تجم ورتكە قارسى قىزمەت كوميتەتى توراعاسىنىڭ ورىنباسارى قانات دوسپاەۆ اتالعان درونداردى ساتىپ الۋ جۇمىسىنا توقتالىپ ءوتتى, دەپ حابارلايدى Egemen.kz اقپارات اگەنتتىگى.
2024 جىلدىڭ قاراشا ايىندا مينيستر شىڭعىس ءارىنوۆ ءار داناسىنىڭ قۇنى 120 ملن تەڭگە بولاتىن ءورت سوندىرگىش دروندار الۋ تۋرالى ويى بارىن ايتقان بولاتىن.
– ونىڭ قانداي ەرەكشەلىگى بار؟ 150 مەترگە دەيىنگى بيىككە كوتەرىلىپ, ءورت سوندىرە الادى. بىزدە بار ءورت سوندىرەتىن كولىكتىڭ كەز كەلگەنىنەن جالعانىپ, قانشا ۋاقىت قاجەت بولسا, سونشا مەرزىم بويى ءورت ءسوندىرۋ جۇمىستارىن اتقارا الادى, – دەگەن ەدى سول كەزدە.
استانا قالاسىندا وتكەن ءباسپاسوز ءماسليحاتىندا ورتكە قارسى قىزمەت كوميتەتىنىڭ وكىلدەرى وسى جوبانىڭ ارتىقشىلىعىن ءسوز ەتتى.
– ول درون قازىر استانا قالاسىندا سىناقتان ءوتىپ جاتىر. ياعني, ازىرگە ءبىر داناسىن عانا الدىق. مىسالى, كەشە عانا Abu Dhabi Plaza كەشەنىندە وقۋ-جاتتىعۋ جيىنىن وتكىزگەندە وسى دروندى پايدالاندىق. ول اپپارات ءزاۋلىم عيماراتتاردىڭ قاسبەتىندەگى جانە بالكوندارداعى ءورتتى سوندىرۋدە ايتارلىقتاي ءتيىمدى ەكەنىن كورسەتتى دەۋگە بولادى. بۇل تاجىريبەنى ءالى دە پىسىقتاپ, باقىلايمىز. شىنىمەن ءتيىمدى ەكەنىن كورسەتسە, جاپپاي ساتىپ الۋ تۋرالى شەشىم قابىلدايمىز, – دەپ ناقتىلادى قانات دوسپاەۆ.
ورتكە قارسى قىزمەت كوميتەتىنىڭ باس مامانى ەلدوس زيادا بولسا, مينيسترلىك ءوز جۇمىسىندا پيلوتسىز ۇشاتىن اپپاراتتاردى ءجيى قولداناتىنىن جەتكىزدى.
– قازىرگى ۋاقىتتا مينيسترلىك بالانسىندا 160-تان استام درون بار. ول دروندار كوبىنە ءورتتى ەرتە انىقتاۋعا پايدالانىلادى. اۋەدەن مونيتورينگ جاساۋعا دا ءجيى قولدانامىز. ماماندانعان ورتالىقتا ارنايى دروندار بار. ول ءوزى تۇسىرگەن بەينەنى ونلاين رەجيمدە ورتالىققا جىبەرىپ وتىرادى. ءاربىر ورمان القاپتارىنىڭ قاسىندا توتەنشە جاعدايلار مينيسترلىگىنىڭ قوسىمشا كۇشتەرى جۇمىلدىرىلعان. ءاربىر ءورت سوندىرگىش كولىكتىڭ قاسىندا ءبىر درون بار. ولار ءورتتى ەرتە انىقتاپ عانا قويماي, جالىننىڭ بەتالىسىن ناقتىلاپ, ءدال باقىلاۋعا دا قولايلى, – دەدى ول.