ۇلتتىق كىتاپ كۇنى قارساڭىندا الماتى مەملەكەتتىك قۋىرشاق تەاترى جاس كورەرمەنگە ەرەكشە سىي تارتتى. الەمگە ايگىلى نەمىس جازۋشىسى وتفريد پرويسلەردىڭ بالالار ادەبيەتىندەگى جاۋھارى سانالاتىن «كىشكەنتاي سيقىرشى» پوۆەسىنىڭ جەلىسىمەن ساحنالانعان «ورمان عاجايىپتارى» اتتى جاڭا قويىلىمنىڭ پرەمەراسىن ۇسىندى.
بالالار ادەبيەتىنىڭ التىن قورىنان ورىن العان بۇل شىعارما – جاقسىلىق پەن ز ۇلىمدىق, باتىلدىق پەن مەيىرىم, ادالدىق پەن ىزگىلىك تاقىرىپتارىن قوزعايتىن ويلى دۇنيە. ەرتەگى كەيىپكەرلەرىنىڭ ساحناعا شىعۋى – كىتاپقا دەگەن سۇيىسپەنشىلىكتى جاڭا دەڭگەيگە كوتەرۋدىڭ ءساتتى ۇلگىسى بولعانداي.
سپەكتاكل رەجيسسەرى – انتون زايتسەۆ. ونىڭ شىعارماشىلىق جەتەكشىلىگىمەن تەاتر رەپەرتۋارى «انا جۇرەگى», «اباي. مەن ءبىر جۇمباق اداممىن...» «ۇيشىك», «باۋىرساق» سياقتى باسقا دا قويىلىمدارمەن جاڭا تىنىس الىپ, زاماناۋي رەجيسسەرلىك شەشىمدەر مەن تىڭ شىعارماشىلىق باعىتتار ارقىلى جاڭاشا تۇرلەنىپ, وزگەشە لەپكە يە بولدى.
ال قويىلىمنىڭ ساحنالىق كوركەمدەۋىن جاساعان – اقتوبە وبلىستىق قۋىرشاق تەاترىنىڭ ديرەكتورى ءاسيا قۇرمانالينا. ونىڭ بەينەلىك شەشىمدەرى مەن ساحنالىق كەڭىستىكتى تاني بىلەتىن كاسىبي تالعامى سپەكتاكلدىڭ ەستەتيكالىق دەڭگەيىن ايرىقشا بيىككە كوتەرەدى. قويىلىمنىڭ مۋزىكالىق الەمىن كومپوزيتسيالىق ۇيلەسىممەن ارلەگەن – اندرەي دولگورۋكوۆ, ال ساحنالىق قوزعالىس پەن پلاستيكالىق كورىنىستەردى حورەوگرافيالىق تاسىلدەر ارقىلى مازمۇندى ەتكەن – ارىستان ءتۇيجانوۆ.
ەرتەگىدە 15-تەن اسا ءتۇرلى قۋىرشاق ءتۇرى ساحناعا شىعادى. جاس كورەرمەن پلانشەتتى, تروستى, پاركەتتى, بويلى سىندى سان الۋان قۋىرشاق تۇرلەرىنىڭ سيقىرلى الەمىنە ەنىپ, ءار كەيىپكەردىڭ بولمىسى مەن مىنەزىنە تەرەڭ ۇڭىلە الدى. ءار قۋىرشاقتىڭ وزىندىك پلاستيكاسى مەن بەينەلىك شەشىمى ارقىلى سپەكتاكل كوركەمدىك تۇرعىدان بايىپ, كورۋشىگە ەرەكشە ەستەتيكالىق اسەر سىيلادى.
سونداي-اق پرەمەرا اياسىندا الماتى قالاسىنىڭ ورتالىقتاندىرىلعان كىتاپحانا جۇيەسىمەن بىرلەسىپ كىتاپ كورمەسى ۇسىنىلدى. اتالعان كورمە جاس كورەرمەننىڭ كىتاپ وقۋعا قىزىعۋشىلىعىن وياتىپ, ادەبيەتكە دەگەن سۇيىسپەنشىلىگىن ارتتىرۋ, ولاردىڭ رۋحاني دامۋىنا جول اشۋدى ماقسات ەتەدى.