ارمەنيا رەسپۋبليكاسىندا وتكەن قازاقستاننىڭ مادەني كۇندەرى اياسىندا ارام حاچاتۋريان اتىنداعى كونتسەرت زالىندا وتاندىق ونەرپازداردىڭ گالا-كونتسەرتى ءوتتى. اۋقىمدى مادەني ءىس-شارا ەل پرەزيدەنتى قاسىم-جومارت توقاەۆتىڭ ەرەۆان قالاسىنا جاساعان رەسمي ساپارى بارىسىندا مەملەكەت باسشىلارى اراسىنداعى كەلىسىمدەر ناتيجەسىندە ۇيىمداستىرىلدى.
سالتاناتتى جيىنعا قازاقستان رەسپۋبليكاسى مادەنيەت جانە اقپارات ءمينيسترى, رەسمي دەلەگاتسيا باسشىسى ايدا بالاەۆا, ارمەنيا رەسپۋبليكاسىنىڭ ءبىلىم, عىلىم, مادەنيەت جانە سپورت ءمينيسترى جاننا اندرەاسيان, قازاقستان رەسپۋبليكاسىنىڭ ارمەنياداعى توتەنشە جانە وكىلەتتى ەلشىسى بولات يمانباەۆ, سونداي-اق ارميان زيالى قاۋىمى وكىلدەرى, ديپلوماتيالىق كورپۋس, شىعارماشىلىق وداقتار, قازاق دياسپوراسى, عالىمدار, جازۋشىلار مەن مادەنيەت قايراتكەرلەرى قاتىستى.
«بۇگىنگى يگى ءىس-شارا – مەملەكەت باسشىلارىنىڭ دوستىق قارىم-قاتىناسى مەن ەكى ەل اراسىنداعى ستراتەگيالىق ارىپتەستىكتىڭ جەمىسى. ءبىزدىڭ بۇگىنگى كەزدەسۋىمىز قاسيەتتى پاسحا مەرەكەسىمەن تۇسپا-تۇس كەلىپ وتىرعانىن اتاپ وتكىم كەلەدى. بۇل دا – دوستىق پەن بىرلىكتىڭ, جاناشىرلىق پەن مەيىرىمگە باستايتىن ىزگىلىكتىڭ سيمۆولى. الداعى ۋاقىتتا ەلدەرىمىز اراسىنداعى بايلانىس بەرىك ءارى ناتيجەلى بولارىنا سەنەمىن. سەبەبى ونەر مەن مادەنيەتتە ەشقانداي شەكارا بولمايدى. مادەنيەت ەلدەردى بىرىكتىرەدى, حالىقتار اراسىنداعى ءوزارا تۇسىنىستىك پەن قۇرمەتتىڭ نەگىزىن قالايدى. ورتاق قۇندىلىقتار مەن شىعارماشىلىق بايلانىس – بەيبىتشىلىك پەن دوستىقتىڭ مىزعىماس دانەكەرى», دەدى ا.بالاەۆا قۇتتىقتاۋ سوزىندە.
گالا-كونتسەرت باعدارلاماسى كورەرمەنگە ەرەكشە اسەر سىيلادى. وندا حالىق اندەرى مەن زاماناۋي كومپوزيتورلاردىڭ تۋىندىلارى, قازاقستاندىق ەسترادا, كلاسسيكا مەن فولكلور ۇندەسىپ, ۇيلەسىم تاپتى. ساحنا تورىندە اتى اڭىزعا اينالعان ءانشى, قازاقستاننىڭ ەڭبەك ەرى روزا رىمباەۆا, قازاقستاننىڭ ەڭبەك سىڭىرگەن قايراتكەرلەرى الەكساندر بەلياكوۆ پەن ايگەرىم بەكەتاەۆا, «HasSak» ەتنوفولكلورلىق ءانسامبلى, «بىرلىك» بي ءانسامبلى, «دارىن» مەملەكەتتىك جاستار سىيلىعىنىڭ لاۋرەاتتارى راسۋل جارماعامبەتوۆ, اسقار مۇقيات جانە باسقا دا ارتىستەرىمىز ونەر كورسەتتى.
ارمەنياداعى قازاقستاننىڭ مادەني كۇندەرى اياسىنداعى ءىس-شارالارعا 3 مىڭنان استام ادام قاتىستى. سونداي-اق قوس ەلدىڭ مينيسترلەرى – ايدا بالاەۆا مەن جاننا اندرەاسيان اراسىندا ەكىجاقتى كەزدەسۋ ءوتىپ, مادەني ىنتىماقتاستىقتى كەڭەيتۋ ماسەلەلەرى تالقىلاندى. ءىس-شارالار باعدارلاماسىندا قازاقستاندىق فيلمدەر كورسەتىلىپ, ەرەۆان قالاسىندا اباي قۇنانباي ۇلى اتىنداعى ساياباقتىڭ سالتاناتتى اشىلۋى ءوتتى.
بۇعان قوسا, قازاقستاننىڭ رەسمي دەلەگاتسياسى ءتۇرلى سالالار بويىنشا ارميان ارىپتەستەرىمەن كەزدەسۋلەر وتكىزىپ, اقپارات, مۋزەي جانە كىتاپحانا ءىسى, كينووندىرىس سالالارىنداعى ىنتىماقتاستىقتىڭ كەلەشەگى, بىرلەسكەن باستامالار جونىندە پىكىر الماستى.
ايتا كەتەيىك, قازاقستان مەن ارمەنيا اراسىنداعى ديپلوماتيالىق قارىم-قاتىناستار ورناعان ۋاقىتتان بەرى مۇنداي اۋقىمدى مادەني ءىس-شارا العاش رەت ۇيىمداستىرىلىپ وتىر. ەسكە سالساق, بۇعان دەيىن 2024 جىلدىڭ قازان ايىندا استانادا ارمەنيا مادەنيەتى كۇندەرى وتكەن ەدى.