اتىراۋ وبلىسىنىڭ دوسسور كەنتىندە اشىلعان جاڭا ءورت ءسوندىرۋ دەپوسى 40 شاقىرىم راديۋستاعى 15 مىڭنان استام ادامنىڭ ورتكە قارسى قاۋىپسىزدىگىن قامتاماسىز ەتىپ, توتەنشە جاعدايلارعا دەن قويۋ ۋاقىتىن ەداۋىر قىسقارتادى, دەپ جازادى Egemen.kz.
سالتاناتتى اشىلۋ راسىمىنە توتەنشە جاعدايلار ءمينيسترى گەنەرال-مايور شىڭعىس ءارىنوۆ پەن اتىراۋ وبلىسىنىڭ اكىمىنىڭ ورىنباسارى قايرات نۇرتاەۆ قاتىستى.
تج ءمينيسترىنىڭ ايتۋىنشا جاڭا دەپودا قۇتقارۋشىلاردىڭ تۇرمىسى مەن جاراقتاندىرىلۋى ەلوردالىق بولىمدەردەن كەم تۇسپەيتىن دەڭگەيدە قامتاماسىز ەتىلگەن. بۇل ءتاسىل شاقىرۋلارعا تەز دەن قويۋعا مۇمكىندىك بەرىپ قانا قويماي, وڭىرلەرگە بىلىكتى كادرلاردى تارتۋعا جانە ولاردىڭ سول جەردە تۇراقتى قىزمەت اتقارۋىنا سەپتەسەدى.
«مۇنداي جوبالاردىڭ جەرگىلىكتى اكىمدىكتەردىڭ بەلسەندى قولداۋىمەن جۇزەگە اسىرىلىپ جاتقانى ەرەكشە ماڭىزدى – بۇل جەرگىلىكتى جەرلەردە توتەنشە جاعدايلاردىڭ پروفيلاكتيكاسى مەن ولارعا دايىندىقتىڭ ماڭىزدىلىعىن تۇسىنەتىنىن كورسەتەدى. بۇگىنگى جاڭالىق ءتاسىلدىڭ وزگەرىپ جاتقانىن راستايدى: ءبىز جاڭا نىسانداردى سالىپ قانا قويماي, ءتيىمدى جۇمىس ىستەۋ ءۇشىن تولىققاندى جاعداي جاسايمىز», دەدى مينيستر.
توتەنشە جاعدايلار مينيسترلىگىنىڭ ءباسپاسوز قىزمەتىنىڭ مالىمدەۋىنشە زاماناۋي مودۋلدىك عيمارات جەرگىلىكتى بيۋدجەت ەسەبىنەن قىسقا مەرزىمدە سالىنعان ءارى تاۋلىك بويى جۇمىس ىستەۋگە قاجەتتى بارلىق زاتتارمەن جابدىقتالعان: ديسپەتچەرلىك بولمە, وقۋ سىنىبى, دەمالىس بولمەلەرى, اس ءۇي. كەزەكشى اۋىسىمنىڭ قاراماعىندا – ءۇش ماشينا, ونىڭ ىشىندە اۆتوتسيستەرنالار مەن جەدەل دەن قويۋ اۆتوكولىگى بار.
دوسسور كەنتىندە دەپو اشۋ اۋىلدىق جەرلەردە ورتكە قارسى ينفراقۇرىلىمدى دامىتۋ جونىندەگى مەملەكەتتىك باعدارلامانىڭ بولىگى بولىپ تابىلادى. بيىل وبلىستىڭ بىرنەشە اۋداندارىندا وسىنداي نىسانداردى سالۋ جوسپارلانىپ جاتىر.