ەلىمىزدە 2022 جىلدىڭ 1 شىلدەسىنەن بەرى 307 ميلليوننان استام ءدارى-دارمەكتەر تاڭبالانسا, 2024 جىلدىڭ 1 شىلدەسىنەن باستاپ مەديتسينالىق پرەپاراتتارعا مىندەتتى تاڭبالاۋ ەنگىزىلگەننەن كەيىن قاپتامالارعا 262 ميلليون Data Matrix بەلگىلەرى سالىندى.
وسى ۋاقىت ارالىعىندا وتاندىق وندىرۋشىلەر شىعارعان 70 ميلليوننان استام ءدارى-دارمەك اينالىمعا ەنگىزىلگەن.
«دەنساۋلىق ساقتاۋ مينيسترلىگىنىڭ, مەديتسينالىق ۇيىمداردىڭ جانە ءدارىحانالاردىڭ نەگىزگى اقپاراتتىق جۇيەلەرىنە دارىلىك اينالىمىنىڭ بارلىق قاتىسۋشىلاردىڭ ينتەگراتسياسى اياقتالدى. قازىرگى ۋاقىتتا جۇيەدە 19 وتاندىق ءوندىرۋشى, 130-دان استام شەتەلدىك كومپانيا, 100 يمپورتتاۋشى, 200-دەن استام ديستريبيۋتور مەن دارىحانالىق قويمالار, 3 172 ءدارىحانا جانە 1 789 مەديتسينالىق ۇيىم جۇمىس ىستەيدى», - دەيدى Tanba بىرىڭعاي تاڭبالاۋ وپەراتورىنىڭ باس ديرەكتورى بيكەش قۇرمانعاليەۆا
قازىرگى تاڭدا ەلىمىزدە ءدارىحانالاردىڭ تاڭبالانعان ءدارى-دارمەكتەرمەن جۇمىستارىن جەڭىلدەتۋ ماقساتىندا ازىرلەنگەن NS Pharm ءموبيلدى قوسىمشاسىنىڭ ىسكە قوسىلۋىنا ارنايى نازار اۋدارىلىپ وتىر.
بارلىق دارىلىك زاتتاردى مىندەتتى تۇردە تاڭبالاۋ قازاقستان فارماتسەۆتيكالىق نارىعىندا ءدارى-دارمەكتەردىڭ اينالىمىن باقىلاۋدى جاقسارتۋ جانە قاۋىپسىزدىگىن ارتتىرۋ ماقساتىندا ەنگىزىلدى. بۇل جۇيە وندىرۋشىدەن سوڭعى تۇتىنۋشىعا دەيىنگى قوزعالىسىن باقىلاۋعا مۇمكىندىك بەرىپ, جالعان نەمەسە سەرتيفيكاتتالماعان دارىلەردىڭ تارالۋىن توقتاتۋعا ىقپال ەتەدى.
قازاقستاندا مىندەتتى تاڭبالاۋعا ءۇش تاۋار توبى جاتادى: اياق كيىم, تەمەكى بۇيىمدارى جانە ءدارى-دارمەكتەر. موتور مايلارى, سىرا ونىمدەرى, زەرگەرلىك بۇيىمدار تاڭبالاۋدى پيلوتتىق رەجيمدە سىناقتان وتكىزىپ جاتسا, بيىلعى 28 ناۋرىزدان باستاپ تىزىمگە بيولوگيالىق بەلسەندى قوسپالار (ببق) دا ەنگىزىلدى.