سوعىس ارداگەرى ارداقتالدى

ۇلى وتان سوعىسىنا قاتىسقان يۆان ماتۆەەۆيچ بەگۋنوۆتى تۋعان كۇنىمەن قۇتتىقتاۋعا مەدەۋ اۋدانىنىڭ قورعانىس ىستەرى جونىندەگى باسقارماسىنىڭ, دەسانتتىق-شابۋىلداۋ اسكەرلەرىنىڭ اسكەري قىزمەتشىلەرى, جەرگىلىكتى اتقارۋشى ورگانداردىڭ جانە «قارۋلى كۇشتەردىڭ ارداگەرلەرى» رقب الماتى فيليالىنىڭ وكىلدەرى بارعان.

قارۋلى كۇشتەر ارداگەرلەرى قالالىق كەڭەسىنىڭ وكىلى وتستاۆكاداعى پولكوۆنيك تولەگەن مۇستافين قورعانىس ءمينيسترىنىڭ اتىنان قۇتتىقتاۋ حاتىن وقىپ, مايدانگەرگە جەڭىسكە قوسقان ۇلەسى مەن كوپ جىلدىق ەڭبەگى ءۇشىن العاۋسىز العىسىن جەتكىزدى.

ء«سىز سۇراپىل سوعىس سىناعىنان ءوتتىڭىز, ال سوعىستان كەيىنگى جىلداردا قازاقستاننىڭ ءارى قاراي وركەندەۋى, ءال-اۋقاتى ارتۋى ءۇشىن قىزمەت ەتتىڭىز. اتا-بابالارىمىزدىڭ سول كەزەڭدەگى ەرلىگى ەش ۇمىتىلمايدى», – دەدى ت. مۇستافين.

يۆان ماتۆەەۆيچ بەگۋنوۆ 1925 جىلى 15 ساۋىردە جيتومير قالاسىندا (ۋكراينا) دۇنيەگە كەلگەن. توعىز جاسىنان باستاپ ونىڭ تاربيەسىمەن وكىل شەشەسى اينالىسقان. كەيىن ون التى جاسار يۆان جۇمىس ىستەمەك بولىپ باتىس قازاقستانعا كوشىپ كەلگەن.     

سوعىس باستالىسىمەن جاس جىگىت اقتوبە وبلىسىنان كەڭەس اسكەرىنىڭ قاتارىنا شاقىرىلدى. ۋكراينا مايدانىندا 228-ءشى گۆارديالىق اتقىشتار پولكىنىڭ قۇرامىندا سوعىسقان, پۋلەمەتشى بولعان. ەۋروپانى ازات ەتۋگە قاتىستى. جەڭىستى ول 1945 جىلى مامىردا پراگادا قارسى الدى.

شايقاستا كورسەتكەن باتىلدىعى مەن توزىمدىلىگى ءۇشىن سارباز قىزىل تۋ وردەنىمەن, «ەرلىگى ءۇشىن» مەدالىمەن جانە باسقا دا جاۋىنگەرلىك ناگرادالارمەن ماراپاتتالدى.

سوعىستان كەيىن يۆان بەگۋنوۆ قىزىلورداداعى «قازقۇرىلىسمونتاج» كاسىپورىندارىندا, كەيىنىرەك الماتىداعى «قازەلەكترومونتاجدا» پروراب بولىپ جۇمىس ىستەدى.

بۇگىندە ارداگەر قىزى يرينامەن بىرگە تۇرادى. ونىڭ بەس نەمەرەسى, ون ءبىر شوبەرەسى جانە ءبىر نەمەنەسى بار. مايدانگەردىڭ رۋحى ءالى مىقتى, قيمىلى شيراق.