جامبىل وبلىسىنىڭ اكىمى ەربول قاراشوكەەۆ تاراز قالاسىنداعى №30 مەكتەپ-گيمنازياسىنىڭ وقۋشىلارىمەن بىرگەن «جاسىل الەمدى بىرگە قۇرايىق!» ەكولوگيالىق اكتسياسىنا قاتىستى, دەپ حابارلايدى Egemen.kz.
ەكولوگيالىق اكتسيانىڭ ماقساتى – اعاش تۇقىمدارىن ەگۋ جانە ءوسىرۋ ارقىلى مەكتەپ وقۋشىلارىنىڭ تابيعاتقا دەگەن ىقىلاسىن وياتىپ, قورشاعان ورتا الدىنداعى جاۋاپكەرشىلىگىن ارتتىرۋ.
ءىس-شارا بارىسىندا ءوڭىر باسشىسى ەربول قاراشوكەەۆ وقۋشىلارمەن بىرگە قىلقان جاپىراقتى اعاش تۇقىمدارىن (بوزارشا, ارشا, شىرشا, قاراعاي) ەكتى.
ءبىلىم الۋشىلار كوكتەمدە ەككەن اعاش تۇقىمدارىن وقۋ جىلىنىڭ سوڭىنا دەيىن سىنىپتارىندا باقىلاپ, كۇتىپ-باپتايدى. جازعى دەمالىس كەزىندە ولار اعاشتاردى ۇيلەرىنە اپارىپ, كۇتىم جاساۋدى جالعاستىرادى. كۇزدە سول كوشەتتەردى مەكتەپ اۋلاسىنا وتىرعىزۋ جوسپارلانعان.
«وتكەن جىلى مەملەكەت باسشىسى قاسىم-جومارت كەمەل ۇلى توقاەۆتىڭ باستاماسىمەن ەلىمىزدە «تازا قازاقستان» ەكولوگيالىق اكتسياسى باستاۋ العان بولاتىن. بۇگىندە بۇل اكتسيا ەل اۋماعىندا ەكولوگيالىق تازالىقتى ساقتاۋ مەن قورشاعان ورتانى قورعاۋعا باعىتتالعان ماڭىزدى ناۋقانعا اينالدى.
سىزدەر دە تۋعان جەردىڭ تازالىعىن ساقتاۋعا جانە ونىڭ كوركەيۋىنە ءوز ۇلەستەرىڭىزدى قوسىپ كەلەسىزدەر. تابيعاتقا جاناشىرلىق تانىتىپ, قورشاعان ورتانىڭ تاماشا كورىنىسىن ساقتاۋ – ءاربىر ازاماتتىڭ بورىشى.
كۇز مەزگىلىندە اعاش كوشەتتەرىن وتىرعىزۋ راسىمىنە كۋا بولايىق», دەگەن ءوڭىر باسشىسى بالالارعا وقۋدا وزات بولىپ, بيىك شىڭداردى باعىندىرۋلارىنا تىلەكتەستىگىن ءبىلدىردى.
ءىس-شارا بارىسىندا «تازا قازاقستان» رەسپۋبليكالىق ەكولوگيالىق اكتسياسى اياسىندا ۇيىمداستىرىلعان «مەن قازاقستان ەكولوگياسىن جاقسارتۋعا قانداي ۇلەس قوسامىن؟» اتتى وبلىستىق شىعارمالار بايقاۋىنىڭ ماراپاتتاۋ ءراسىمى ءوتتى.
بايقاۋدا 2 530 وقۋشى باق سىناپ, ونىڭ ىشىندە 3 ۇزدىك شىعارما يەسى – ت. رىسقۇلوۆ اۋدانىنان ءنۇرالي كەرىمبەك, جۋالى اۋدانىنان ايدىن ارتىقباي جانە تاراز قالاسىنان زاڭعار ايتباي جەڭىمپاز اتاندى.وبلىس اكىمى جەڭىمپازدارعا ۆەلوسيپەد سەرتيفيكاتتارىن تابىستادى.
رەسمي دەرەككە سەنسەك, جامبىل وبلىسىندا «جاسىل الەمدى بىرگە قۇرايىق!» اكتسياسىنا 248 مەكتەپتىڭ 10 375 وقۋشىسى ءوز ۇلەسىن قوستى. تابيعي رەسۋرستار جانە تابيعات پايدالانۋدى رەتتەۋ باسقارماسى ءبىلىم بولىمدەرىنە اعاش تۇقىمدارىن تاراتىپ, تۇقىم ەگۋ بويىنشا ادىستەمەلىك نۇسقاۋلىقتار ۇسىندى.
جامبىل وبلىسى