ا.جۇبانوۆ اتىنداعى اقتوبە مۋزىكالىق كوللەدجىندە «شىرقا, مەنىڭ سىرنايىم» اتتى بايقاۋ ءوتتى. وعان قازانعاپ اتىنداعى ساز ونەر مەكتەبى, قالاداعى ءۇش مۋزىكا مەكتەبى, ا.جۇبانوۆ اتىنداعى مۋزىكا كوللەدجى مەن گۋمانيتارلىق كوللەدج ستۋدەنتتەرى قاتىستى. ۇزدىك شىققاندار اتىراۋدا وتەتىن «ەۋرازيا كۋبوگى» ءىىى حالىقارالىق بايان جانە اككوردەونشىلار بايقاۋىنا قاتىسىپ, ودان ىرىكتەلگەن جاسوسپىرىمدەر توبىنداعىلار جازدا بوسنيا مەن گەرتسەگوۆينا استاناسى ساراەۆو قالاسىندا وتەتىن 78-حالىقارالىق بايقاۋعا بارادى.
ا.جۇبانوۆ اتىنداعى مۋزىكا كوللەدجىندە بايان جانە اككوردەون سىنىبىندا 12 ستۋدەنت ءدارىس السا, ولاردىڭ اراسىندا 3-كۋرس ستۋدەنتى, پرەزيدەنت ستيپەندياسىنىڭ يەگەرى جاننۇر جۇمابايقىزى مەن نۇرجان مايماقوۆ حالىقارالىق بايقاۋلارعا قاتىسىپ, ۇزدىك ونەرىمەن تانىلىپ ءجۇر.
ايتا كەتۋ كەرەك, وڭىردە جىلما-جىل بايان مەن اككوردەون اسپاپتارىن مەڭگەرۋگە ىقىلاستى بالالار كوبەيىپ كەلەدى.
«بايان جانە اككوردەونشىلار بايقاۋى جىل سايىن ءار مەملەكەتتە وتەدى. بىلتىر يتاليادا وتكەن 77-بايقاۋعا ستۋدەنتىمىز نۇرجان مايماقوۆ قاتىسىپ, 9-ورىن الدى. بيىل ول بوسنيا مەن گەرتسەگوۆينا استاناسىندا وتەتىن 78-حالىقارالىق بايقاۋعا بارادى. سوندىقتان دا بايان جانە اككوردەونشىلار بايقاۋلارىنا بارىپ, ءبىلىم الماسىپ, تاجىريبە جيناۋ وتە ماڭىزدى», دەيدى ا.جۇبانوۆ اتىنداعى مۋزىكا كوللەدجىنىڭ وقىتۋشىسى اقگۇل ءابىشوۆا.
ءىس-شارادان سوڭ پ.ي.چايكوۆسكي اتىنداعى الماتى مۋزىكا كوللەدجىنىڭ وقىتۋشىسى دياس ەلەمەس اقتوبەدەگى بالالار مۋزىكا مەكتەپتەرى مەن كوللەدج ستۋدەنتتەرى الدىندا شەبەرلىك ساباعىن وتكىزدى.
اقتوبە وبلىسى