الماتىدا ءورت قاۋپى بار كوكتەمگى-جازعى كەزەڭگە دايىندىق جان-جاقتى جۇرۋدە. قاۋىپسىزدىك شارالارىن قامتاماسىز ەتۋ ءۇشىن ورتكە قارسى قىزمەتتىڭ 20 بولىمشەسى جۇمىلدىرىلعان, دەپ حابارلايدى Egemen.kz.
ورمان شارۋاشىلىعى جانە جانۋارلار دۇنيەسى كوميتەتىنىڭ بۇيرىعىنا سايكەس 26 ناۋرىزدان باستاپ الماتى جانە الماتى وبلىستارىنىڭ مەملەكەتتىك ورمان قورى اۋماعىندا ءورت قاۋپى بار كەزەڭ رەسمي تۇردە بەلگىلەندى. الماتى قالاسى توتەنشە جاعدايلار دەپارتامەنتى وكىلدەرىنىڭ ايتۋىنشا, دايىندىق وتكەن جىلدىڭ كۇزىندە باستالىپ, جوسپارلى رەجىمدە جالعاسۋدا.
«الماتى اۋماعىندا ىلە-الاتاۋ ۇلتتىق پاركىنىڭ (20 805 گا), «مەدەۋ» تابيعي پاركىنىڭ (708,2 گا) جانە باۋم توعايىنىڭ (137,7 گا) ۋچاسكەلەرى ورنالاسقان. بۇل ايماقتار تابيعاتتى قورعاۋ قىزمەتتەرىنىڭ ەرەكشە نازارىن اۋدارادى. دەپارتامەنتتىڭ, اكىمدىكتىڭ جانە باسقا دا جاۋاپتى ۇيىمداردىڭ باستاماسىمەن اۋماقتاردى قۇرعاق وسىمدىكتەردەن تازارتۋ جۇمىستارى جۇرگىزىلدى. سونداي-اق حالىقپەن پروفيلاكتيكالىق جۇمىس كۇشەيتىلدى. قازىردە جول بويىنداعى مينەرالدانعان جولاقتار, ۇزىندىعى 39,1 كم قالاعا ىرگەلەس جاتقان اشىق اۋماقتار جانە 35,2 گا اۋماقتا قۇرعاق وسىمدىكتەردىڭ ەڭىسى بويىنشا جۇمىس جاسالدى», دەدى الماتى قالاسى تجد مەملەكەتتىك ءورت باقىلاۋ باسقارماسىنىڭ باستىعى كونستانتين كانين.
قازىرگى ۋاقىتتا قالا اۋماعىندا قۇرعاق وسىمدىكتەردىڭ جانۋىنىڭ 120 جاعدايى تىركەلگەن. كوپ وقيعا وت پەن تۇرمىستىق قوقىسقا ابايسىز قاراۋدىڭ سالدارىنان ورىن الىپ وتىر. قالانىڭ ورمان-ساياباق جانە تاۋ بوكتەرىندەگى ايماقتارىن پاترۋلدەۋ ءۇشىن جيىنتىق جاساق قۇرىلدى. كۇن سايىن 13 قىزمەتكەر مەن 2 بىرلىك تەحنيكا كەزەكشىلىك اتقارادى. قاجەت بولعان جاعدايدا ءتيىستى قۇرال-قوندىرعىلارمەن جەكە قۇرامنىڭ 100-گە دەيىن ادامى قوسىمشا تارتىلادى. جاعدايدى باقىلاۋ ءۇشىن تەپلوۆيزورلارى مەن داۋىس زورايتقىشتارى بار ۇشقىشسىز ۇشۋ اپپاراتتارى (دروندار) دا قولدانىلادى. سونداي-اق مەدەۋ ساياباعىندا ءورتتى ەرتە انىقتايتىن وپتيكالىق-سەنسورلىق كامەرالارى بار بەينەمونيتورينگ جۇيەسى جۇمىس ىستەيدى.
ورتتەن ساقتانۋ – ورتاق باسىمدىق. تجد قالا تۇرعىندارى مەن قوناقتارىنا تاۋلى-ورماندى جەرلەردە ءورت قاۋىپسىزدىگى ەرەجەلەرىن ساقتاۋدىڭ ماڭىزدىلىعىن ەسكە سالادى. ماماندار قالا تۇرعىندارىنان تابيعي ورتادا مۇقيات بولۋدى, قوقىستاردى قالدىرماۋدى, جانىپ تۇرعان سىرىڭكە, تەمەكى تۇقىلدارىن تاستاماۋدى, ارنايى بولىنبەگەن جەرلەردە وت قويماۋدى, قۇرعاق ءشوپتى ورتەمەۋدى سۇرايدى.