جاڭا تەحنولوگيامەن ازىرلەنەتىن قىمىز

بيە سۇتىنەن دايىن ونىمگە دەيىنگى جول

سەرىكتەستىكتىڭ قىمىز فەرماسى كراسنوسەلسك ەلدى مەكەنىنەن 10-15 شاقىرىم ارىدە – وت-سۋى مول, مالعا جايلى, ويلى-قىرلى كەڭ القاپتا ورنالاسقان. فەرمادا بيە ءسۇتىنىڭ باستاپقى قۇنارىن جوعالتپايتىن وزىق نەمىس تەحنولوگياسى قولدانىلادى.

ءۇش ساۋىنشى تەك جەلىگە كىر­گەن بيەلەردىڭ جەلىنىنە ساۋىن تۇتىكشەلەرىن كيگىزىپ تۇرادى. تۇتىكشەنىڭ ەكىنشى شەتى جابىق قۇبىرعا جالعانعان. ءسۇت وسى قۇبىردىڭ بويىمەن اعىپ, 700 ليترلىك سالقىنداتقىش قۇتىعا جينالادى. وندا +4 گرادۋسقا دەيىن سالقىنداتىلعان شيكى ءسۇت كەلەسى قۇتىعا ءتۇسىپ, 70 گرادۋس ىستىق­تا پاستەرلەنەدى. ودان كەيىن تاعى ءبىر تانككە تۇسەدى دە, قايتادان +04 گرادۋسكە دەيىن سالقىندا­تى­لا­دى. بۇل تانكتەن تەحنولوگ ما­مان از عانا ءسۇت الىپ, تالداۋ جۇر­گىزىپ, قۇرامىندا باكتەريا­نىڭ بار-جوعىن انىقتايدى. سوسىن ءسۇت سۋبليماتسيالىق كامەراعا جىبەرىلەدى.

سۋبليماتسيا تسەحىندا قابىرعادان اشىلاتىن ۇلكەن قاقپاعى بار 5 سۋبلي­ما­تسيالىق كامەرا جۇمىس ىستەپ تۇر. كامە­رانىڭ جۇقالاۋ عانا 13 سورەسىنىڭ ىشىنە تەحنيكالىق ماي قۇيىلىپ, قىزدىرىلادى. شەتىنە المالى-سالمالى پلاستيك كيىلگەن سورەلەر تايىز قۇتىعا اينالادى دا, سۇتپەن تولتىرىلادى. ودان كەيىن كامەرانىڭ قاقپاعى جابىلىپ, قۇرىلعى ىسكە قوسىلادى.

«كامەرا ىشىندەگى شيكىزات جەدەل تۇردە -70 گرادۋسقا دەيىن مۇزداتىلادى. تەرىس قىسىمنىڭ ناتيجەسىندە, ۆااكۋم پايدا بولادى. ءبىر تاۋلىكتەي ۋاقىتتان سوڭ سورەلەر اقىرىنداپ جىلي باستايدى. ءار سورە +35 گرادۋسقا دەيىن جىليدى. وسىلايشا, ءسۇت قۇرامىنداعى ىلعال سۇيىق قالپىنا كەلىپ ۇلگەرمەي بۋعا اينالىپ كەتەدى. ياعني مۇز بىردەن گازعا اينالادى. تەك ىلعال عانا بۋعا اينالادى.

قاتتى ىسىتپاۋدىڭ دا قاسيەتى بار

ء«ونىمنىڭ باستى ەرەكشەلىگى – بيە ءسۇتى تەحنولوگيالىق سۇزگىدەن وتەدى. ودان كەيىن 72 گرادۋسقا دەيىن عانا ىسىتىلادى. كەيبىر ءوندىرىس ورىندارى ءسۇتتى 90-110 گرا­دۋسقا دەيىنگى ىستىقتا پاستەرلەيدى. نە­عۇرلىم تومەن گرادۋستا پاستەرلەنگەن ءسۇتتىڭ قۇرامىندا اعزاعا پايدالى مينە­رالدىق زاتتار بولادى. ءسۇتتىڭ باس­تاپقى قۇرامىندا بولعان اعزاعا پايدالى ميكروەلەمەنتتەر, دارۋمەن, اقۋىزدار سول كۇيى ساقتالادى. ياعني تەمپەراتۋرانى باقىلاۋ ارقىلى بيە ءسۇتىنىڭ تابيعي قۇرامىن بارىنشا ساقتاۋعا تىرىسامىز», دەيدى فەرما تەحنولوگى ەۆگەني ششەربينين.

سۋبليماتسيالانعان ساۋمال فەرمانىڭ قاپتاۋ تسەحىندا مولشەرى 200 گرامم, 0,5 كگ بولاتىن دايىن ۆااكۋمدى پاكەتتەرگە سالىنىپ, ساۋداعا جونەلتىلەدى. مىسالى, جارتى كەلىلىك ۆااكۋمدى پاكەت – 29 مىڭ تەڭگە, ال 200 گرامدىق قۇرعاق ساۋمال 19 مىڭ تەڭگە تۇرادى. پاكەتتەگى ءونىمنىڭ ەمدىك قاسيەتى ەكى جىلعا دەيىن ساقتالادى.

جىلقى سۇتىنەن كوسمەتولوگيا ونىمدەرى جاسالماق

قازىر «S-Agro-Borovskoe» سەرىك­تەستىگىنىڭ ۇلتتىق سۋسىن ونىمدەرى «اسپيرين», «تسۆەتنايا» ءدارىحانالار جەلى­سىندە, قوستاناي مەن استاناداعى «سولنەچنىي», «استىقجان» سۋپەرمار­كەت­تەرىندە ساتىلىپ جاتىر. ايتپاقشى, قۇرعاق ساۋمالدىڭ كادىمگى پاكەتتەلگەن كوفە ءتارىزدى بىرەۋىن اشىپ, ءوزىمىز دە ءدامىن تاتىپ كوردىك. پاكەتتەگى ۇنتاقتى ستاقانعا اۋدارىپ, ونىڭ ۇستىنە قايناعان جىلى سۋ قۇيىپ, ارالاستىرىپ, ءىشىپ كوردىك. ءدامى جايلاۋداعى جەلى باسىنان ىشكەن تابيعي ساۋمالدان ەش كەم تۇسپەيدى.

فەرما كۇنىنە 100-150 ليتر ءسۇت ساۋادى. كەلەشەكتە ساۋىن بيەلەر سانىن كوبەيتۋ ارقىلى ءونىم كولەمىن ارتتىرىپ, تاۋلىگىنە 300 ليترگە دەيىن ءسۇت الۋ جوسپاردا بار. مۇنى دايىن ءونىم تۇرىندە ەسەپتەسەك, فەرما جىلىنا 40 توننا قۇرعاق ساۋمال شىعارادى. فەرما باسقارماسى ەرمەك سۇلتانعالي ۇلىنىڭ ايتۋىنشا, سەرىكتەستىك الداعى ۋاقىتتا گەرمانيا كومپانياسىمەن بىرلەسىپ, جىلقى سۇتىنەن كوسمەتولوگيا ونىمدەرىن جانە بالالار مەن سپورتشىلارعا ارنالعان تاعامدار شىعارۋدى جوسپارلاپ وتىر.

شتورحقا شيپا بولعان بال قىمىز

سارى قىمىز سۇيەككە سىڭسە سان اۋرۋدى كەسەدى. ەرمەك سۇلتانعالي ۇلىنىڭ سوزىنشە, قىمىزدىڭ قىرىق اۋرۋعا ەم ەكەنىنە العاش كوز جەتكىزگەن ەكىنشى دۇنيەجۇزىلىك سوعىس كەزىندە تۇتقىنعا ءتۇسىپ, تاعدىر تالكەگىمەن قازاق توپى­را­عىنا جەر اۋدارىلعان رۋدولف شتورح ەسىمدى ۆەتەرينار ەكەن. سۇزەك اۋرۋىنا شالدىققان تۇتقىندى ايدالادا جالعىز بيەسىن ساۋىپ وتىرعان قازاق وتباسىنا اكەلەدى. سول ۇيدەگى اقساقال ابدەن دەرت مەڭدەپ, قۇر سۇلدەرى قالعان قۇدايى قوناعىن جاز بويى ساۋمالمەن ەمدەپ شىققان كورىنەدى. ۇلتتىق سۋسىننىڭ شيپاسى دارىپ, دەرتىنەن قۇلان تازا ايىققان تۇتقىن وتانىنا ورالعان سوڭ, بادەن-ۆيۋرتەمبەرگ دەگەن جەردەن 320 گەكتار جەر الىپ, جىلقى ۇستاپ, بيە سا­ۋىپ, سابا پىسەدى. ناتيجەسىندە, «Kurgestüt Hoher Odenwald» كومپانياسىنىڭ نەگىزىن قالاپ, وتباسىلىق بيزنەس اشادى. ءسويتىپ, قاراپايىم ۆەتەرينار ساۋمالدى بۇكىل ەۋروپا جۇرتىنا ناسيحاتتايدى. بۇگىندە ەسكى قۇرلىقتاعى سول كومپانيا قىمىز, ساۋمال ونىمدەرىمەن بىرگە, بيە سۇتىنەن كوسمەتيكالىق بۇيىمدار جاساپ شىعارىپ وتىر.

قازىر كومپانيانى حانس تسوللمان ەسىمدى كاسىپكەر باسقارادى. ءبىرازدان بەرى ءبىزدىڭ ەلگە ءجيى ات ءىزىن سالىپ, بىرنەشە وڭىردە نەمىس تەحنولوگياسىنا نەگىزدەلگەن قۇرعاق ساۋمال ءوندىرىسىنىڭ اشىلۋىنا مۇرىندىق بولىپتى. قىزىعى, بۇل كىسىنىڭ دە نەگىزگى ماماندىعى – ۆەتەرينار.

قوستاناي وبلىسى