استانادا قازىر تۇرىپ جاتقان ۇلى وتان سوعىسىنىڭ 6 ارداگەرىنە جەڭىس كۇنىنىڭ 80 جىلدىعىنا وراي 5 ميلليون تەڭگەدەن الەۋمەتتىك تولەم بەرىلدى, دەپ جازدى ەلوردا اكىمدىگىنىڭ رەسمي سايتى.
بۇدان باسقا, جەڭىلدىكتەر بويىنشا ۇلى وتان سوعىسىنىڭ ارداگەرلەرىنە تەڭەستىرىلگەندەرگە – ۇوس كەزەڭىندە قىزمەت وتكەرگەن اسكەري قىزمەتشىلەر, فاشيستىك گەرمانياعا قارسى ءىس-قيمىلدارعا قاتىسقان ادامدار, لەنينگراد قالاسىندا بلوكادا كەزەڭىندە جۇمىس ىستەگەن ازاماتتار, كونتسلاگەرلەردىڭ كامەلەتكە تولماعان تۇتقىندارى, اسكەري قىزمەتشىلەر, جارالانۋى سالدارىنان مۇگەدەكتىگى بار ادامدارعا, ازاماتتىق نەمەسە اسكەري ماقساتتاعى وبەكتىلەردەگى رادياتسيالىق اپاتتار, يادرولىق سىناقتار سالدارىنان مۇگەدەكتىگى بەلگىلەنگەن ادامدارعا, مۇگەدەكتىگى اتا-اناسىنىڭ ءبىرىنىڭ رادياتسيالىق ساۋلەلەنۋىنەن گەنەتيكالىق جولمەن بەرىلگەن جاندارعا 45 اەك (176 940 تەڭگە) مولشەرىندە قارجى قاراستىرىلعان.
وزگە مەملەكەتتەردىڭ اۋماعىنداعى اسكەري قيمىلداردىڭ ارداگەرلەرى (اۋعان سوعىسى ارداگەرلەرىنەن باسقا) – تاجىك-اۋعان سەكتورىندا, يراكتاعى حالىقارالىق بىتىمگەرشىلىك وپەراتسياسىندا تاپسىرمالاردى ورىنداعان اسكەري قىزمەتشىلەر), تاۋلى قاراباقتاعى ۇلتارالىق قاقتىعىستى رەتتەۋدە بولعان اسكەريلەرگە 45 اەك (176 940 تەڭگە) بەرىلەدى.
«ارداگەرلەر تۋرالى» قازاقستان رەسپۋبليكاسىنىڭ زاڭىندا كوزدەلگەن وزگە دە تۇلعالارعا – تىل ەڭبەككەرلەرى, قايتىس بولعان اسكەري قىزمەتشىلەردىڭ وتباسىلارى, قايتىس بولعان ۇلى وتان سوعىسى ارداگەرىنىڭ جۇبايى – 15 اەك (58 980 تەڭگە) مولشەرىندە تولەم قاراستىرىلعان.
تولەمدەر ءساۋىر ايىنىڭ سوڭىنا دەيىن جۇرگىزىلەتىن بولادى.