جەڭىستىڭ 80 جىلدىعىنا ارنالعان سالتاناتتى شەرۋگە ەلىمىزدىڭ ءار تۇكپىرىنەن كەلگەن اسكەري قۇرىلىمدار اسقان جاۋاپكەرشىلىكپەن ساپ تۇزەپ جاتىر. بۇگىن قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرىنىڭ 19132 اسكەري اۆياتسيالىق بازاسى شەرۋگە دايىندىق بارىسىن كورسەتتى, دەپ حابارلايدى Egemen.kz.
بازانىڭ اۋماعىندا قاربالاس تىرشىلىك. ءار بۇيرىق – ناقتى, ءار قوزعالىس – ۇيلەسىمدى. مۇندا تەك اسكەري ءتارتىپ قانا ەمەس, جۇرەكتەگى سەنىم مەن ۇلت الدىنداعى جاۋاپكەرشىلىك بيلىك قۇرعان.
19132 اسكەري بازاسىنىڭ ۇجىمى شەرۋگە قاتىسۋعا دايىندىقتى ءبىر اي بۇرىن باستاعان. پارادقا 66 ءتۇرلى اۋە تەحنيكالارى جۇمىلدىرىلعان. ولاردىڭ قاتارىندا تىكۇشاقتار, مايدان, اسكەري كولىك جانە ارميالىق اۆياتسيا بار. سونىمەن قاتار, رەزەرۆتىك ۇشاقتار مەن ەكيپاجدار قامتاماسىز ەتىلگەن.
تەحنيكالىق قىزمەت كورسەتۋ ءبولىمى كۇن سايىن تاڭنان كەشكە دەيىن جۇمىس ىستەپ, ءاربىر ۇشاقتىڭ ۇشۋ جارامدىلىعىن مۇقيات تەكسەرىپ وتىر. قوزعالتقىشتار مەن باسقارۋ جۇيەلەرى, قارۋ-جاراق پەن بايلانىس قۇرالدارى, ءتىپتى ۇشاق سىرتىنا جاعىلاتىن بوياۋ مەن ەمبلەماعا دەيىن پاراد تالاپتارىنا ساي جاڭارتىلعان. بۇل كورەرمەن ءۇشىن كوز تارتارلىق كورىنىس بولسا, اسكەري ۇجىم ءۇشىن ماقتانىش پەن ءمىنسىز ساپانىڭ كورىنىسى.
تەحنيكا قانشالىقتى مىقتى بولسا دا, ونى كوككە كوتەرەتىن – ۇشقىش. ارقايسى پاراد ساپىندا ۇشىپ شىعۋ تەك مانساپتىق مارتەبە ەمەس, جۇرەكپەن سەزىنەتىن ۇلكەن جاۋاپكەرشىلىك ەكەنىن اتاپ ءوتتى. ولار كۇن سايىن بىرنەشە ساعات بويى اۋەدە جاتتىعىپ, ساپتىق ۇشۋلاردى پىسىقتاۋ ۇستىندە. ايتا كەتەيىك, بۇعان دەيىن بەس وقۋ-جاتتىعۋ جيىنىن وتكىزگەن. اسكەري شەرۋگە دەيىن شامامەن تاعى ءۇش جاتتىعۋ وتكىزىلەدى دەپ جوسپارلانعان.
«اۆياتسيا ءۇشىن كەز كەلگەن ۇشىپ كوتەرىلۋ بەلگىلى ءبىر دارەجەدەگى تاۋەكەل. سول تاۋەكەلدەردى بارىنشا ازايتۋ ءۇشىن ەڭ الدىمەن بارلىق دايىندىق جەر ۇستىندە مۇقيات جۇرگىزىلەدى. اۋە كۇشتەرىنىڭ ۇشۋ قۇرامدارى بىرلەسكەن ارەكەتتى جەتىلدىرۋ ماقساتىندا وقۋ-جاتتىعۋ جۇمىستارىن جۇرگىزىپ جاتىر. قازىر ەكيپاجداردىڭ ۇيلەسىمدى جۇمىسىن ارتتىرۋعا باسىمدىق بەرىلگەن», دەدى اۋە كۇشتەرى قولباسشىسىنىڭ ينجەنەرلىك-اۆياتسيالىق باسقارماسىنىڭ اعا ينجەنەر-ينسپەكتورى, مايور ازامات تەمىرعالي.
بيىل اسكەري شەرۋگە قازاقستان قارۋلى كۇشتەرىنىڭ اۋە قورعانىسى كۇشتەرىنەن 1301 ادام قاتىسادى. ونىڭ ىشىندە 531 اسكەري قىزمەتشى – جاياۋ ساپتىق قۇرامدا, 178 – ۇشۋ قۇرامىندا, 22 – مەحانيكالاندىرىلعان كولوننا ەكيپاجىندا, 570 – قامتاماسىز ەتۋ بولىمدەرىنەن. سونىمەن قاتار پارادقا ءتۇرلى ۇرىس تارتىبىندە ساپ تۇزەي وتىرىپ, ا-400م, ل-410, ل-39NG سەكىلدى العاش رەت قاتىسىپ وتىرعان زاماناۋي ۇشاقتار قاتىسادى. شەرۋ سوڭىندا 6 سۋ-25 ۇشاعى قازاقستاننىڭ مەملەكەتتىك تۋى بەينەلەنگەن ءتۇتىن جولاقتارىن قالدىرىپ, اۋەدەگى پارادتى تۇيىندەيدى.