ەلىمىزدىڭ قارۋلى كۇشتەرى 2014 جىلدان بەرى بىرىككەن ۇلتتار ۇيىمىنىڭ بىتىمگەرلىك قىزمەتىنە ءوز ۇلەسىن قوسىپ كەلەدى. وسى ۋاقىت ىشىندە 80 ازامات بايقاۋشى جانە شتاب وفيتسەرى رەتىندە بىرنەشە ميسسياعا اتسالىسسا, 700-گە جۋىق اسكەري قىزمەتشى بۇۇ-نىڭ ارنايى وپەراتسيالارىنا قاتىسقان. ال وتكەن جىلدان باستاپ ەلىمىز بىتىمگەرلىك قىزمەتتى دەربەس قۇراممەن ءوز بەتىنشە ورىنداۋعا كىرىستى.
جۋىردا سيريا مەن يزرايل اراسىنداعى گولان جوتالارىندا ءبىر جىلدىق بىتىمگەرلىك ميسسياسىن ويداعىداي اياقتاعان ءبىر توپ اسكەري قىزمەتشىمىز ەلگە ورالعان سوڭ, ولاردى جوعارعى باس قولباسشى قاسىم-جومارت توقاەۆ قابىلداعانى بەلگىلى. سول كەزدەسۋدە مەملەكەت باسشىسى: «بۇل اسكەرىمىزدىڭ اسا كۇردەلى مىندەتتەردى ورىنداۋعا قابىلەتتى ەكەنىن كورسەتەدى. سىزدەر سيريا داعدارىسىنىڭ شەشۋشى ساتىندە ۇتىمدى ءارى باتىل ارەكەت جاسادىڭىزدار. قازاقستان ارمياسىنىڭ كاسىبي دەڭگەيى جوعارى ەكەنىن دالەلدەپ بەردىڭىزدەر. سول كۇندەرى قازاق جاۋىنگەرىنىڭ اسقاق رۋحى مەن قايسارلىعىنا بۇكىل الەم كۋا بولدى», دەپ باعا بەرىپ, بىرقاتار وفيتسەر مەن ساربازدى گولان جوتالارىندا كورسەتكەن ەرلىگى مەن جانقيارلىعى ءۇشىن مەملەكەتتىك ناگرادالارمەن ماراپاتتادى.
سولاردىڭ ءبىرى – قورعانىس مينيسترلىگى بىتىمگەرلىك وپەراتسيالار ورتالىعىنىڭ باسقارما باستىعى, سيرياعا اتتانعان العاشقى ۇلتتىق بىتىمگەرلىك كونتينگەنتتىڭ كومانديرى, پودپولكوۆنيك جىگەر ايىپوۆ. پرەزيدەنتتىڭ قولىنان ساعادات نۇرماعامبەتوۆ اتىنداعى I دارەجەلى «ايبىن» وردەنىن كەۋدەسىنەن تاققا كەيىپكەرىمىزدىڭ ايتۋىنشا, ءاۋ باستا ونىڭ اسكەري سالانى تاڭداۋىنا شىعىس قازاقستان وبلىسىنىڭ قاتونقاراعاي اۋدانىنداعى بالالىق شاعى وتكەن ورەلى اۋىلىنىڭ شەكارا زاستاۆاسىنا جاقىن ورنالاسۋى سەبەپ بولىپتى.
«بالا كۇنىمنەن اسكەري كيىمدەگى شەكاراشىلاردى كورىپ, سولار سياقتى بولۋدى ارماندايتىن ەدىم. وسى ارمانىم العا جەتەلەپ, استاناداعى ساعادات نۇرماعامبەتوۆ اتىنداعى «جاس ۇلان» رەسپۋبليكالىق مەكتەبىنە وقۋعا ءتۇستىم. 2004 جىلى ونى بىتىرگەن سوڭ, رەسەيدەگى اۋە-دەسانتتىق ۋچيليششەسىندە ءبىلىم الدىم», دەيدى ول.
2009 جىلى ەلگە ورالعان جىگەر مۇرات ۇلى اەروۇتقىر اسكەرلەرى قاتارىن تولىقتىرادى. كەيىن دەسانتتىق-شابۋىلداۋشى اسكەرلەر بولىپ قايتا قۇرىلعان وسى اسكەري قۇرىلىم قاتارىندا تالدىقورعان, قوناەۆ, الماتى قالالارىندا ۆزۆود كومانديرىنەن باستاپ بىتىمگەرلىك پولكتىڭ شتاب باستىعىنا دەيىنگى ءتۇرلى قىزمەت تىزگىنىن ۇستاعان سوڭ, 2022 جىلى قورعانىس مينيسترلىگى بىتىمگەرلىك وپەراتسيالار ورتالىعىنىڭ وقۋ ۇدەرىسىن قامتاماسىز ەتۋ باسقارماسىنىڭ باستىعى لاۋازىمىنا تاعايىندالادى. سودان بىلتىر ەلىمىزدىڭ تۇڭعىش ۇلتتىق بىتىمگەرلەر كونتينگەنتىن باستاپ گولان جوتالارىنا اتتاندى.
«شەتەلگە بىتىمگەر رەتىندە بارۋعا, ارينە, اسكەري قىزمەتشىنىڭ ءوز قالاۋى بولۋى كەرەك. ەگەر ادام ءوزى بارعىسى كەلسە, ول الدىمەن قاتاڭ ىرىكتەۋدەن وتەدى. بىرىنشىدەن – مەديتسينالىق, ەكىنشىدەن – پسيحولوگيالىق, ۇشىنشىدەن – دەنە دايىندىعى تەكسەرىسىنەن سۇرىنبەۋى قاجەت. سونداي-اق ماماندىعى بويىنشا سىناق تاپسىرادى. بۇعان قوسا وفيتسەرلەر مەن سەرجانتتار مىندەتتى تۇردە اعىلشىن ءتىلىن ءبىلۋى كەرەك», دەيدى كەيىپكەرىمىز.
بىلتىر 14 ناۋرىزدا 139 ادامنان تۇراتىن بىتىمگەرلىك كونتينگەنتى الماتى قالاسىنان گولان جوتالارىنا جەتكەن سوڭ, سول جاقتا ءبىر جىل بىتىمگەرلىك ميسسياسىن اياقتاعان يرلانديانىڭ كونتينگەنتىن الماستىرعان. جالپى, سيريا مەن يزرايل اراسىنداعى داۋلى ايماق سانالاتىن بۇل ولكەدە قازاقستاننان بولەك, ءۇندىستان, نەپال, اۋستراليا سەكىلدى 12 ەلدىڭ دە اسكەريلەرى قىزمەت وتكەرىپ جاتىر.
ء«بىز گولان جوتالارىندا ورنالاسقان بىرىككەن ۇلتتىق ۇيىمى ميسسياسى قولباسشىسىنىڭ رە-زەرۆى رەتىندە قىزمەت ەتتىك. باستى ماقساتىمىز – يزرايل مەن سيريا اراسىنداعى اتىستى توقتاتۋ تۋرالى كەلىسىمنىڭ ساقتالۋىن قاداعالاۋ. وسى ماقساتتا ءبىزدىڭ قاراماعىمىزداعى بۇۇ پولكپوستتارىن كۇزەتۋ, پاترۋلدەۋ, جارىلىس قاۋپى بار زاتتاردى جويۋ, سونداي-اق بۇۇ پەرسونالدارىن الىپ ءجۇرۋ مەن ەۆاكۋاتسيالاۋ جونىندەگى مىندەتتەردى ورىندادىق», دەيدى ول.
ج.مۇرات ۇلىنىڭ ايتۋىنشا, جەرگىلىكتى حالىق قازاق جاۋىنگەرلەرىن «بەيبارىس سۇلتان مەن ءال-ءفارابيدىڭ ۇرپاقتارى كەلدى» دەپ قۇرمەتپەن قارسى العان.
«سيريالىقتاردىڭ قازاقتارعا دەگەن كوزقاراسى جاقسى ەكەن. بىزگە ۇنەمى جىلى ءىلتيپات ءبىلدىرىپ تۇردى. ءبىز ول جاقتا ءجۇرىپ بەيبىتشىلىك دەگەن ۇعىمنىڭ قادىرىن تۇسىندىك. بۇل – مەنىڭ عانا ەمەس, بىرگە بولعان بارلىق ارىپتەسىمنىڭ پىكىرى. ەلدەگى بۇگىنگى تىنىشتىق پەن تاتۋلىقتى باعالاۋ كەرەك دەگەن وي ءتۇيىپ قايتتىق. كەز كەلگەن نارسەنىڭ قۇنى سالىستىرۋ ارقىلى بەلگىلى بولادى عوي. سيرياداعى حالىقتىڭ ءومىرىن, بولىپ جاتقان ءتۇرلى جانجالدى كورىپ, «جاقسى داۋدان جامان ءبىتىم ارتىق» دەگەن ءتامسىل ەسكە ءتۇستى», دەيدى پودپولكوۆنيك.
ءساۋىر ايىندا ەلىمىزدىڭ العاش-قى دەربەس ۇلتتىق كونتينگەنتى قايتىپ ورالعان سوڭ, 139 ادامنان تۇراتىن ەكىنشى كونتينگەنت سيرياعا اتتانعان ەدى. ولاردىڭ الدىنا دا ءبىرىنشى قۇرامعا جۇكتەلگەن مىندەتتەر قويىلىپ وتىر.
ء«بىزدى جوعارعى باس قولباسشىمىز, ەلىمىزدىڭ پرەزيدەنتى قاسىم-جومارت كەمەل ۇلى قابىلداپ, ىزگى سوزدەرىن ارناپ, كەۋدەمىزگە ماراپات تاققانى مەنىڭ ومىرىمدەگى ەڭ قۋانىشتى ءساتتىڭ ءبىرى بولدى. ءاربىر اسكەري قىزمەتشى ءۇشىن ەڭبەگىنىڭ باعالانعانىنان ارتىق سىي جوق. مەملەكەت باسشىسىنا, قورعانىس مينيسترلىگى باسشىلىعىنا ءبىزدى ۇلكەن قۇرمەتپەن قارسى الىپ, ماراپاتتاعانى ءۇشىن جەكە قۇرامنىڭ اتىنان العىسىمدى بىلدىرەمىن», دەدى ج.ايىپوۆ.
ونىڭ ايتۋىنشا, شىن مانىندە, ءبىر جىل بويى شەت جەردە ءجۇرىپ جيناقتاعان تاجىريبە – وتاندىق اسكەري قىزمەتشىلەر ءۇشىن قۇندى جەتىستىك. الداعى ماقسات – وسى تاجىريبەنى اسكەري سالاعا ەنگىزىپ, ءىزباسار جاۋىنگەرلەردى دە بىتىمگەرلىك قىزمەتكە باۋلۋ. بۇل ارميامىزدىڭ كۇش-قۋاتىن ودان ءارى ارتتىرۋمەن قاتار, قازاق ەلىنىڭ بەيبىتسۇيگىش مەملەكەت ەكەنىن دۇنيەگە ايگىلەمەك.