بيىلعى مەرەكە قازاقستان حالقى اسسامبلەياسىنىڭ 30 جىلدىعىنا وراي «بىرلىگى جاراسقان الماتى» ۇرانىمەن ۇيىمداستىرىلىپ, نەگىزگى شارالار اباي الاڭىندا وتەدى, دەپ جازادى Egemen.kz.
ساعات 11:00-دەن 12:15-كە دەيىن باس ساحنادا ەلىمىزدىڭ ەتنيكالىق جانە مادەني ارتۇرلىلىگىن تانىتاتىن قازاقستاندىق ورىنداۋشىلار مەن شىعارماشىلىق ۇجىمدار ونەر كورسەتەدى. كورەرمەندەرگە ۆوكالدى جانە اسپاپتىق شىعارمالار, حالىق بيلەرى مەن زاماناۋي كومپوزيتسيالار ۇسىنىلادى.
ساحنا تورىندە L Duo دۋەتى, پيانيست تەمىرلان بەيسەنباي (Ratovich), «Diamond» سترۋندى تريوسى, دۋدۋكيست مەيىرمان ابدراحمان ۇلى, «دەرۆيشي», «Made in KZ» توپتارى مەن باشقۇرتستاننان كەلگەن «Ay Yola» توبى ونەر كورسەتەدى. كۇندىزگى كونتسەرت قازاقستاننىڭ حالىق ءارتيسى روزا رىمباەۆانىڭ ورىنداۋىمەن قورىتىندىلانادى.
12:15-تەن 16:00-گە دەيىن ەتنومادەني بىرلەستىكتەردىڭ شىعارماشىلىق ۇجىمدارى مەرەكەلىك كونتسەرتتى جالعاستىرادى. ال كەشكى ساعات 19:00-دە اباي الاڭىندا قازاقستاندىق ەسترادا جۇلدىزدارىنىڭ قاتىسۋىمەن ۇلكەن شوۋ-كونتسەرت وتەدى. باستى جۇلدىز – ايقىن تولەپبەرگەن. سونداي-اق بۇركىت, مارسەل, دۋمان مارات پەن مارحابا ءسابي ونەر كورسەتەدى.
سونىمەن قاتار اباي الاڭىندا «ەدينستۆو نارودا ۆ فوكۋسە» اتتى فوتوكورمە ۇيىمداستىرىلادى. وندا كەلۋشىلەر قازاقستان حالقى اسسامبلەياسىنىڭ 30 جىلدىق تاريحىنان سىر شەرتەتىن ساتتەردى تاماشالاي الادى.
مەرەكەگە وراي تۇڭعىش پرەزيدەنت ساياباعىندا ساعات 10:00-دە بىرلىك جۇگىرۋ جارىسى وتەدى. 300-گە جۋىق ادام قاتىساتىن بۇل شارا دا اسسامبلەيانىڭ مەرەيتويىنا ارنالعان.
الماتىنىڭ باسقا اۋداندارىندا دا ءتۇرلى مەرەكەلىك ءىس-شارالار جوسپارلانعان:
30 ءساۋىر– اۋەزوۆ اۋدانىندا ساعات 11:00-دە Family Park-تا ەتنو-كونتسەرت وتەدى; 30 ءساۋىر– الاتاۋ اۋدانىندا ساعات 15:00-دە يننوۆاتسيالىق شىعارماشىلىق ورتالىعىندا كونتسەرت وتەدى (نۇركەنت شاعىن اۋدانى, 14ا); 1 مامىر– المالى اۋدانىندا 12:00-دە م. گاندي اتىنداعى ساياباقتا كونتسەرت وتەدى; 1 مامىر– بوستاندىق اۋدانىندا 12:00-دە «اتاكەنت» اركاسى الدىندا مەرەكەلىك شارا ۇيىمداستىرىلادى; 1 مامىر– جەتىسۋ اۋدانىندا 11:00-دە ارباتتا (اينابۇلاق شاعىن اۋدانى) ويىن-ساۋىق شارالارى وتەدى; 1 مامىر– مەدەۋ اۋدانىندا 12:00-دە ورتالىق مادەنيەت جانە دەمالىس ساياباعىندا كونتسەرت وتەدى; 1 مامىر– ناۋرىزباي اۋدانىندا 11:00-دە شۇعىلا شاعىن اۋدانىنداعى امفيتەاتردا مەرەكەلىك كونتسەرت وتەدى; 1 مامىر– تۇركسىب اۋدانىندا 11:00-دە №6 مەكتەپ ءۇيى اۋماعىندا (سەيفۋللين داڭعىلى, 13/1) كونتسەرت ۇيىمداستىرىلادى.