قورعانىس ءمينيسترىنىڭ تاربيە جانە يدەولوگيالىق جۇمىس جونىندەگى ورىنباسارى گەنەرال-مايور شايح-حاسان جازىقباەۆ پەن الماتى قالاسى اكىمىنىڭ ورىنباسارى ازامات قالدىبەكوۆ اسكەري وركەستردىڭ سۇيەمەلدەۋىمەن سيمۆولدىق لەنتانى سالتاناتتى جاعدايدا كەستى.
ءىس-شاراعا الماتى وڭىرلىك گارنيزونىنىڭ, ۇلتتىق ۇلاننىڭ, ۇقك شەكارا قىزمەتى اكادەمياسىنىڭ باسشىلىعى, قارۋلى كۇشتەردىڭ ارداگەرلەرى, اسكەري جوعارى وقۋ ورىندارىنىڭ كۋرسانتتارى جانە «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى قاتىستى.
جيىندى قورعانىس ءمينيسترىنىڭ ورىنباسارى گەنەرال-مايور شايح-حاسان جازىقباەۆ اشتى.
– ءبىزدىڭ اتا-بابالارىمىز وسى قارۋ-جاراق پەن اسكەري تەحنيكامەن ماسكەۋ مەن لەنينگرادتى قورعادى, ستالينگراد پەن رجەۆ ماڭىنداعى قاندى شايقاستارعا قاتىسىپ, ۋكراينا مەن بەلارۋستى, بالتىق جاعالاۋى مەن پولشانى ازات ەتتى, ءبىراز ەۋروپا ەلدەرىندەگى شايقاستارعا قاتىستى. بۇل مۇراجاي بۇگىنگى بۋىنعا قازاقستاندىق جاۋىنگەرلەر – باۋىرجان مومىش ۇلى, ساعادات نۇرماعامبەتوۆ, تالعات بيگەلدينوۆ, سەرگەي لۋگانسكي, راحىمجان قوشقارباەۆ, قاسىم قايسەنوۆ, مانشۇك مامەتوۆا, ءاليا مولداعۇلوۆا جانە تاعى باسقا باتىرلاردىڭ سۇراپىل سوعىس جىلدارىنان قالعان جادىگەرلەرىن كورسەتەتىن ورىن, – دەدى ول.
28 پانفيلوۆشىلار ساياباعىنا جانە ارميا ۇيىنە كەلۋشىلەر ۇلى وتان سوعىسى جىلدارىندا كەڭەس اسكەرلەرى قارۋلانعان اسكەري تەحنيكانى, ياعني ت-34, ت-44, ت-55 تانكتەرىن, 1931 جىلعى 230 مم گاۋبيتسالارىن جانە «كاتيۋشا» رەاكتيۆتى ارتيللەرياسىنىڭ ايگىلى بم-13 جاۋىنگەرلىك ماشيناسىن كورە الادى.
بيىل سونداي-اق, ۇلى وتان سوعىسىنداعى جەڭىستىڭ 80 جىلدىعىنا وراي ارميا ءۇيى قالپىنا كەلتىرىلدى. ونىڭ الدىڭعى جاعىندا جاستارعا اسكەري-پاتريوتتىق تاربيە بەرۋ ۇردىستەرىن كورسەتەتىن زاماناۋي بارەلەف ورناتىلعان.
ارميا ءۇيىنىڭ عيماراتىندا ۇلتتىق اسكەري-پاتريوتتىق ورتالىقتىڭ فيليالى بار. اشىلعاننان كەيىن وندا بالالار اسكەري-پاتريوتتىق كلۋبتارى جۇمىس ىستەي باستايدى. كونتسەرتتىك جانە ءمارمار زالداردا, جاۋىنگەرلىك داڭق مۇراجايىندا كۇردەلى جوندەۋ جۇرگىزىلدى. بالالاردىڭ اسكەري-پاتريوتتىق فيلمدەرىن ءتۇسىرۋ ءۇشىن ۇلكەن زاماناۋي كينوپاۆيلون قۇرىلدى.
– الماتى ءۇشىن ارميا ءۇيىنىڭ مادەني ماڭىزى زور. عيمارات ساۋلەت ەسكەرتكىشى رەتىندە بەلگىلى. ءبىز قالانىڭ جانە بۇكىل قازاقستاننىڭ ەڭ قاسيەتتى كورىكتى جەرلەرىنىڭ ءبىرى رەتىندە ونىڭ تازا كەلبەتىن قاستەرلەپ, ساقتاۋعا مىندەتتىمىز, – دەپ اتاپ ءوتتى قورعانىس ءمينيسترىنىڭ ورىنباسارى.