«اتىراۋ» فۋتبول كلۋبىنىڭ كورسەتكىشى جاقسارماي كەلەدى. كوماندا 2018, 2019, 2024 جىلدارى ەلىمىزدىڭ كۋبوگىنە قاتىستى. سوعان قاراماستان كلۋب چەمپيوناتتا 7-ورىننان جوعارى كوتەرىلگەن ەمەس.
جاقىندا كلۋبتىڭ ءبىر توپ قىزمەتكەرى جىل باسىنان بەرى جالاقى تولەنبەگەنى جونىندە ۇندەۋ جاساپ, وبلىس اكىمى سەرىك شاپكەنوۆتەن كومەك سۇرادى. جالپى, اتىراۋ وبلىستىق دەنە شىنىقتىرۋ, سپورت جانە تۋريزم باسقارماسى ءباسپاسوز قىزمەتى ءمالىم ەتكەندەي, كلۋبقا قاتىستى وسى كەزگە دەيىن ءتۇيىنى تارقاتىلماي كەلە جاتقان بىرنەشە ماسەلە بار.
«اتىراۋ وبلىستىق پروكۋراتۋراسى «اتىراۋ» فۋتبول كلۋبى» جشس-نىڭ 2022–2024 جىلدارى ارالىعىنداعى قىزمەتىن تەكسەرىپ, كوپتەگەن زاڭبۇزۋشىلىقتى انىقتادى. ماسەلەن, 2023 جىلعى اقپاندا شەتەل فۋتبولشىسىنا 500 مىڭ ەۋرونىڭ ترانسفەرى جاسالىپ, ونىڭ 420 مىڭ ەۋروسى ءۇشىنشى تۇلعاعا (رەسەي فەدەراتسياسىنىڭ ازاماتى) نەگىزسىز اۋدارىلعان. دەلدالمەن كەلىسىمشارت مامىلەدەن ەكى اپتا بۇرىن جاسالعان. بۇل كەلىسىمشارتتىڭ زاڭدىلىعىنا كۇمان تۋدىرادى. 2024 جىلعى جەلتوقساندا كلۋبقا فۋتبول فەدەراتسياسىنان 65 ميلليون تەڭگە الىنعان. اتالعان قارجىنىڭ 20,4 ميلليون تەڭگەسى ەسەپتەن نەگىزسىز شىعارىلعان. 30 ميلليون تەڭگەنى جەتكىزىلمەگەن تاۋارلار ءۇشىن اۋدارعان», دەپ حابارلادى باسقارمانىڭ ءباسپاسوز قىزمەتى.
باسقارمانىڭ مالىمەتىنشە, فۋتبول كلۋبى جوعارىدا كورسەتىلگەن جىلدار ارالىعىندا 662,7 ميلليون تەڭگە كىرىس تاپقان. دەگەنمەن كىرىستىڭ 132,5 ميلليون تەڭگەسى بيۋدجەتكە اۋدارىلماعان.
«قۇرىلتايشىعا قارجى ەسەبى جۇيەلى تۇردە تاپسىرىلماعان. فۋتبولشىلار مەن جاتتىقتىرۋشىعا تولەنەتىن جالاقىنىڭ مولشەرىن ليميتتەن اسىرۋ دەرەگى بار. ماسەلەن, فۋتبولشىلارعا 2 ميلليون تەڭگە ءليميتتىڭ ورنىنا 3 ميلليون, جاتتىقتىرۋشىعا 4 ميلليون تەڭگە تولەنگەن. «سۋدورەمونتنيك» ستاديونى, كوماندا اۆتوبۋسى جالعا الۋ كەلىسىمىنسىز زاڭسىز پايدالانىلعان. جابدىقتاردىڭ باعاسىن كوتەرىپ, 180-200 مىڭ تەڭگە تۇراتىن كىر جۋاتىن تەحنيكانىڭ نارىقتاعى قۇنىن 1,8 ميلليون تەڭگە دەپ كورسەتكەن. باسقارماعا بيىلعى قاڭتارعا راستايتىن قۇجاتتارسىز, شىعىنداردىڭ الدىن الا كەلىسىمىنسىز 233 ميلليون تەڭگەگە شوت بەرىلدى», دەپ مالىمدەدى ءباسپاسوز قىزمەتىنەن.
كلۋب 2018 جىلدىڭ اقپان ايىندا سەنىمگەرلىك باسقارۋعا بەرىلگەن. سەنىمگەرلىك باسقارۋدى «اتىراۋ» كاسىبي سپورت كلۋبى» قوعامدىق قورى قولعا العان. الايدا وسى جىلدار ىشىندە كلۋبتىڭ قىزمەتىندە جۇيەلى پروبلەمالار تۋىنداعانى بايقالادى. ونىڭ ىشىندە قۇرىلتايشىلار مەن باسشىلىقتىڭ ءجيى اۋىسۋى, تۇراقتى سپورتتىق كورسەتكىشتەردىڭ بولماۋى, قارجى-شارۋاشىلىق قىزمەتىندەگى اشىقتىقتىڭ جەتكىلىكسىزدىگى سەكىلدى كەمشىلىكتەر بار. لەگيونەرلەر سانى نەگىزسىز ارتقان, بيۋدجەتتىڭ اشىقتىعى ساقتالماعان, ناقتى ەسەپ بەرىلمەگەن. وسىنداي سەبەپتەرگە بايلانىستى وبلىستىق پروكۋراتۋرانىڭ ۇسىنىسىمەن كلۋبتى مەملەكەتتىڭ باسقارۋىنا قايتارۋ تۋرالى شەشىم قابىلداندى. بۇل قاراجاتتىڭ ماقساتتى جۇمساۋعا باقىلاۋدى كۇشەيتۋگە, ءوڭىردىڭ فۋتبول ينفراقۇرىلىمى مەن كادرلىق الەۋەتىن دامىتۋعا مۇمكىندىك بەرەدى.
كلۋب قىزمەتىن جاقسارتۋ ماقساتىندا ارنايى ستراتەگيا ازىرلەۋ جوسپارلانىپ وتىر. ستراتەگيادا بىرىنشىدەن, اشىقتىققا نازار اۋدارىلادى. ەكىنشىدەن, تۇراقتى باسقارۋعا, ۇشىنشىدەن, جاستار مەن بالالار فۋتبولىن دامىتۋعا باسا ءمان بەرىلەدى.
«اتىراۋ» فۋتبول كلۋبى باسشىلىعىندا دا وزگەرىستەر بولعانى تۋرالى رەسمي اقپارات تارادى. كلۋبتىڭ قۇرىلتايشىلارى بولعان جاسىن حابيبۋللين مەن سەرجان ماناسوۆ ءوز ورنىن بوساتتى. قۇرىلتايشىلار قۇرامىنا تەمىرحان سارسەنعاليەۆ پەن دياس ەلەۋسىنوۆ كەلدى. سونداي-اق كلۋب ديرەكتورى جاندوس بەكتەمىر مەن باس مەنەدجەر ماناربەك ەرجانوۆ تا ءوز قالاۋىمەن قىزمەتىنەن كەتتى. ناۋرىزدىڭ سوڭىندا ديدار سىدىقبەك «اتىراۋ» فۋتبول كلۋبىنىڭ باس مەنەدجەرى قىزمەتىنە كىرىسكەن ەدى. بىراق ارادا 15 كۇن وتكەندە ول دا قىزمەتىنەن كەتۋدى ءجون كورگەنىن ءمالىم ەتتى. ول بۇرىن «قىزىلجار», «استانا-1964», «اقتوبە», «ورداباسى» كلۋبتارىندا وينادى. فۋتبولداعى مانسابىن اياقتاعان سوڭ «پروگرەسس KZ» تالداۋ قىزمەتىنىڭ جەتەكشىسى, «يتتس» اق باقىلاۋ ءبولىمىنىڭ سانات مامانى, «قازاقستان رەسپۋبليكاسى تۇڭعىش پرەزيدەنتى – ەلباسى قورىنىڭ» جوبالىق كەڭسە ۇيلەستىرۋشىسى لاۋازىمدارىن اتقارعان. كەيىن SD Family Group ديرەكتورى, قازاقستان مەديا-فۋتبول فەدەراتسياسىنىڭ پرەزيدەنتى بولعان. بۇدان سوڭ فۋتبول فەدەراتسياسىنىڭ «الاڭ» ينفراقۇرىلىمدىق جوباسىنىڭ كەڭەسشىسى رەتىندە باسشىلىق قىزمەتتە تاجىريبە جيناعان.
«ومىردەگى ەڭ باستى ۇستانىم – وزىڭە, وزگەلەرگە ادال بولۋ. مەن بۇل قالانى, فۋتبول كلۋبىنا قاتىسى بار ادامداردىڭ ءبارىن جاقسى كورەمىن. ەشكىم قىزمەتتەن كەتۋگە ماجبۇرلەگەن جوق. از عانا ۋاقىتتا كلۋب پەن ايماق باسشىلىعى اراسىنداعى قارىم-قاتىناستى جاقسارتتىم دەپ بىلەمىن», دەيدى د.سىدىقبەك.
مىنە, «اتىراۋ» فۋتبول كلۋبىنىڭ قازانىندا وسىنداي تولعاقتى ماسەلەلەر قايناپ جاتىر. مۇنايلى ءوڭىردىڭ تۇرعىندارى بيۋدجەتتەن قوماقتى قارجى بولىنەتىن كوماندانىڭ ادىمى اشىلعانىن قالايدى. الايدا الا دوپ قۋعان ۇجىمنىڭ جۇلدەنى ورىندارعا قاشان يە بولارى ازىرگە بەلگىسىز.
اتىراۋ وبلىسى