ەلىمىزدىڭ شىعىستاعى شەكارالىق ءوڭىرىنىڭ ءبىرى – ۇيعىر اۋدانىنىڭ ورتالىعى شونجى اۋىلى بۇگىن ەرەكشە قاربالاسقا تولى. ويتكەنى, مۇندا ەلىمىزدىڭ تۇكپىر-تۇكپىرىنەن قاراقۇرىم حالىق جينالعان. ولار ۇقك شەكارا قىزمەتى الماتى وبلىسى بويىنشا دەپارتامەنتىنىڭ رايىمبەك اۋدانى بويىنشا شەكارا باسقارماسىندا وتەتىن انت قابىلداۋ ءراسىمىن كورمەك, دەپ جازادى Egemen.kz.
بەلگىلەنگەن ۋاقىتتا سالتاناتتى ساپقا تۇرعان 300-گە تارتا سارباز ءۇشىن ماڭىزدى ءسات تە كەلىپ جەتتى. دەپارتامەنت باستىعى, پولكوۆنيك الىبەك كايۋپوۆتىڭ بۇيرىعىمەن, ەلىمىزدىڭ اسپان تۇستەس تۋى ورتاعا شىعارىلعان سوڭ, ءانۇران دا قالىقتاپ الا جونەلدى. ءاربىر جاننىڭ جۇدىرىقتاي جۇرەگىندە ماڭگى ساقتالىپ قالاتىن ءساتتى سۋرەتكە ءتۇسىرىپ العان سوڭ, ءبىز دە قولىمىزدى كەۋدەمىزگە قويۋعا اسىقتىق...
«مەن قاتارداعى جاۋىنگەر...» ورتاعا شىققان ءاربىر ساربازدىڭ ايتار ءسوزى وسىلاي باستالادى. ءارى قاراي, وتانىنا ادال قىزمەت ەتۋگە انت بەرگەن شەكاراشىنى پولكوۆنيك ءا.كايۋپوۆ, ۇيعىر اۋدانىنىڭ اكىمى ب.ەلەۋسىزوۆا مەن شەكاراشى ارداگەرلەر قۇتتىقتاۋعا كىرىستى. ءوز كەزەگىمىزدە, ءبىز – دەپارتامەنت پەن اۋدانى اكىمىنىڭ ءباسپاسوز حاتشىلارى دا وسىناۋ ماڭىزدى ءساتتى قالت جىبەرمەدىك.
انت قابىلداۋ اياقتالعان سوڭ, جيىننىڭ نەگىزگى ءبولىمى باستالدى. الدىمەن دەپارتامەنت باستىعى «سارباز 2.0» باعدارلاماسىنا قاتىسىپ, وزدەرى قالاعان جوعارى وقۋ ورنىندا تەگىن وقۋعا گرانت ۇتىپ العان «كوكتەم-2024» شاقىرىلىمىنىڭ جەتى ساربازىنا سەرتيفيكات تاپسىردى. وسىدان كەيىن الىبەك امانگەلدى ۇلى, بوتا سەرىكقىزى, شەكاراشى ارداگەرلەردىڭ اتىنان وتستاۆكاداعى پولكوۆنيك داۋلەتقالي مامىرحانوۆ ساربازداردى انت قابىلداۋىمەن قۇتتىقتاپ, الداعى قىزمەتتەرىنە ساتتىلىك تىلەدى.
جىلىنا ەكى مارتە, كوكتەم مەن كۇز ايلارىندا ءوتىپ تۇراتىن مۇنداي راسىمدەردى ساحنالىق كورىنىستەرسىز ەلەستەتۋ مۇمكىن ەمەس. ويتكەنى جاس ساربازدار دا, ولاردىڭ الىستان اسىعىپ جەتكەن اتا-انالارى دا شەكاراشىلار اتقاراتىن قىزمەت تۋرالى بىلۋگە ءتيىس. سوندىقتان الاڭعا ءبىرىنشى بولىپ شىققان كينولوگ پەن ونىڭ قىزمەتتىك ءيتى جاتتىعۋلاردى شەبەر ورىنداعان سوڭ, كەزەك اتتىڭ قۇلاعىندا وينايتىن اتبەگىلەرگە بەرىلدى. تۇياقتارىمەن جەر تارپىعان قىزمەت اتتارى تاۋ مەن تاستىڭ اراسىنداعى شەكارا سىزىعىن باقىلاۋدا تاپتىرمايتىن كولىك ەكەندىگى ەرتەدەن-اق بەلگىلى. ال شەكارا بۇزۋشىنى ىزدەستىرۋدە, ەسىرتكى زاتتارىن انىقتاۋدا شەكاراشى ساربازدار قىزمەتتىك ءيىسشىل يتتەردىڭ كومەگىنە جۇگىنەدى.
ءارى قاراي, شەكارا باسقارماسىنىڭ ماڭىزدى تاپسىرمالارىن ورىنداۋمەن اينالىساتىن سايىپقىراندارى دا الاڭدى «دۇربەلەڭگە» تولتىرىپ جىبەردى. قويان-قولتىق ۇرىس, شەكارا بۇزۋشىنى ۇستاۋدىڭ ءادىل-ءتاسىلى – وسىنىڭ بارلىعى شەكاراشىلاردىڭ جاۋىنگەرلىك دايارلىقتارى جوعارى دەڭگەيدە ەكەنىن كورسەتىپ تۇر.
اسەرلى كورىنىستەردى قىزىعا تاماشالاعان ات-انانىڭ ءبىرىن سوزگە تارتقان ەدىك. سويتسەك, ول ۇلتى ورىس بولسا دا قازاقشاعا سۋداي قىزىلوردا قالاسىنىڭ تۇرعىنى ەكەن. ۇلى تەمىر ايتماننىڭ ومىرىندەگى ايتۋلى ساتكە كۋا بولۋ ءۇشىن كەلگەن ناتاليا گريگورەۆا: «بۇگىن مەن ۇلىم ءۇشىن قاتتى قۋانىپ تۇرمىن. شەكاراشى اتانىپ, وتانىن قورعايتىن ازاماتقا اينالعانىن كورۋدەن اسقان باقىت بار ما؟ اسكەرگە دە ءوزى سۇرانىپ كەتتى. جاقسى جەرگە تۇسكەنىن كورىپ, كوڭىلىم كوتەرىلدى. نە ايتامىن, ق ۇلىنىم بەرگەن انتىنا ادال بولىپ, تۋعان ەلىن قورعاسىن», دەپ انالىق اق تىلەگىن جەتكىزدى.
وسىلايشا, شەكاراداعىداي «قاس-قاعىم, قاربالاسپەن» وتكەن ءراسىمنىڭ سوڭى ساربازداردىڭ ساپتىق انىنە ۇلاستى. بۇدان كەيىن اتا-انالار سارباز ۇلدارىمەن قاۋىشىپ, ىستىق ساعىنىشتارىن باستى...