىگىن ارتتىرۋدىڭ العىشارتى.