قازاقستان عالىمدارىنىڭ كەلتىرگەن دەرەكتەرىنە قاراعاندا, كاسپي تەڭىزى دەڭگەيى تومەندەپ كەلە جاتىر. 2050 جىلعا قاراي بۇل تومەندەۋ 33 مەترگە دەيىن جەتۋى ىقتيمال, دەپ حابارلايدى Egemen.kz.
مامانداردىڭ ايتۋىنشا, بۇگىنگى تاڭدا كاسپي تەڭىزىنىڭ دەڭگەيى 28,5 مەترگە دەيىن تومەندەگەن. بۇل تەڭىز ەكوجۇيەسى مەن تەڭىز شارۋاشىلىعى ءۇشىن اسا قاۋىپتى. اتالعان ماسەلەگە بايلانىستى 2024 جىلى كاسپي تەڭىزى بويىنشا قازاق عىلىمي-زەرتتەۋ ينستيتۋتى قۇرىلعان-دى. الايدا, قازىرگى كۇنگە دەيىن ونىڭ قارجىلاندىرۋ ماسەلەسى شەشىلمەگەن. دەمەك, اتالعان ينستيتۋت ءوز جۇمىسىن تولىققاندى باستاي الماي وتىر.
ء«بىز قارجى مينيسترلىگىنە 2025 جىلعا ارنالعان رەسپۋبليكالىق بيۋدجەتتەن 1,8 ملرد تەڭگە ءبولۋ تۋرالى ءوتىنىش جولدادىق. بۇل قاراجات ينستيتۋتتىڭ جۇمىسىن باستاۋعا قاجەت», دەيدى ەكولوگيا جانە تابيعي رەسۋرستار ۆيتسە-ءمينيسترى مانسۇر وشۇرباەۆ.
مينيسترلىكتىڭ دەرەگىنشە, كورسەتىلگەن قارجى ينستيتۋتتىڭ اعىمداعى شىعىندارىنا, عيماراتىن جوندەۋگە, قاجەتتى قۇرال-جابدىقتاردى ساتىپ الۋعا جۇمسالۋعا ءتيىس.
«قۇرىلىمنىڭ قۇقىقتىق قۇجاتتارى ادىلەت ورگاندارىنا تىركەۋگە جىبەرىلدى. 2024 جىلدىڭ 6 جەلتوقسانىندا كاسپي تەڭىزى ينستيتۋتى ەكولوگيا جانە تابيعي رەسۋرستار مينيسترلىگىنىڭ قاراماعىنا بەرىلدى», دەيدى وشۇرباەۆ.
ينستيتۋتتىڭ كەڭسەسى اقتاۋ قالاسىندا ورنالاسادى. ينستيتۋت اكىمشىلىگىنە ماڭعىستاۋ وبلىسى اكىمدىگى جالپى اۋماعى 1 640 شارشى مەتر بولاتىن عيمارات بولگەن. بەلگىلەنگەن جوسپار بويىنشا وندا 91 قىزمەتكەر جۇمىس ىستەمەك.
ۆيتسە-ءمينيستردىڭ ايتۋىنشا, قازىرگى تاڭدا كاسپي تەڭىزىنىڭ قازاقستان سەكتورىنداعى قورعالاتىن ايماقتار بويىنشا ەكولوگيالىق كارتاسى ازىرلەنىپ جاتىر. بۇل كارتا مۇنايدىڭ توگىلۋىنىڭ الدىن الۋ جانە ونىڭ سالدارىن جويۋ شارالارىن جوسپارلاۋعا, بيوالۋانتۇرلىلىكتى ساقتاۋ ستراتەگياسىن ازىرلەۋگە ارنالعان ماڭىزدى قۇرال بولادى دەپ كۇتىلەدى.