اقتوبەلىك ستۋدەنت جاساندى ينتەللەكتىنىڭ كومەگىمەن ءاليا مولداعۇلوۆا تۋرالى كوميكس جاساپ شىعاردى. كوركەماي ەلەۋسىز بۇل ەرەكشە جوباسىن قازاقتىڭ قايسار قىزىنىڭ تۋعانىنا 100 جىل تولۋىنا وراي ازىرلەگەن. اۆتور باتىردىڭ ەرلىگى مەن ءومىر جولىن جەڭىل, كوركەم ءارى تارتىمدى فورماتتا ۇسىنعان.
Heriot-Watt ۋنيۆەرسيتەتىنىڭ اقتوبە كامپۋسىندا 2-كۋرس وقيتىن كوركەماي كوميكس يدەياسىن جۇزەگە اسىرۋ بارىسىندا جاساندى ينتەللەكت قۇرالدارىن پايدالانىپ, كەڭەس وداعىنىڭ باتىرى ءاليا مولداعۇلوۆانىڭ ومىرىندەگى ماڭىزدى وقيعالاردى مەكتەپ وقۋشىلارىنا تۇسىنىكتى ءارى اسەرلى ەتىپ بەينەلەۋگە تىرىسقان. جوبا جاس وقىرماننىڭ پاتريوتتىق سەزىمىن وياتۋدى كوزدەيدى.
– قازىر كوميكس جاسوسپىرىمدەر اراسىندا جاي عانا سۋرەتتى كىتاپ ەمەس, بۇل تاربيەلىك ءمانى بار, شابىت سىيلايتىن قۇرالعا اينالدى. وسىنى ەسكەرىپ, ۇلتتىق رۋحاني قۇندىلىقتاردى جاڭعىرتۋعا ۇلەس قوسقىم كەلدى. وسىلايشا, تاريحي دەرەكتەرگە سۇيەنىپ ءاليا مولداعۇلوۆانىڭ مايدانداعى ەرلىگىن قىسقا ەپيزودتارمەن جاڭا فورمادا ۇسىندىم, – دەيدى ك.ەلەۋسىز.
جوبا عىلىم جانە جوعارى ءبىلىم مينيسترلىگىنىڭ نازارىنا ىلىگىپ, رەسمي پاراقشاسىندا جاريالاندى. بولاشاقتا اۆتور بۇل فورماتتا باسقا دا قازاق باتىرلارى تۋرالى سەريالار ازىرلەۋدى جوسپارلاپ وتىر.