مەملەكەت باسشىسى قاسىم-جومارت توقاەۆ قازاقستان حالقى اسسامبلەياسىنىڭ XXXIV سەسسياسىنىڭ پلەنارلىق وتىرىسىندا ءسوز سويلەپ, بۇگىنگى باسقوسۋدىڭ تاريحي ءمان-ماڭىزىنا ايرىقشا توقتالدى, دەپ حابارلايدى Egemen.kz.
«بيىل قازاقستان حالقى اسسامبلەياسىنىڭ قۇرىلعانىنا 30 جىل تولىپ وتىر. بارشاڭىزعا قۇتتى بولسىن! بۇل – بۇكىل قازاقستان ءۇشىن ايتۋلى وقيعا. وسى ۋاقىت ىشىندە اسسامبلەيا قوعامداعى تۇراقتىلىق پەن كەلىسىمدى نىعايتۋعا ولشەۋسىز ۇلەس قوستى. ەلىمىزدەگى بىرلىك پەن تەڭدىكتىڭ, تۇراقتىلىق پەن تىنىشتىقتىڭ سيمۆولىنا اينالدى. ەتنوسارالىق قاتىناس سالاسىنداعى تەڭدەسسىز قوعامدىق ينستيتۋت رەتىندە تانىلدى. سونىڭ ارقاسىندا قازاقستاندا بەيبىتشىلىك پەن كەلىسىمنىڭ قايتالانباس ۇلگىسى قالىپتاستى», دەدى مەملەكەت باسشىسى.
قاسىم-جومارت توقاەۆتىڭ ايتۋىنشا, اسسامبلەيا تاريحى ەلىمىزدىڭ ەگەمەندىك جىلناماسىمەن تىعىز استاسىپ جاتىر.
«ۇيىم 1995 جىلى قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ باستاماسىمەن قۇرىلعانىن بىلەسىزدەر. بۇل باستاما قازاق مەملەكەتتىلىگى قالىپتاسىپ جاتقان قيىن كەزەڭدە تەرەڭ ساياسي مانگە يە بولدى. كونسۋلتاتيۆتىك-كەڭەستىك ورگان رەتىندە جاساقتالعان اسسامبلەياعا 2007 جىلى كونستيتۋتسيالىق مارتەبە بەرىلدى. ۇيىم جالپىۇلتتىق بىرلىكتىڭ نەگىزگى مودەلىنە اينالدى», دەدى پرەزيدەنت.
سونىمەن قاتار مەملەكەت باسشىسى ەلىمىزدە سوڭعى جىلدارى اتقارىلعان اۋقىمدى وزگەرىستەردىڭ ارقاسىندا اسسامبلەيا قىزمەتى جاسامپازدىقتىڭ جاڭا سيپاتىنا كوتەرىلگەنىن اتاپ ءوتتى .
«سەناتتىڭ بەس دەپۋتاتىن اسسامبلەيا كەڭەسىنىڭ ۇسىنىسىمەن پرەزيدەنت تاعايىندايدى. بۇل قادام زاڭنامالىق دەڭگەيدە بارلىق ەتنوستىڭ مۇددەسىن قورعاۋ مۇمكىندىگىن ەداۋىر ارتتىردى. وعان قوسا, قازاقستان پارلامەنتاريزمى تاريحىندا العاش رەت ء«بىر ەل – ءبىر مۇددە» اتتى پالاتاارالىق دەپۋتاتتار توبى قۇرىلدى. بۇل توپ قوعامدىق كەلىسىمدى نىعايتۋ ماسەلەلەرىمەن اينالىسادى. قازىر مەملەكەتتىك ورگاندار تۇگەل اسسامبلەيا جۇمىسىنا اتسالىسادى. مينيسترلىكتەردەن, وبلىس اكىمدىكتەرى مەن بارلىق دەڭگەيدەگى ءماسليحاتتاردان باستاپ اۋىل اكىمدىكتەرىنە دەيىن ودان شەت قالمايدى», دەدى پرەزيدەنت.