ارمەنيادا قازاقستاننىڭ مادەني كۇندەرى ءوتىپ جاتىر. ەكى ەل اراسىنداعى جوعارى دەڭگەيدە ۇيىمداستىرىلعان العاشقى ءىرى مادەني ءىس-شارا مەملەكەت باسشىسى قاسىم-جومارت توقاەۆتىڭ ەرەۆانعا جاساعان رەسمي ساپارى بارىسىندا قول جەتكىزىلگەن كەلىسىمدەردىڭ ناتيجەسىندە جۇزەگە اسىپ وتىر, دەپ جازادى Egemen.kz اقپارات اگەنتتىگى.
ءىس-شارا اياسىندا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆا ارمەنيا رەسپۋبليكاسىنىڭ ءبىلىم, عىلىم, مادەنيەت جانە سپورت ءمينيسترى جاننا اندرەاسيانمەن كەزدەستى.
تاراپتار مادەني ىنتىماقتاستىقتىڭ كەلەشەگىن تالقىلاپ, گۋمانيتارلىق بايلانىستاردى قايتا جاڭعىرتىپ, نىعايتۋدىڭ ماڭىزدىلىعىنا توقتالدى. اسىرەسە ادەبيەت, مۋزىكا, كينو جانە اقپارات الماسۋ سالالارىنداعى ەكىجاقتى جوبالاردى كەڭەيتۋ قاجەتتىگى اتاپ ءوتىلدى.
– بۇگىنگى كەزدەسۋ مادەنيەت سالاسىنداعى ىنتىماقتاستىققا سەرپىن بەرەدى دەپ ويلايمىن. بۇل كينو عانا ەمەس, كىتاپحانا ءىسى, مۋزەيلەر, كونتسەرتتىك ۇيىمداردىڭ اراسىنداعى بايلانىس سالالارىنا دا قاتىستى. انيماتسيالىق جانە دەرەكتى فيلمدەردى بىرلەسىپ ءتۇسىرۋ تەتىكتەرىن قاراستىرۋىمىز كەرەك. سونداي-اق ادەبيەتىمىزدىڭ كورنەكتى وكىلدەرىنىڭ شىعارمالارىن اۋدارۋ مۇمكىندىكتەرىن ويلاستىرعان ءجون, – دەدى ايدا بالاەۆا.
كەزدەسۋدە ارتىستەردىڭ ءوزارا گاسترولدىك تۋرلارىن ۇيىمداستىرۋ, جاس ورىنداۋشىلاردىڭ قاتىسۋىمەن بىرلەسكەن كونتسەرتتەر وتكىزۋ, اقپاراتتىق اگەنتتىكتەر اراسىنداعى ىنتىماقتاستىقتى دامىتۋ جانە فيلمدەر, تەلەحيكايالار مەن دەرەكتى جوبالاردى قوسا العاندا مەدياكونتەنت الماسۋ سەكىلدى ناقتى ۇسىنىستار دا ايتىلدى. مۇنداي الماسۋدىڭ مادەني ماڭىزىمەن قاتار ەكونوميكالىق الەۋەتى دە بار ەكەنى اتاپ ءوتىلدى.
– بىرلەسكەن كينووندىرىس, تەاتر گاسترولدەرى مەن كونتسەرتتەر اياسىندا ىنتىماقتاستىقتى دامىتۋدىڭ الەۋەتى زور. بۇگىن فيلمدەر كورسەتىلىمى ءوتتى, كورەرمەن قازاقستاندىق تۋىندىلاردى زور ىقىلاسپەن قابىلدادى. بارلىق جوسپارلانعان شارالار جوعارى دەڭگەيدە وتەتىنىنە سەنەمىن. بۇل ءىس-شارالار ەلدەرىمىز اراسىنداعى قارىم-قاتىناستى ودان ءارى نىعايتۋدىڭ تاعى ءبىر قادامى بولماق, – دەدى جاننا اندرەاسيان.
مينيسترلەر ءوزارا ءىس-قيمىلدىڭ ناقتى جوسپارىن ازىرلەۋ يدەياسىن قولدادى. بۇل جوسپار سالالىق كوميتەتتەر تاراپىنان پىسىقتالىپ, مەملەكەتارالىق دەڭگەيدە بەكىتىلەتىن بولادى. مۇنداي ءتاسىل قازاقستاننىڭ وزگە ەلدەرمەن ىنتىماقتاستىعىندا ءساتتى جۇزەگە اسىرىلىپ كەلەدى جانە ول قازاق-ارميان مادەني بايلانىستارىن دامىتۋدا ءتيىمدى قۇرال بولا الادى.
ادەبيەت سالاسىندا قازاقستاندىق جانە ارميان اۆتورلاردىڭ شىعارمالارىن ءوزارا اۋدارۋعا ارنالعان كىتاپتار ءتىزىمىن جاساۋ تۋرالى كەلىسىمگە قول جەتكىزىلدى. بۇل رەتتە اۋدارما ىسىنە باسپا ۇيلەرىن تارتۋ جانە ۇلتتىق نارىقتا كىتاپتاردى ناسيحاتتاۋ ماسەلەسى دە قاراستىرىلدى. سونىمەن قاتار ارميان تاراپى قازاقستاندىق جازۋشىلاردى ەرەۆان كىتاپ فەستيۆالىنە قاتىسۋعا شاقىردى.
كەزدەسۋ سوڭىندا «حابار» اگەنتتىگى» اق مەن ارمەنيانىڭ «قوعامدىق تەلەكومپانياسى» جاق اراسىندا ءوزارا تۇسىنىستىك تۋرالى مەموراندۋمعا قول قويىلدى. تاراپتار قازاقستان مەن ارمەنيا اراسىنداعى مادەني جانە اقپاراتتىق ديالوگتى نىعايتۋعا باعىتتالعان مازمۇندى, جۇيەلى جانە اشىق جۇمىس جۇرگىزۋگە دايىن ەكەندەرىن ءبىلدىردى.
ايتا كەتۋ كەرەك, قازاقستان مەن ارمەنيا اراسىندا ديپلوماتيالىق قاتىناستار ورناعان ساتتەن بەرى العاش رەت وسىنداي اۋقىمدى ءارى رەسمي دەڭگەيدەگى مادەني شارا – ارمەنياداعى قازاقستاننىڭ مادەني كۇندەرى جوعارى مەملەكەتتىك دارەجەدە وتكىزىلىپ وتىر. ءىس-شارالار شارىقتاۋ 19 ساۋىردە ارام حاچاتۋريان اتىنداعى كونتسەرت زالىندا وتەتىن گالا-كونتسەرتپەن قورىتىندىلانادى.