كەڭەس جانە گرۋزين حالىقتارىنىڭ ماقتانىشى, ايگىلى ءمۇسىنشى جانە سۋرەتشى-مونۋمەنتاليست زۋراب تسەرەتەلي 91 جاسىندا دۇنيەدەن وزدى, دەپ حابارلايدى Egemen.kz.
Mash Telegram-ارناسىنىڭ مالىمەتىنشە, شەبەر 22 ساۋىرگە قاراعان ءتۇنى جۇرەك سوعىسىنىڭ توقتاۋىنان قايتىس بولعان.
زۋراب كونستانتينوۆيچ تسەرەتەلي 1934 جىلى 4 قاڭتاردا تبيليسيدە دۇنيەگە كەلگەن. ول تبيليسي كوركەمونەر اكادەمياسىندا ءبىلىم العان. ونىڭ شىعارماشىلىق جولى قوعامدىق كەڭىستىكتەر مەن ساۋلەتتىك كەشەندەردى بەزەندىرۋدەن باستالىپ, الەمدىك دەڭگەيدەگى مونۋمەنتالدى تۋىندىلارعا ۇلاسقان.
تسەرەتەلي 5000-نان استام تۋىندى جاساپ, الەمنىڭ ءتۇرلى ەلدەرىندە ءوز قولتاڭباسىن قالدىرعان. ماسكەۋدەگى «دوستىق ماڭگىلىك» كومپوزيتسياسى, نيۋ-يوركتەگى بۇۇ عيماراتى الدىندا ورناتىلعان «جاقسىلىق جاماندىقتى جەڭەدى» ءمۇسىنى جانە سەۆيلياداعى «جاڭا ادامنىڭ دۇنيەگە كەلۋى» سياقتى تۋىندىلار – ونىڭ شىعارماشىلىق شەبەرلىگىنىڭ ايقىن دالەلى.