اۋىل شارۋاشىلىعى مينيسترلىگى دەپارتامەنتى ديرەكتورىنىڭ بۇرىنعى ورىنباسارى جەمقورلىققا قاتىسى بار دەگەن كۇدىككە ءىلىندى, دەپ حابارلايدى Egemen.kz سىبايلاس جەمقورلىققا قارسى قىزمەتكە سىلتەمە جاساپ.
مەملەكەت باسشىسىنىڭ تاپسىرماسىن ورىنداۋ ماقساتىندا سىبايلاس جەمقورلىققا قارسى ءىس-قيمىل اگەنتتىگى قوعامدا زاڭدىلىق پەن ءتارتىپ قاعيداتىن قامتاماسىز ەتۋ, سونداي-اق جەمقورلىق فاكتىلەرىنىڭ جولىن كەسۋ جونىندەگى جۇمىستى جالعاستىرىپ جاتىر.
سىبايلاس جەمقورلىققا قارسى قىزمەتتىڭ استانا قالاسى بويىنشا دەپارتامەنتى اۋىر سىبايلاس جەمقورلىق قىلمىس جاسادى دەگەن كۇدىك بويىنشا اۋىل شارۋاشىلىعى مينيسترلىگى دەپارتامەنتى ديرەكتورىنىڭ بۇرىنعى ورىنباسارىنا قاتىستى قىلمىستىق ءىستى تەرگەپ جاتىر.
«ول اففيليرلەنگەن كومپانيانى قىزمەتتىك كولىكتى جوندەۋگە زاڭسىز تارتقان, ول ارقىلى بيۋدجەت قاراجاتىن قولما-قول اقشاعا اينالدىرىپ, ۇرلاپ اكەتكەن, بۇل مەملەكەتكە 3 ملن تەڭگەدەن استام شىعىن كەلتىرۋگە اكەپ سوقتىرعان», دەلىنگەن حابارلامادا.
تەرگەۋ جالعاسىپ جاتىر. قىلمىستىق-پروتسەستىك كودەكستىڭ 201-بابىنا سايكەس وزگە اقپارات جاريا ەتۋگە جاتپايدى.
كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكستىڭ 19-بابى 1-بولىگىنە سايكەس, قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.