اسا كورنەكتى فولكلورتانۋشى, اكادەميك, فيلولوگيا عىلىمدارىنىڭ دوكتورى, مەملەكەتتىك سىيلىقتىڭ لاۋرەاتى سەيىت اسقار ۇلى قاسقاباسوۆ ۇلت عىلىمىنىڭ الىپ دىڭگەگى ەدى. سول دىڭگەك قۇلادى.
ۇلىلار توپىراعىندا تۋعان عالىم جاس كۇنىنەن ادەبيەتتانۋ عىلىمىنا قۇلاش ۇردى. بۇرىن كوپ عالىم جۇرەكسىنگەن تاقىرىپقا تۇرەن سالدى. قازاق فولكلورىنىڭ تەورياسى مەن ءادىسناماسىنا ءۇڭىلدى. حالىق اۋىز ادەبيەتى مۇرالارىنىڭ تەكستولوگياسىن زەرتتەدى.
ادەبيەت پەن ونەردىڭ ىقپالداستىعىن زەردەلەدى. قيال-عاجايىپ ەرتەگىلەرىنەن كانديداتتىق, قازاق حالىق پروزاسىنان دوكتورلىق ديسسەرتاتسيا قورعادى. ايتۋلى تۇلعانىڭ تاڭداۋلى ەڭبەكتەرى شەتەلدىك عىلىمي ورتادا دا وتە جوعارى باعالاندى.
اكادەميكتىڭ «كازاحسكايا ۆولشەبنايا سكازكا», «قازاقتىڭ حالىق پروزاسى», «رودنيكي يسكۋسستۆا», «كولىبەل يسكۋسستۆا», «كازاحسكايا نەسكازوچنايا پروزا», «اباي جانە فولكلور», «زولوتايا جيلا», «جانازىق», «قوزى كورپەش–بايان سۇلۋ». «قىز جىبەك», «قازاقتىڭ عاشىقتىق جىرلارى», «XV–XVIII عاسىرلارداعى قازاق ادەبيەتى», «و فولكلورە ي نە تولكو», «ەلزەردە», ت.ب. مونوگرافيالارى عىلىمداعى بيىك جانە جاۋاپتى دەڭگەيىن كورسەتتى.
سەيىت قاسقاباسوۆ كورنەكتى عالىم عانا ەمەس, قابىرعالى قايراتكەر ەدى. ەل تاۋەلسىزدىگىن قالىپتاستىرۋعا وراسان ەڭبەك ءسىڭىردى. 1988 جىلى قازاقستان كومپارتياسى ورتالىق كوميتەتىندە جاۋاپتى قىزمەت اتقارا ءجۇرىپ, الاش ارداقتىلارىن اقتاۋعا ۇلەس قوستى. ءىرى ۇلتتىق رۋحاني جوبالاردى جۇزەگە اسىردى. «Egemen Qazaqstan» گازەتىندەگى سۇبەلى ماقالالارى مەن سۇحباتتارى ەل اقىل-ويىنىڭ ولجاسى بولىپ قالدى.
بىرنەشە ۋنيۆەرسيتەتتە تۇراقتى ءدارىس وقىدى. فولكلورتانۋدا ساۋاتتى مەكتەپ قالىپتاستىردى.
عۇلامانىڭ الدى – وزىنە, سوڭى – ۇلت عىلىمىنا جارىق بولسىن!
«Egemen Qazaqstan» قالامگەرلەرى