2026 جىلدىڭ 1 قاڭتارىنان باستاپ ەلىمىزدە كىتاپتار مەن ولاردى باسىپ شىعارۋ قىزمەتتەرى قوسىلعان قۇن سالىعىنان بوساتىلادى. بۇل – وتاندىق باسپا سالاسىنىڭ تىنىسىن اشاتىن ماڭىزدى شەشىم. وسى تاريحي ءسات قارساڭىندا ءبىز Arman-PV باسپاسىنىڭ باس ديرەكتورى ديدارا الينامەن سۇحباتتاسىپ, ققس-تىڭ جويىلۋى باسپا مەن ءبىلىم سالاسىنا قالاي اسەر ەتەتىنىن, سونداي-اق جاڭا مۇمكىندىكتەردىڭ كوكجيەگىن سارالادىق, دەپ جازادى Egemen.kz.
– ديدارا حانىم, ققس-تىڭ الىپ تاستالۋى – باسپا نارىعى ءۇشىن ەرەكشە جاعداي. ءسىز بۇل شەشىمدى قالاي قابىلدادىڭىز؟
– بۇل جاڭالىقتى ۇلكەن ۇمىتپەن, ءارى كاسىبي جاۋاپكەرشىلىكپەن قابىلدادىق. ءبىز ءۇشىن بۇل تەك سالىق جويىلدى دەگەن ءسوز ەمەس. بۇل – مەملەكەت تاراپىنان كىتاپتىڭ, جالپى زياتكەرلىك ەڭبەكتىڭ قوعام ءۇشىن ماڭىزىن مويىنداعان شەشىم.
بۇل شەشىم كەزدەيسوق ەمەس. بۇل – بىرنەشە جىلدار بويى جالعاسقان كاسىبي ديالوگتىڭ, ورتاق باستامانىڭ ناتيجەسى. باسپاگەرلەر قاۋىمداستىعى اتىنان دايىندالعان ۇسىنىستار دا ەسكەرىلدى.
– باسپا ءىسى – وزگە بيزنەس سالالارىمەن سالىستىرعاندا باياۋ اينالىمدى, وزىندىك ەرەكشەلىگى بار سالا. ققس وسى سالاعا قالاي اسەر ەتىپ كەلدى؟
– ءدال ايتاسىز. باسپا نارىعى – جىلدام تۇتىنۋ ەمەس, ۇزاق مەرزىمدى مازمۇن وندىرەتىن سالا. ءبىر كىتاپتىڭ ارتىندا ايلار مەن جىلدارعا سوزىلاتىن ەڭبەك, كوپ سالالى شىعىن جاتادى. بۇل – اۆتورلىق قالاماقى, رەداكتسيا, كوركەمدىك وڭدەۋ, ديزاين, باسپا جانە لوگيستيكا شىعىندارى.
12 پايىزدىق ققس وسى پروتسەستىڭ ءبارىنىڭ ۇستىنەن قوسىلىپ, كىتاپتىڭ تۇپكى باعاسىن وسىرەتىن. اسىرەسە بالالار مەن وقۋ ادەبيەتىنە كەلسەك, بۇل باعا قولجەتىمدىلىكتى كۇرت تومەندەتەتىن. ال ەندى ققس-تىڭ الىپ تاستالۋى – بىزگە دەم بەرەتىن شەشىم. بۇل سالاعا ينۆەستيتسيا تارتۋعا دا وڭ اسەر ەتەدى.
– Arman-PV باسپاسىنىڭ باستى ەرەكشەلىگى – ساپالى وقۋ ادەبيەتىن ۇسىنۋى. قارجىلىق جاعداي جەڭىلدەسە, كىتاپ باعاسى ارزانداي ما؟
– ءبىزدىڭ باسپا ەشقاشان ساپا مەن مازمۇننان ىمىرا ىزدەگەن ەمەس. ءبىز ءۇشىن كىتاپ – كوممەرتسيالىق ونىمنەن بۇرىن, قوعامدىق ماڭىزى بار رۋحاني قۇندىلىق. باعا ساياساتىندا دا وسى ۇستانىمنان تايعان جوقپىز. ەندى ققس-تىڭ جويىلۋى بىزگە بەلگىلى ءبىر يكەمدىلىك بەرەدى.
ماسەلەن, كەيبىر باسىلىمداردى كەڭ اۋديتورياعا قولجەتىمدى ەتۋگە, بۇرىننان جوسپارلانعان سەريالاردى ىسكە قوسۋعا, جاڭا اۆتورلارمەن جۇمىس ىستەۋگە مۇمكىندىك تۋادى. ەڭ باستىسى – ساپانى ۇستاپ تۇرىپ, مازمۇن مەن بەينەلەۋ مادەنيەتىن تەرەڭدەتە تۇسۋگە جول اشىلادى.
– ساپالى ادەبيەت دەگەندە ەڭ الدىمەن بالالار مەن وقۋشىلار ويعا ورالادى. باسپانىڭ وسى باعىتتاعى ۇستانىمى قانداي؟
– بالالار مەن جاسوسپىرىمدەرگە ارنالعان ادەبيەت – ءبىزدىڭ باستى باعىتىمىز. سەبەبى بۇل – ەلدىڭ بولاشاعىنا جاسالاتىن ينۆەستيتسيا. قازىرگى بالا – اقپاراتتى تەز قابىلدايتىن, ۆيزۋالدى جانە اناليتيكالىق ويلاۋعا بەيىم ۇرپاق. سوندىقتان كىتاپ ونىڭ تەك ءبىلىم كوزى عانا ەمەس, دۇنيەتانىمدىق سەرىگى دە بولۋى كەرەك.
سول سەبەپتى ءبىز تەك مازمۇندى عانا ەمەس, كوركەمدىك شەشىمدەردى, تىلدىك ۇيلەسىمدىلىكتى, يلليۋستراتسيا مەن قۇرىلىمدى تۇتاس ويلايمىز. جاڭا بۋىننىڭ تىلدىك مادەنيەتىن دامىتۋ ءۇشىن كوركەمدىك ساۋاتتىلىق پەن ەموتسيالىق تارتىمدىلىق قاتار ءجۇرۋى ءتيىس. وقۋلىقتار دا وسى تالاپتارعا ساي بولۋعا ءتيىس.
ءبىزدىڭ ماقساتىمىز – بالانىڭ ويلاۋ قابىلەتىن كەڭەيتىپ, ونىڭ بويىنا بىلىممەن بىرگە تالعام مەن سەزىنۋ مادەنيەتىن ءسىڭىرۋ.
– بۇل شەشىم مەكتەپكە ارنالعان وقۋ قۇرالدارىنىڭ ساپاسىنا قالاي اسەر ەتەدى؟
– وتە تىكەلەي ءارى ناقتى اسەر ەتەدى. قارجىلىق تۇراقتىلىق – مازمۇندى تەرەڭدەتۋدىڭ ەڭ باستى شارتى. قازىر بىزدە وقۋلىقتار مەن وقۋ قۇرالدارىنا دەگەن سۇرانىس جوعارى, ال ساپالى كونتەنتتى جاساۋ – ۇزدىكسىز ىزدەنىس پەن مامان ەڭبەگىن قاجەت ەتەدى.
ققس-تىڭ جويىلۋى بىزگە عىلىمي ساراپشىلارمەن, ادىسكەرلەرمەن, كوركەمدەۋشى ماماندارمەن ۇزاقمەرزىمدى جوبالاردا جۇمىس ىستەۋگە مۇمكىندىك بەرەدى. ەڭ باستىسى – بۇل جاعداي وقۋلىق دايىنداۋدىڭ قارقىنى مەن ساپاسىن تەڭ ۇستاۋعا جول اشادى. بالا تەك «جاتتاپ الاتىن» ەمەس, ءتۇسىنىپ, تالداپ وقيتىن كىتاپپەن جۇمىس ىستەۋى كەرەك.
– مۇنداي ناتيجەگە جەتۋ ءۇشىن ءسوزسىز بىرلىك پەن كاسىبي ىنتىماقتاستىق قاجەت بولعانى بەلگىلى. كىمدەردىڭ ەڭبەگىن ەرەكشە اتار ەدىڭىز؟
– بۇل – ءبىر ادامنىڭ ەمەس, تۇتاس سالانىڭ جەتىستىگى. ءبىز بىرلەسىپ ارەكەت ەتتىك. پوزيتسيامىزدى اشىق ايتىپ, كاسىبي ارگۋمەنتتەر ۇسىندىق. وسى تۇستا AmalBooks باسپاسىنىڭ نەگىزىن قالاۋشى باحىتجان بۋحاربايدىڭ بەلسەندىلىگىن ەرەكشە اتاپ وتكىم كەلەدى. ول بىرنەشە جۇمىس توبىنا قاتىسىپ, ناقتى ۇسىنىستار ازىرلەدى, سالا اتىنان ورىندى وي ايتتى. بۇل – كاسىبي ادالدىقتىڭ ۇلگىسى.
سونداي-اق ءماجىلىس دەپۋتاتى اسحات ايماعامبەتوۆتىڭ بۇل ماسەلەنى جۇيەلى تۇردە كوتەرۋى, مەملەكەتتىڭ قۇلاعىنا جەتكىزۋى ۇلكەن ءرول اتقاردى. وسىنداي جاۋاپكەرشىلىگى زور ازاماتتاردىڭ ارقاسىندا سالاعا دەگەن سەنىم مەن سەرپىن پايدا بولدى.
– سوڭعى سۇراق: ەندى قاي باعىتتا ىلگەرىلەيسىزدەر؟
– ەڭ الدىمەن, ءبىز بالالار مەن جاسوسپىرىمدەرگە ارنالعان زياتكەرلىك ادەبيەتتى دامىتۋدى جالعاستىرامىز. بۇل – ۇلتتىق سانانىڭ, تاريحي جادىمىزدىڭ, تىلدىك مادەنيەتىمىزدىڭ وزەگىنە اينالۋى كەرەك باعىت. سونىمەن بىرگە, مەكتەپ باعدارلاماسىنا قوسىمشا وقۋ قۇرالدارىن, اۆتورلىق ادىستەمەلەردى دامىتۋعا كۇش سالامىز.
Arman-PV – وقىرمان مەن ۇستازدىڭ سەنىمىنە يە بولعان باسپا. ەندى ءبىز وسى سەنىمدى تەرەڭدەتە وتىرىپ, ساپا مەن ماعىنا قاتار جۇرەتىن جاڭا جوبالارعا جول اشامىز.