استانادا نورماتيۆتىك قۇقىقتىق اكتىلەرگە ارنالعان بىرىڭعاي سوزدىك ازىرلەۋ بويىنشا رەسپۋبليكالىق سەمينار ءوتتى. وعان رەسپۋبليكالىق تەرمينولوگيالىق كوميسسيا مۇشەلەرى, زاڭگەرلەر, لينگۆيستتەر, جوعارى وقۋ ورىندارىنىڭ پروفەسسورلىق-وقىتۋشىلىق قۇرامىنىڭ جانە مۇددەلى مەملەكەتتىك ورگاندار مەن ۇيىمداردىڭ وكىلدەرى قاتىستى, دەپ حابارلايدى Egemen.kz.
ءىس-شارا ۇلتتىق تەرمينولوگيالىق جۇيەنى جەتىلدىرۋگە, بىرىزدەندىرۋگە, ۇلتتىق زاڭنامادا قۇقىقتىق تەرميندەردى قولدانۋ بارىسىندا تۋىندايتىن ماسەلەلەردى انىقتاۋعا باعىتتالدى. سەميناردى عىلىم جانە جوعارى ءبىلىم مينيسترلىگىنىڭ ءتىل ساياساتى كوميتەتى جانە شايسۇلتان شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعى ۇيىمداستىردى.
جيىندا عالىمدار مەن ماماندار زاڭ تەرميندەرى مەن زاڭدىق تەحنيكانى مەملەكەتتىك تىلدە دامىتۋدىڭ قولدانبالى جانە تەوريالىق اسپەكتىلەرىن, سونداي-اق نەگىزگى عىلىمي ۇستانىمداردى ەگجەي-تەگجەيلى تالقىلادى. ودان بولەك نورماتيۆتىك قۇقىقتىق اكتىلەردەگى سالالىق تەرميندەردى ودان ءارى جەتىلدىرۋ, ۇلتتىق قۇقىقتىق جۇيە نەگىزىندە زاڭدىق ءتىلدى قالىپتاستىرۋ, تەرمينولوگيالىق قولدانىس تىزبەسىنە ساراپتامالىق تالداۋ جاساۋ, سالالىق تەرمينولوگيانى دامىتۋ جانە ت.ب. ماسەلەلەردى قارادى.
قاتىسۋشىلار اتاپ وتكەندەي, زاڭ شىعارۋ تەحنيكاسىنىڭ نەگىزگى ەرەجەلەرىنىڭ ءبىرى – قۇجاتتىڭ قۇقىق قولدانۋشىعا عانا ەمەس, كەز كەلگەن ازاماتقا تۇسىنىكتى بولۋى. بۇل ماسەلەلەر وسى سالاداعى بىرىڭعاي سوزدىكتى ازىرلەۋدىڭ اسا وزەكتىلىگىن جانە ونىڭ تىزبەسىن سالا ماماندارىمەن جان-جاقتى تالقىلاۋ قاجەتتىگىن كورسەتەدى. سەمينار قورىتىندىسى بويىنشا زاڭنامالىق سالادا تەرمينولوگيالىق بازانى قالىپتاستىرۋ بويىنشا پراكتيكالىق ۇسىنىمدار بەرىلدى.