تۇركىستان وبلىسى, ورداباسى اۋدانى, تەمىرلان اۋىلىندا جاڭا مۋزىكالىق ونەر مەكتەبىنىڭ قۇرىلىسىن باستاۋ شەڭبەرىندە ۋاقىت كاپسۋلاسىن سالۋ ءراسىمى ءوتتى. اتالعان مەكتەپتىڭ قۇرىلىسى – مەملەكەت باسشىسىنىڭ تاپسىرماسىنا سايكەس قايتارىلعان كاپيتالدى حالىق يگىلىگى ءۇشىن ءتيىمدى پايدالانۋ اياسىندا ۇكىمەتپەن ماقۇلدانعان الەۋمەتتىك جوبالاردىڭ ءبىرى, دەپ جازادى Egemen.kz.
سالتاناتتى راسىمگە وبلىس اكىمى نۇرالحان كوشەروۆ, باس پروكۋراتۋرانىڭ اكتيۆتەردى قايتارۋ كوميتەتىنىڭ توراعاسى نۇرداۋلەت سۇيىندىكوۆ, وبلىس پروكۋرورى مۇرات تىلەۋبەرديەۆ جانە اۋىل تۇرعىندارى قاتىستى. جەرگىلىكتى اقساقالدىڭ باتاسىنان كەيىن قاتىسۋشىلار بولاشاق ۇرپاققا ارنالعان ۋاقىت كاپسۋلاسىن سالدى. قۇنى 890 ملن تەڭگە تۇراتىن 300 وقۋشىعا ارنالعان جاڭا مەكتەپ كورشىلەس اۋىلداردىڭ وقۋشىلارىن دا قابىلدايتىن بولادى.
ءىس-شارا بارىسىندا پرەزيدەنتتىڭ تاپسىرماسىنا سايكەس ۇكىمەت ارنايى مەملەكەتتىك قوردان ءبىلىم بەرۋ, دەنساۋلىق ساقتاۋ, سپورت جانە كوممۋنالدىق ينفراقۇرىلىمدى جاڭعىرتۋ سالالارىندا 280 الەۋمەتتىك نىساننىڭ قۇرىلىسىن قارجىلاندىرۋ ءۇشىن قاراجات بولگەنى ايتىلدى. بۇگىنگە مەملەكەت پايداسىنا جالپى سوماسى شامامەن 610 ملرد تەڭگە كولەمىندە اكتيۆتەر قايتارىلعان, ونىڭ ىشىندە 506 ملرد تەڭگە – اقشالاي قاراجات, 103 ملرد تەڭگە – م ۇلىك.
ايتا كەتەيىك, بۇعان دەيىن اۋىلدا 1974 جىلى سالىنعان, قازىرگى تاڭدا اپاتتى جاعدايدا تۇرعان مۋزىكالىق مەكتەپ جۇمىس ىستەپ كەلگەن بولاتىن.