كولىك ۆيتسە-ءمينيسترى ماقسات قالياقپاروۆ اقمولا وبلىسىنا جۇمىس ساپارىمەن بارىپ, كوكشەتاۋ – زەرەندى تاسجولىندا ءجۇرىپ جاتقان ورتاشا جوندەۋ جۇمىستارىمەن تانىستى. بۇل جولدا ەلىمىزدە العاش رەت رەۆەرسيۆتى قوزعالىس جولاعى ەنگىزىلمەك, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
مينيسترلىكتىڭ حابارلاۋىنشا, جوبانىڭ ەرەكشەلىگى – جولدىڭ ەنى 7 مەتردەن 11 مەترگە دەيىن كەڭەيتىلىپ, ءۇش جولاقتى جۇيە قالىپتاسادى. ورتاڭعى جولاق رەۆەرسيۆتى بولماق, ياعني قوزعالىس باعىتىنا بايلانىستى اۋىسىپ وتىرادى. بۇل جولدىڭ وتكىزۋ قابىلەتىن ارتتىرىپ, جازعى تۋريستىك ماۋسىمدا كولىك تىعىنىن ازايتۋعا جانە جول-كولىك وقيعالارىن الدىن الۋعا مۇمكىندىك بەرەدى.
«جازعى ۋاقىتتا زەرەندى كۋرورتتىق ايماعىنا باراتىن كولىك سانى ارتاتىنى ءسوزسىز. جوندەۋ جۇمىستارى 47 شاقىرىمدى قامتيدى. قازىر جوبا اياسىنداعى جۇمىستار بەلگىلەنگەن كەستەگە ساي ءجۇرىپ جاتىر», دەدى ۆيتسە-مينيستر.
ايتا كەتەيىك, زەرەندى – ەلىمىزدەگى ەڭ تانىمال دەمالىس ورىندارىنىڭ ءبىرى. ءار جىلى بۇل وڭىرگە مىڭداعان تۋريست كەلەدى. وسىعان وراي, جول ينفراقۇرىلىمىن جاڭارتۋ نازارعا الىنعان.
جالپى, 2025 جىلى رەسپۋبليكا بويىنشا 7 مىڭ شاقىرىم جول ورتاشا جوندەۋدەن وتپەك. بۇل جۇمىستار, ەڭ الدىمەن, تۋريستىك الەۋەتى جوعارى ايماقتارعا باعىتتالعان. ولاردىڭ قاتارىندا الاكول, باياناۋىل, قورعالجىن, كولساي مەن قايىڭدى, راحمانوۆ قاينارى, كەندىرلى, سونداي-اق يمانتاۋ-شالقار كۋرورتتىق ايماعىنا اپاراتىن جولدار بار.