جەڭىستىڭ 80 جىلدىعى قارساڭىندا پرەزيدەنت ءىس باسقارماسىنا قاراستى «قازقۇرىلىسجۇيەسى» ۇيىمىنىڭ باسشىلارى تىل ارداگەرى اللابەرگەن احمەتجانوۆتىڭ ۇيىنە ارنايىلاپ ات باسىن تىرەدى. 90 جاسقا تولعان اقساقالدى مەرەيلى جاسىمەن قۇتتىقتاپ, بارشا ۇجىمنىڭ اتىنان شاعىن سىي-سياپات جاسادى, قۇرمەت كورسەتتى, دەپ حابارلايدى Egemen.kz.
«سۇيەگى اسىل» دەگەن تەڭەۋدى اللابەرگەن اقساقالعا قاراتا ايتساق, ابدەن جاراسارى حاق. قاريا اتباسار اۋدانىنىڭ تۋماسى, 1935 جىلى ءومىر ەسىگىن اشقان. بالالىق شاعى سۇم سوعىسقا تاپ كەلىپ, قارشادايىنان ەڭبەك مايدانىنا ارالاستى. بۋىنى قاتپاي جاتىپ, مال دا باقتى, ءشوپ تە شاپتى, اربا ايدادى.
ء«بىز قانشا قيىندىق كورسەك تە مويىمادىق. جەڭىس ءۇشىن كۇنى-ءتۇنى ەڭبەك ەتىپ, ەرەسەكتەرمەن قاتار ۇلەس قوستىق. مايدانعا اتتانعان ۇلكەندەردىڭ ورنىن جوقتاتپاۋعا تىرىستىق. انامىزعا, كىشكەنتاي باۋىرلارىمىزعا تىرەك بولدىق», دەيدى قاريا.
كوپتەن كۇتكەن جەڭىس تە كەلدى. ورتا بىلىممەن شەكتەلىپ قالماۋ كەرەك ەكەنىن تۇسىنگەن بوزبالا الماتىداعى زووۆەتەرينارلىق ينستيتۋتقا ءتۇسىپ, ۇزدىك ءبىتىردى. بەيبىت كۇننىڭ ءار ءساتىن باعالاپ, ءوز سالاسى بويىنشا ايانباي تەر توكتى. تۋعان جەرىندە شوپاندار بريگاداسىن قۇرىپ, جوعارى كورسەتكىشتەرگە قول جەتكىزدى. ەڭبەگى ەلەۋسىز قالعان جوق, وزىق شوپان رەتىندە دەلەگاتسيا قۇرامىندا ەلىمىزدىڭ سول كەزدەگى استاناسى – الماتىعا, ءتىپتى سوناۋ فرانتسياعا دەيىن بارىپ قايتتى. پاريج, مارسەل, انتيب, نيتستسا, كانن قالالارىنا دەيىن ساپارلاعانىن ساعىنا ەسكە الادى.
«1962 جىلى تىڭ ولكەسىنە كسرو باس حاتشىسى حرۋششەۆ كەلدى, سول كەزدەگى تسەلينوگرادتا سەزد ءوتتى. مەن ەڭبەك وزاتى رەتىندە ءسوز الىپ مىنبەگە شىقتىم. حرۋششەۆ تە سويلەدى, مەنىڭ ەڭبەگىمدى, جاقسى سويلەگەنىمدى اتاپ ءوتتى», دەيدى اقساقال.
1963 جىلى وزاتتار ساپىندا ماسكەۋگە شاقىرىلعان اللابەرگەن احمەتجانوۆ «ەرەن ەڭبەگى ءۇشىن» مەدالىمەن ماراپاتتالدى. جوعارى ناگرادانى وعان باس حاتشى حرۋششەۆتىڭ ءوزى تاپسىرىپتى.
ەڭبەك وزاتىنىڭ باي تاجىريبەسى مەن ۇلگىلى ءومىرى تۋرالى تەلەارنالار مەن گازەتتەر جارىسا جازعانىن دا اتاپ وتكەن ءجون. ءتىپتى سوناۋ ماسكەۋدەن كينودوكۋمەنتاليستەر كەلىپ, ارنايى ءتۇسىرىپتى.
«مەنىڭ قوي شارۋاشىلىعىنداعى تىڭ تاجىريبەلەرىمدى اۋداندىق جانە وبلىستىق پارتيا كوميتەتى قولداپ, اقىرى رەسپۋبليكاعا جايىلدى. وڭىرلەردەگى كولحوز, سوۆحوزداردا شوپاندار بريگاداسى قۇرىلدى. مەن قاي جەردە جۇرسەم دە جاستاردى ەرىنبەي جۇمىس ىستەۋگە, جوعارى ءبىلىم الۋعا شاقىردىم, اۋىل شارۋاشىلىعىن ساپالى ماماندارمەن تولىقتىرۋعا ۇلەس قوستىم. از جىلدا ءبىزدىڭ اتباسار اۋىلىنان بىرنەشە ادام جوعارى ءبىلىم الىپ, سوۆحوزدارعا زووتەحنيك بولىپ ورنالاستى. جەمىستى ەڭبەك ەتىپ, ابىرويعا بولەندى», دەيدى اقساقال.
«ەردى ەڭبەك جەتكىزەر» دەيدى قازاق. جاستايىنان قىزۋ ەڭبەككە ارالاسقان اللابەرگەن اقساقال بار مۇراتىن وسى جولدان تاپتى. جۇرتشىلىقتىڭ قۇرمەتىنە بولەندى, تابىسقا كەنەلدى. كوپتەگەن جوعارى ماراپاتتارعا يە بولدى. ەل يگىلىگى جولىندا ايانباي جۇمىس ىستەپ, 1983 جىلى قۇرمەتتى ەڭبەك دەمالىسىنا شىقتى.
بۇگىندە اللابەرگەن احمەتجانوۆ 6 بالادان تاراعان 12 نەمەرەنىڭ, 11 شوبەرەنىڭ ارداقتى اتاسى. بالالارى مەن نەمەرەلەرىنىڭ بارلىعى جوعارى وقۋ ورنىن ءبىتىرىپ, ومىردەن ءوز ورنىن تاپتى, شوبەرەلەرى دە جەتىلىپ كەلەدى. ءوزى ۇرپاعىنىڭ بالالارى مەن نەمەرەلەرىنىڭ ورتاسىندا, استانادا تۇرادى.
«جاسىم سەكسەنگە تاياعاندا مەككەگە قاجىلىق ساپار جاسادىم. قۇدايدان ەلىمىز ءۇشىن, اۋلەتىم ءۇشىن باقۋاتتى ءارى تىنىش ءومىر سۇرادىم. ۇرپاعىمىز باقىتتى بولسىن دەپ تىلەدىم», دەيدى قاريا.
جەڭىس كۇنى قارساڭىندا توقسان جىلدىق تورقالى تويىمەن قۇتتىقتاپ كەلگەن «قازقۇرىلىسجۇيەسى» مەكەمەسىنىڭ قىزمەتكەرلەرىن اللابەرگەن اتا قۋانا قارسى الدى. جاسى بىرازعا كەلسە دە ەڭسەسى تىك, ساناسى سەرگەك, ويى نىق, ءسوزى جاتىق. ىرگەلى ۇجىمنىڭ وزىنە جاساعان سىي-سياپاتىنا العىسىن ايتىپ, اق باتاسىن بەردى.